Mark 2 - Ɛrgɨ Ɓani

Jesu nen wo ne ndula taal ɓudu uy

¹ Ɗa̰y tɨ plaa, Jesu duga tɨ Kapɛrnom cam. Bi laa ɓə ər wo tɨ gə̰y.

² Bi dɨbla taygɨ sir li nɨ un ɓa̰ kaw teni tɨ limu. Jesu ɗo gɨ a beel tɨ Ndɨla jaa.

³ Bi tɨ nḛni yəg wo ne ndula taal ɓudu uy hina na tɨ ər ndɔ.

⁴ Lɛ a lɛm na ər hina tɨ Jesu ndɔ lo, kəysul bi tɨ dɨbla. A ɗɔl tɨ li sul, a kura li tɨ gor ne Jesu lor tɨ nin. Tɨ li ndul ne, a wur wo ndula taal ɓudu uy na njal tɨ Jesu kwi.

⁵ Gorne Jesu ləg bi ne na hul kula gɨna, ər ja gɨ wo ne ndula taal ɓudu uy ɓə: «Ən ɓa̰, ən hul ɗina tɨ əm ɓijim sul.»

⁶ Bi tɨ gṵ hul ɓla tapeer ti tɨ nin, a ɓiri a ndɔ a ja ɓə:

⁷ «Kəyjaa ɓər ne ja jaa kuna paa ne a? Ər ɓurum Ndɨla. Jaa jo hul ɓə ər ɗina tɨ bi na ɓijim sul a? Tɨ Ndɨla ɓudu ngoy lo a!»

⁸ Tɨ daamu Jesu una a ilgɨ, la ər ja gɨ a: «Kəyjaa yḭ na ilgɨ ne tɨ i nirimu a?

⁹ Kəyjaa jo tɨ ndog nari tɨ gɨ wo ne ndula taal ɓudu uy ja a? “Ən hul ɗina tɨ əm ɓijim sul.” Ɓee “O̰ ndal əm so əm kɔl əm si a?”

¹⁰ Ən taam ɓə ka yḭ una ɓari ɓə: tɨ nəgri sul le yin Wo Ɓa̰ ən na dwari tɨ hul ɗina tɨ bi ɓijim sul.»

¹¹ Gɨna ər ja gɨ wo ne ndula taal ɓudu uy ɓə: «Ən naa əm gṵ, o̰ ndal, əm so əm kɔl la əm si tɨ əm gə̰y!»

¹² Tɨ daamu, ɓər so ər njal la ər wag tɨ bi ji gun, ɓɔr bi ji nari la a teen Ndɨla. A ja ɓə: «Yini ləg wa̰y kuna paa ne ɗa̰y ɓudu lo.»

Jesu soon Lebi

¹³ Jesu duga cam tɨ ɗaglə ɗəng tɨ Galile mu. Bi dɨbla hina tɨ ər ndɔ la, ər edɨ gɨ a wa̰y.

¹⁴ Gorne ər wo ɗira gɨna, ər ləg Lebi, wo tɨ lambo tay, ər tɨ Alpe na ɓa̰, ər ti tɨ un tɨ lambo tay. Jesu ja gɨ ər: «Hina tɨ ən lɔ!» Lebi o̰ ndal la ər si tɨ ər lɔ.

¹⁵ Gorne Jesu ti tɨ wa̰y tudi mu tɨ Lebi gə̰y gɨna, bi tɨ lambo tay dɨbla la, bi tɨ ɓijim kar tapeer ti na ər hari na ər bi tɨ wa̰y edɨ. Kəysul bi dɨbla so ul tɨ ər lɔ.

¹⁶ Parisyḛ-a na bi tɨ gṵ hul kya̰, a ləg ər ti tɨ wa̰y tudi mu na bi tɨ lambo tay la na bi tɨ ɓijim kar la gɨna, a ja gɨ ər bi tɨ wa̰y edɨ ɓə kəyja jo ər twi wa̰y na bi tɨ lambo tay a na bi tɨ ɓijim kar la a?

¹⁷ Gorne Jesu laa a jaa ne gɨna, ər ja gɨ a: «Bi nga̰ jo a taam doktor lo, lɛ tɨ bi mo̰y jo a taam ər. Ən hina bi tugla jaa lo, lɛ ən hina tɨ bi tɨ ɓijim kar jo jaa.»

¹⁸ Ɗa̰y paa Ja̰ na bi la Parisyḛ-a la a ti na ndu yuni a hul kula jaa. A hina a ja gɨ Jesu: «Kəyjaa Ja̰ Batis na bi la Parisyḛ-a la a ti na ndu yuni lɛ əm bi ti na ndu yuni lo a?»

¹⁹ Jesu duga gɨ a: «Bi ne a hom a tɨ ɓaar ɓə a ndɔ wa̰y tudi kway gorne wo tɨ ii ɗang wo tɨ a daan a? Lula sul ne wo tɨ ii ɗang wo tɨ a daan gɨna a lɛm a ndɔ wa̰y tudi kway lo.

²⁰ Lɛ lula sul ɓə hina nɨ a ɓə ɓər jul tɨ daan gɨna, nejo a ɓə a ndɔ tudi kway na ɗa̰y ne.

²¹ Wo ɓə sər ɓani sula na sər hiin koblo ɗɨb lo. Kəysul sər ɓani ɓə sər hiin komni la, hura ɓə tɨm ɗəng nari.

²² Wo ɓə ham ɓəri bɛ tɨ ɓɔl hiin hul lo kəysul ɓɔl ɓə umni. Ham la ɓɔl la gun ɓə kud. Ndini ne əm ɓə ham bḛ ɓaani bɛ tɨ ɓɔl ɓaani jo hul.»

Jesu la ɗa̰y tɨ saaw bɛ la

²³ Na ɗa̰y tɨ saaw bɛ Jesu ɗən gembe worgɨ hul, a si ɓudu na ər bi tɨ wa̰y edɨ. Gɨna ər bi sima ya sul.

²⁴ Parisyḛ-a ja gɨ Jesu ɓə: «ləg wa̰y ne a kway kar lɛ a ka na ɗa̰y tɨ saaw bɛ»

²⁵ Jesu duga gɨ a: «Pay yḭ edɨ wa̰y ne Dabid ka lo a? Gorne ndula ka ər na ər bi lɛ wa̰y tudi teni gɨ a,

²⁶ ər wur tɨ Ndɨla li hul na an ne Abyatar tɨ wo ɗəng tɨ bi tɨ hima ɓina maan. Ər twi mapa ne a naa gɨ Ndɨla. Tɨ mapa ne wo tɨ hima ɓina ɓudu jo ɓə tudi. Dabid tuy la, ər naa gɨ ər bi la.»

²⁷ Ər ja gɨ a cam: «Ndɨla ka ɗa̰y tɨ saaw bɛ tɨ woɓari maan lɛ Ndɨla ka woɓari tɨ ɗa̰y tɨ saaw bɛ maan lo.

²⁸ Nejo Wo Ɓa̰ kaw tɨ ɗa̰y tɨ saaw bɛ na Baali.»