JOHN 2 - DVRWQ PVVB

Kanaho Nyem Naanam

¹ Aal loum deenso Galili gvdag Kanaho nyem ak naanum.

² Jisug annvkam hoqho doonum. Jisu nvla mwwg buu tulungam kam hoq nyem naakho goqnum.

³ Hwdlo roo alangam twwnya yukam, Jisug annv mwam benum, “Bulug roo alangv dookma.”

⁴ Jisu mwnwn birwqnum, “Nyem, hoq doomanam mam ngoqg lvgab hognvkv nyisv doodwn, “Ngoqg moodv sija godab hvvc maata.”

⁵ Jisug annv ho nyera tulungam benum, “Mwv hoggv nyitwk hvl betayin ham tato.”

⁶ Hoq ataho Juhudi hvdwg dormo nyicib hursnan iss wlw uppum pumx go doonum; uppum pumxiv harcaq cammum yooma gogaqb issiv haanum.

⁷ Jisu nyera tulungam benum, “Soq uppum torab so iss loq toolwqto.” Bulv uppum torab pam issiv gamb hv yirt kvl dvb bwlwqnum.

⁸ Kokw so mwv bulam benum, “Sija iss meegin suqlin gvdwl soq durum namsam kaaya bo nyi akam jita.” Bulv mwam bva jinum,

⁹ ho mwv issam roo alab mvnam mam twwkanum. Mwv hogloqkv soq roo ala si haanum ham cengmanum. Hvbmabde issam toolin bo nyera tulungv cengnum

¹⁰ hoo mwv nyem naanbo nyegangam goqnv mwam benum, “Nyi mwlwngv roo ala alboam lak otuqcob hordwn, hoq kokwb pooxangam lak hordwn. Hvbnyimab no sija godab roo ala alboam ap xiqpan!”

¹¹ Galili gvdag Kanaho soq si, otuqcob Jisug swrdorxeqb nyinamv; hoqho mwv mwwg yuugnam mam kaakinum, hoo mwwg buu tulungv mwam mwwjwnum.

¹² Soq kokwb Jisu mwwg ann, bor tulu ngvla buu tulungv Kaparnahumb wknv apo go hoqho doonum.

Jisug Xumk Namlongam Mvxaqnam

¹³ Juhudi hvdwg Dvtv Durum moodv haasv twqb nyiywk ho Jisu Jerusalemb wnum.

¹⁴ Mwv Xumk nam uraho sibin, svv, sviya hoo pukum puqnbo, hoo twngk kwlibo nyi tulungam bulug tebol ho doodwb kaapanum.

¹⁵ Hoo mwv tanam pvvkwql agaqtvl nyi tulungam jwwnv sviya hoo svv mwlwngam xumk nam hoqgv ruqlin kunum. Mwv twngk kwlibog tebolam ngurkub ngurxeq dvb mvnv twngk kabaram yvqciq-yvqywl mvnum.

¹⁶ Hoo pukum puqn boam benum. “Hoq dupum-dvrab tulu ham soqkv naapaqto! Ngoqg Abwg nam mam kwm-kor mvk haty namgob mvmab!”

¹⁷ Mwwg buu tulungv dvrwqbo potalo hog hvl xeqnamv doodwn ham mwwpanum, “Noqg namgab ngoqg mwwjwnamv wm jaqhvb ngam gux tado.”

¹⁸ Ho Juhudi hvdv mwam birwqnv toxnum, “No hognvk swrdorxeqngv nyil ngulam kaakin tayin, no soqsam nyidwb ator doodwn.”

¹⁹ Jisu bulam birwqnum, “Nulv soq xumk nam sam saxia to hoo ngo samnvn aal loum mam lokta nit dvb mvdar tayin.”

²⁰ Bulv mwam toxnum, “No soq namsam aal loum mam lokta mvdar tayin, “Soq xumk nam sam vnyw campy leq nywx go mvnum.

²¹ Hvbmabde xumk nammam benamv hv Jisu mwwg gv vpam besnum.

²² Mwv sipekul gorab yikho mwwg buu tulungv mwwg soq benam sam mwwpa kunum, hoo bulv dvrwq potalo benam mam la Jisu benum mam mwwjwnum.

Jisu Nyia Kog Nyij-mujam Cengnam

²³ Jerusalemho Jisug swrdorxeq, bon nyinam mam kaatwl, nyiv vigo Jisun mwwjwnum.

²⁴ Hvbjaqkam Jisu mwv atv bulam mwam mwwjw mwwnw maanum, hoqgab mwv nyi mwlwngam cingyumnum.

²⁵ Nyiv mwam bekin maajaqkam, bulug hang mwwnam mam mwv cengxol doonum.