Mark 3 - Ɛrgɨ Ɓani

Jesu nen ɓər paa na ɗa̰y tɨ saaw bɛ

¹ Jesu duga wur tɨ Juyb-a na li tɨ paa tina hul cam. Wo ne daa taal ɓudu uy wo tɨ nin.

² Parisyḛ-a kay a ji tɨ Jesu lɔ tɨ ər ləg pay ər ɓə ɓər ne nina na ɗa̰y tɨ saaw bɛ a. Kəysul a taam jaa kay tɨ ər sul.

³ Jesu ja gɨ ɓər ne daa taal ɓudu uy ɓə: «O̰ ndal əm lor le, tɨ bi daan.»

⁴ La ər ɓiri a: «Ɗa̰y tɨ saaw bɛ tɨ ɗa̰y tɨ ɓari kar ɓee ɓijim kar a? Ti tɨ wo nina ɓee ti tɨ wo humna a?» Lɛ wo ja jaa lo.

⁵ Jesu ləg a na hul laa. A hul sɨgra ka Jesu ngɨnɨm nari. Ər ja gɨ ɓər ɓə: «Nay əm daa!» Ɓər nay ər daa la ər daa ti nga̰ la.

⁶ Parisyḛ-a wag a si a ten peer na Erod na bi. A taam ul mu tɨ Jesu humna.

⁷ Gɨna Jesu wag si na ər bi tɨ wa̰y edɨ tɨ ɗaglə ɗəng tɨ Galile taal, bi dɨbla si tɨ ər lɔ: A o̰ tɨ Galile la, Jude la

⁸ Jerusalɛm la, Idum la tɨ lwərgɨ tɨ Jurdḛ taal la, tɨ nəgri sul ti Tir la, Sido̰ la. Bi ne hina tɨ ər ndɔ kəysul a laa wa̰y gun ne ər ka.

⁹ Gɨna Jesu ja gɨ ər bi tɨ wa̰y edɨ ka par gɨ ər kwa̰r ɗa̰y sul nɨ ka bi ka ər dugun lo.

¹⁰ Kuna ər nen bi dɨbla, bi tɨ mo̰y gun sənga peer tɨ ər dula tɨ nina tina.

¹¹ Gorne bi tɨ lal ɓijim ləg ər gɨna, a ha̰w a ɗa̰y tɨ ər kwi la a ɗo ngɔr ɓə: «Yim tɨ Ndɨla na ɓa̰!»

¹² Lɛ Jesu kway gɨ a un na gṵ sɨgra ɓə: «I ka ən ɓla gɨ bi ɓə yin tɨ Ndɨla na ɓa̰ lo.»

Jesu ɛr ər bi tɨ wa̰y edɨ

¹³ Lɔ tɨ pla Jesu ɗɔl tɨ nan sul. Ər soon bi ne ər taam a la a hina tɨ ər ndɔ.

¹⁴ Ər ɛr bi dɔkɔmɛ kar sap ər kay a ər bi tɨ wa̰y edɨ la a ɓə na ər tɨm na ɗa̰y sul.

¹⁵ Ər toon a ɗo beel tɨ Jaa Ndinimani na dwari tɨ jins kun tɨ bi sul.

¹⁶ Bi tɨ wa̰y edɨ dɔkɔmɛ kar sap ne ər ɛr a jo le: Simo̰ ne Jesu kay ər ndil Piyɛr la,

¹⁷ Jak, Jebede na ɓa̰ la, ər ɓun tɨ Ja̰ ne Jesu kay ər ndil ɓə Bwanerges, ne ji ɓə ndɨla tɨ ɗuri na ɓa̰ la,

¹⁸ A̰dre la, Pilip la, Bartelemi la, Matyo la, Tomas la, Jak Alpe na ɓa̰ la, Tade la, Simo̰ la, wo ne moon ər lɔr jaa la,

¹⁹ Judas Iskariot wo tɨ Jesu sul huna la.

Jesu a na bi tɨ gṵ hul ɓla

²⁰ Jesu a na ər bi tomni a si tɨ gə̰y. Bi dɨbla nari taygɨ cam ne a lɛm wa̰y tudi lo.

²¹ Gorne ər peer nimni laa, a hina tɨ na ər duga na dwari kəysul a ja ɓə: «ər sul tɨ tugla lo.»

²² Bi tɨ gṵ hul ɓla o̰ tɨ Jerusalɛm, a ja ɓə: «ər na Beljebul» la «Tɨ jinsə wa̰ay jo naa gɨ ər dwari tɨ jinsə-a kun!»

²³ Jesu soon a la ər ja gɨ a jaa na lar: «Sidan na wa̰ay ɓə ər ndula kun waa a?

²⁴ Jo bi tɨ waan hul ɓudu jo moon peer gɨna, a waan ɓə lɛm tɨm lo.

²⁵ Jo bi tɨ nimni ɓudu hul moon peer nimni gɨna, a nimni ɓə lɛm tɨm lo.

²⁶ Jo Sidan duga moon ər ndɔ gɨna, ər waan ɓə tungni la ər lɛm tɨm lo bad, ta ər mu ɓə kud.

²⁷ Wo ɓə lɛm wur tɨ wo tɨ dwari li hul tɨ ər mum to bla ər ɓəwlu lo. Lɛ jo ər ɓəw ər gɨna, ər ɓə ər mum to gun bla.

²⁸ Ən ja gɨ i tɨ bayri: Ndɨla hul ɓə ər ɗina tɨ bi tɨ ɓijim kar sul la, bi tɨ Ndɨla ɓurum sul la.

²⁹ Lɛ jo wo ne ɓurum Ndɨla Lal gɨna, Ndɨla hul ɓə ɗina ər tɨ ər ɓijim sul lo bad. Ɓijim ne ɓə ər par na kwi yɔd.»

³⁰ Jesu ja gɨ a kuna ne kəysul a ja ɓə: «Sidan si na ər.»

Jesu na na̰ la ər ɓungɨ la

³¹ Jesu na na̰ la ər ɓungɨ la a hina a lor tɨ bayri a ton wo ka soon ər.

³² Bi dɨbla ti yeri Jesu la a hina a ja gɨ ər ɓə: «Ləg! Əm na̰ la əm ɓungɨ tɨ ɓərgɨ la, əm ɓungɨ tɨ aa la, a taam əm wo bayri.»

³³ Jesu duga gɨ a: «Jajo tɨ ən na̰ la ən ɓungɨ tɨ ɓərgɨ la a?»

³⁴ Jesu ləg bi ne ti yeri ər, la ər ja ɓə: «Bi ton ti tɨ ən kwi le jo tɨ ən na̰ la ən ɓungɨ la.

³⁵ Wo ne ka wa̰y ne Ndɨla hul taam jo tɨ ən ɓun tɨ ɓər la, ən ɓun tɨ ii la, ən na̰ la.»