ESTER 9 - SURAT BARASIH BARITA BAHALAP

Oloh Yehudi mantakan kare musohe

¹ Kajariae maka sampai kea tanggal telo walas bulan Adar, iete andau je inukas uka malalus parentah raja akan kare oloh Yehudi. Andau te jari ientai awi kare musoh bangsa Yehudi uka mampakalah bangsa te. Tapi ampie oloh Yehudi kea je mampakalah ewen.

² Intu genep lewu, kare oloh Yehudi hapumpong tuntang hinje uka manyarang kakare oloh je aton tiroke papa dengan ewen. Kare bangsa hong kueh bewei palus tapakikeh dengan ewen, sampai ije biti mahin jaton je bahanyi manaharep ewen.

³ Mahi-mahi tinai kakare oloh hai intu propinsi, kare gubernur, bupati tuntang oloh bapangkat hong karajaan mandohop oloh Yehudi awi uras mikeh dengan Mordekhai.

⁴ Hong hapus karajaan oloh katawan je Mordekhai paham hai pangaruhe hong istana tuntang kea sasar hai kuasae.

⁵ Tumon te bangsa Yehudi tau hapakoae mawi musohe. Ewen manyarang mahapan padang palus mampatei.

⁶ Intu Susan eka raja marentah, oloh Yehudi mampatei lime ratus biti.

^7-10 Marak oloh te aton sapuluh biti anak hatue ain Haman anak Hamedata, musoh hai ain oloh Yehudi. Ewen te iete: Parsandata, Dalpon, Aspata, Porata, Adalya, Aridata, Parmasta, Arisai, Aridai, tuntang Waisata. Tapi oloh Yehudi dia marampok.

¹¹ Hong andau te kea oloh mansanan akan raja jumlah kare oloh je matei intu Susan.

¹² Koan Raja dengan Ratu Ester, “Intu Susan bewei oloh Yehudi jari mampatei 500 biti, tatame sapuluh biti anak Haman. Mahi-mahi tinai intu kare propinsi! Dia katawan narai je ilalus ewen intu kanih! Narai tinai je ilakum? Suman bewei, ikau akan mandinoe!”

¹³ Ester tombah, “Amon Tuan Raja nahuang, keleh oloh Yehudi je melai intu Susan toh hanjewu jewu inyoho manangkaluli tinai taloh je jari ilaluse andau toh. Tinai, keleh hantun kare anak Haman te ingkoak intu tihang gantongan.”

¹⁴ Palus raja manenga parentah uka malalus palakun Ester; Surat parentah akan lewu Susan impalua tuntang sapuluh hantun anak Haman ingkoak.

¹⁵ Jadi hong tanggal epat walas bulan Adar, kare oloh Yehudi intu Susan hapumpong haluli tuntang mampatei 300 biti tinai intu lewu te. Tuntang sinde toh kea ewen dia marampok.

¹⁶ Kare oloh Yehudi je melai intu kare propinsi kea jari hapumpong tuntang mawat tahasenge. Ewen mampakalah musohe tuntang mampatei 75.000 biti je basingi dengan ewen. Tapi ewen dia marampok.

¹⁷ Kajadian te manjadi hong tanggal telo walas bulan Adar. Limbah andau te, hong tanggal epat walas, ewen dia mampatei ewe-eweh, malengkan mamesta andau te dengan kahanjak.

¹⁸ Tapi oloh Yehudi je aton intu Susan mahaga tanggal lime walas kilau andau hai, awi ewen jari mampatei musoh hong tanggal telo walas tuntang epat walas, palus terai hong tanggal limewalas.

¹⁹ Jete bukue oloh Yehudi je melai intu kare lewu korik mingat tanggal epat walas bulan Adar kilau andau kahanjak, andau akan pesta kahanjak sambil hatenga kare panenga bara panginan.

Pesta Purim

²⁰ Limbah te Mordekhai mancatet kakare kajadian te tuntang mangirim surat akan kakare oloh Yehudi hong hapus karajaan Persia, aloh je kejau atawa je tokep.

²¹ Auh surat te iete uka mahaga tanggal epat walas tuntang lime walas bulan Adar genep nyelo.

²² Awi hong andau te ewen jari mampakalah kare musoh ewen sampai kasusah kajaken ewen hobah jadi kahanjak tuntang kasanang. Tagal te ewen patut mahaga kare andau te dengan pesta tuntang kuman hayak hatenga panginan tuntang mambagi panenga akan oloh ie belom susah.

²³ Oloh Yehudi manumon parentah Mordekhai te, balalu pesta te manjadi hadat je ilalus genep nyelo.

Kalaputan auh

²⁴ Haman anak Hamedata, turonan Agag, musoh hai ain oloh Yehudi, jari batenong je inyewut “purim” hapan manukas andau akan manyambalih oloh Yehudi, je jari inrencana uka mampalomos ewen.

²⁵ Tapi Ester manaharep raja, tuntang raja manenga parentah je inyurat je mambuku rencana papa je iawi Haman buah arepe kabuat, sampai ie tuntang kare anake ingkoak hong tihang gantongan.

²⁶ Awi te kare andau hai te inyewut Purim. Surat Mordekhai tuntang uras taloh je ingkeme awi oloh Yehudi,

²⁷ mawi sabab ewen manampa atoran akae kabuat, akan turonan ewen, tuntang akan uras oloh je kareh jadi ungkup bangsa Yehudi. Tumon atoran te genep nyelo ewen musti mahaga due andau hai je jari inukas awi Mordekhai.

²⁸ Inukas kea je sampai katatahie kare andau Purim te ela sampai dia impingat tuntang imesta, awi genep ungkup bangsa Yehudi bara genep angkatan hong genep propinsi tuntang genep lewu.

²⁹ Beken bara te, hayak surat Mordekhai te, Ratu Ester anak Abihail manampa surat je kaduee, je mandehen auh je huang surat Mordekhai tahiu Purim te.

³⁰ Surat te ingirim akan kakare oloh Yehudi, tuntang kare salinae ingirim akan 127 propinsi intu karajaan Persia. Surat te impahayak lakudoa mangat bangsa Yehudi harajur sanang tuntang mangat.

³¹ Surat te kea manyoho uka ewen tuntang turonan ewen mampingat kare andau Purim intu puna katikae, kilau ewen mampingat wayah puasa tuntang wayah manatum. Jete auh huang surat Mordekhai tuntang ratu Ester.

³² Parentah Ester je manukas kare atoran Purim, incatet hong buku.