MARK 2 - DVRWQ PVVB

Jisu Lviya-laqyabo Nyi Ak Mwpnum

¹ Meeg oyu maadab Jisu Kaparnahum nampamb wkur kunum, ho mwam namho doonam mam puiyam tapanum.

² Hoqgab nyiv vijaqg mwwg dookho hookumnum ho namho dook doomab nyinum. Ho Jisu bulam puiyam bekinl doodunum.

³ Ho nyi vpy go nyi lviya-laqyabo ak Jisug dookub joal haagnum.

⁴ Nyiv mvqlwko gab haak doomab nyinum, hoqgab bulv Jisug dook tingtw jaqho mwwlongam hoqkonum. Bulv mwwlongam hoqko tvl nyi akam opy golo karmtvl tvpoq jinum.

⁵ Bulug mwwjwngv hog hwdgo doodwn ham Jisu kaatwl, lviya-laqyabo nyi akam benum, “Noqg nyicam apaq jipa kun.”

⁶ Pvvb tomswrbo nyi tulungv hoq ditaqho doodunum, ham tatwl bulv atv mwwl benum,

⁷ “Soq nyi sib mwv hoggub nyil hampeq alwb bedwn” Mwv Pwnboam bepaqdo! Nyicam Pwnbov twqlak apaq jidy bov!”

⁸ Bulug hang mwwnam mam Jisu cengtwl mwv bulam benum, “Nulv soq svk sam hoggub mwwdwn”

⁹ Soq lviya-laqyabo nyi ak sam noqg nyicam apaq jipa kun hvl benam bengam yaadwn, hvbmab, “Gorabto” noqg kartaq vpinam naarab wgaql yvto, hvl benamv bengam yaadwn?

¹⁰ Ngo nulam Nyia Ko Tuupv gvda gvt so nyicam apaq jidwb atorv doodwn ham kaakin tayin.” Hoqgab mwv lviya-laqyabo nyi akam benum,

¹¹ “Ngo nam bedwn, gorab tuku, noqg kartaq vpinam naarab gvdkul nammwb wnku!”

¹² Bulv kaad lalab nyi akv mwwg kartaq vpinam naarab kunv nyiory alwb bulug aga hoqgv wknum. Bulv mwlwngv swrjaq gokbo mwwnum hoo kokw so bulv benum, “Soq svk ngulv nywywngam kaaka tukma hvl Pwnboam paqnum!”

Lebinvn Goqnam

¹³ Jisu lokta Galili swnyiqg sugurho wkurnum. Ho nyi tulungv mwwg dook ogumho hvvnwq yukam nyi tulungam nyegam tomswr swrabnum.

¹⁴ Mwv hoq hvb wdul doodwkho gvda nyooga kokarbo Alpiyus gv ko tuup Lebinvn, nyooga jikumko namho mwam nyooga kodul doodwb kaapanum. Jisu mwam benum, “Ngoqg kokwb wmin gvto.” Lebi gorab banv mwwg kokwb wmin gvnum.

¹⁵ Kokw so Jisu Lebig namho dvnam dvl doonum. Jisu Lebig namho dvnam dudul doodvk ho gvda nyooga kokar bov, nwd xipa maanam hoo mwwg buu tulungv hoo nyiv vigo mwwg kokwb wba bo tulungv lokub dvbam twwbamnum.

¹⁶ Nwd xipa maanam hoo gvda nyooga kokar bo nyi tulug lvgab lokub dvbam twwbamnam mam Pvvb tomswrbo Parisi tulungv kaatwl mwwg buu tulungam bulv toxnum, “Mwv hog nyitwl hoq hvk nyi tulug lvgab dvba dvn”?

¹⁷ Jisu bulam tapa tvl birwqnum, “Nyi vc maanbo tulu gab nyub goqdwb nyima dvn, hvbmabde vcbo nyi tulu gab nyub goqdwb nyidwn. Ngo nyiidarbo nyi tulungam goqtab haama, hvbmabde nyiidar maanbo nyicbo nyi tulungam goqtab haaiyin.”

Dvma-twwmab Vrnam

¹⁸ Lok mood golo Jon Baptistg buu tulungv la Parisi tulungv dvma-twwma vrr rwdul doonyianum, hoo nyi tulungv Jisug dookub haabnv mwam toxnum, “Hoggab Jon Baptistg buu ngvla Parisi tulungv dvma-twwmab vrr do, hvbmab noqgv vrr maadwn?”

¹⁹ Jisu bulam birwqnum, “Nyem naak namlo nyiin tulungam nulv bulam dvma-twwmab doom dvb mwwdwn i? Hvbdi nyiram, nyem naanbo nyegangv bulug lvgab doody deedib bulv hvb nyiram.

²⁰ Hvbmabde nyegangam naalayil bulug galoqkv bool wleqde moodv aal loog haatayin, hoo bulv dvma-twwmab vrr tayin.

²¹ “Hiyv nyiv kam nit vj pajarbo lvgab kucuq kam hamtaq maadwn, hoggab vjv jingkum banv kucuqbo vj hoqg ukongam ut yaiya dvb pujar tayin.

²² Hvbmab hiyvkam nitbo roo alangam kucuqbo yooxaqlo toolwq maadwn, hoggab roo alangvkam hoo kucuqbo yooxaqkam buqctayin hoo roo ala ngvla yooxaqkv almab nyitayin. Hvbnyita maab nit roo alangam nit kalam bo yooxaqlo toolwql apnamv altayin.”

Doonu Aalwg Pagoqkam Toxnam

²³ Doonunam aal golo Jisu am rongo rwqtaqb wpeqnum. Mwwg buu tulungv mwwg lvgab wbanum ho buu tulungv am vmlyw niqtuqkam ciql dvnum.

²⁴ Hoggab Parisi tulungv Jisun benum, “Kaato, soq si ngulug Pvvbam korbo pa, hoggab noqg buu tulungv Doonunam aalam, soq sam nyido!”

²⁵ Jisu bulam birwqnum, “Debid la mwwg nyi tulungv kanol hog dvs meegaq dvkho Debid hoggub nyinum nulv ham nywywngam poory ripa ma i?

²⁶ Mwv Pwnbog nam urab haabnv nyi nyiisamv dvngam maanam, Pwnboam xuml jipaqnum wtwngam dvnum, hoo mwwg lvgab yvba bo nyi tulungam kam jinum. Hoq apoho Abiyatar nyub butub swwl doonum?”

²⁷ Jisu bitwr-benyaho benum, “Doonunam aal sam nyia ko gab mvnum, hvbmabde nyia ko Doonunam aal gab dooma dvn.

²⁸ Hoqgab Nyiag Ko Tuupv Doonunam aal gvkam At Swb nyidwn.”