LIBITIKAS 2 - DVRWQ PVVB

Dvs Aky Tulu gab Pvvb

¹ “Hiyv lajaqkam hwdlo dvs akiam At Sw gab aky bwa yin, mwwg akiv jinam mam albo wtwngam jitayin. Mwv hoq lvgab kutiam pwlwql hoo sungam boam vlwq tayin

² ‍hoo ham Aaron gv ko tuup nyub tulungam bwa jitayin. Hoo mwv wtw hoqgv alaq pvvgwb hoo kutiam la, ho hoqg sungam bo hog mwlwngam, hoo nyubv hoq tulu ham mwwgab de akgob yugw ho partayin, hv At Swn dvnam aky sungam bo gob nyitayin.

³ ‍Hvbmabde hoq jingo dvs akiv Aaron gab la mwwg ko tuup tulu gab dootayin; hoqhv At Swg dvs-twws aky hoqgv mwlwngam dvrwq yaanbo akgob nyitayin.

⁴ “Hwdlo no dvs aky ak loora ho wtwngam cwwtwl aky bwa baloqkam, hoqham opap kiilwq maab kuty lvgab mviyo tvl cwwnam wtw tulungam maalo opap kiilwq maab kuty lvgab wtw mvnam loq bwatayin.

⁵ ‍Hoo noqg dvs aky ak hv wtw cwwcwnam baloqkam, hoqham opap kiilwq maanam albo wtwngam kuty lvgab mviyo tvl bwatayin.

⁶ ‍No hoqham vmwq gob mwmwq tvl hoo kutiam hoq aoho toolwq tayin; hoqhv dvs aky akwb nyitayin.

⁷ ‍Hoo noqg dvs aky ak hv loora hoqg kaqnam aky baloqkam, hoqham kuty lvgab albo wtw mviyo tvl bwatayin.

⁸ ‍Hoo no soq sib mvnam wtw tulungam At Sw gab dvs akiam bwa jitayin, hoo hwdlo hoqham nyubam bwa jiyikam, mwv hoqham yugw ho bwatayin.

⁹ ‍Hoo nyubv dvs aky hoqgv mwwgab dvb akgob hoo ham yugw ho partayin, hv At Swn dvnam aky sungam bo gob nyitayin.

¹⁰ ‍Hvbmabde hoq jingo dvs akiv Aaron gab la mwwg ko tuup tulu gab dootayin; hoqhv At Swg dvs-twws aky hoqgv mwlwngam dvrwq yaanbo akgob nyitayin.

¹¹ “Nulv At Sw gab dvs aky bwayin opap kiilwqnam hoqgv bwa dvb nyiram, hoggab nulv opap kiilwqnam mam parmabv ho ngola ngamkam At Swg dvs aky gob jimabv.

¹² ‍Nulv otuqcob aaxy-amaram At Sw gab aky bwa jito, hvbmabde hoq tulu ham yugw ho sungam dvb aky jimabv.

¹³ ‍Noqg dvs aky jinam mwlw ham no al vlwqtvl yaam mvmab pvvtayin. Noqg dvs aky hoqgv nam Pwnbog pvvb birnam alam niim mvmabv; noqg aky jinam mwlwho alam aky jitaq tayin.

¹⁴ “No otuqcob aaxy-amaram lengco boam At Swn aky jidnyiloqkam, noqg ommum ammam wm romnul xuxaqtvl, no dvs akiam jitayin.

¹⁵ ‍Hoo no kutiam hoq aoho aptayin hoo sungam bo kutiam hoq aoho aptayin; hoqhv dvs akiv.

¹⁶ ‍Hoo nyubv hoqham mwwgab dvb tuugin mwmwqnam dvsam hoo sungam bo mwlw lvgab kuty tuugin ham partayin; hoqhv At Swg dvs akiv.