Tobit 8 - Ebaibul

Kilou Tobias ekipye

¹ Ani kedaut ikes akimuj ka akimat, kiitana alosit akiper, aŋun apotu Raguel ka Edina yaasi Tobias nagule ŋinaperot.

² Totamu nai Tobias ŋakiro ŋuna sek alimokinit Rapael iŋes, ido abu tolemu emany a ekolya ka eliŋa alocwee keŋ aneni sek ewuakinit iŋes, tosodi kiwuak nisipirya ŋini icunyere ekinyate.

³ Kirita eure a ekolya ekipye, toem neni asilon anakwap a Ijipit. Nai abu Rapael kiwuapa ekipye ŋol ka toen ŋakan ka ŋakejen aina.

⁴ Ani eyakarete ŋikauruunak a Sara kegolokis ekek a agule a ŋina aya Sara ka Tobias, tonyou Tobias alokitaada tema neni a Sara, “Nakaato tonyou, elipa ka eŋita Ekapolon yok ikiinak iwon akisyon ka akiboi emam ŋace.”

⁵ Aŋun, abu Sara tonyou, togeikis ikes ŋiarei akilip ka akidyek Akuj, ikotere iyokiyo ikes toyakasi emam ŋace. Togeik Tobias akilip tema, “Okoe Akuj atapapaa kosi, irereŋ iyoŋ ka erereŋ ekiro kon ananyameta a daadaŋ ŋikaru ka ŋikaru. Elipi ikipuro iyoŋ ŋisubuna ŋulu alokidiama ka ŋisubuna daadaŋ ŋikaru ka ŋikaru.

⁶ Ibu iyoŋ tosub Adam ka ibu tosub aŋuna keŋ aberu keŋ Epwa, ikwapei akeŋarakinan ka aketogogon keŋ. Eponito aneni a ŋuluarei a ŋul ŋituŋa a akwap daadaŋ. Ibu iyoŋ tema, ‘Nyejok ekile akiboi bon, etiyautu aŋuna keŋ akeŋarakinan ŋina ikwaan ka iŋes.’

⁷ Tokona aai ayoŋ aberu na ayenet kaŋ, meere aŋuna ke ekibure, nai alotooma akikinyomit iŋes. Ekelipi oryamutu ayoŋ ka iŋes akisyon ka omojoŋa kaapei ka iŋes.”

⁸ Tolimut ikes daadaŋ temasi, “Amen, Amen.”

⁹ Apotu nai ikes toloto akiper ikwapei araakar akuwar. Nai abu Raguel tonyou tonyarau ŋiketiyak keŋ neni keŋ, ido apotu ikes toloto, toboka akipany,

¹⁰ anerae abu Raguel tema, “Acepaki etwani Tobias, ido ikiruwor isua ŋulu ikirworotor ŋituŋa ikijamuwarito.”

¹¹ Ani kedaut ikes akibok akipany, abu Raguel tolot kai keŋ, tonyara aberu keŋ

¹² tema, “Kiyakiya aketiyan apei tolot aanyun erae keriŋa Tobias eyari. Nai ani ketwanit iŋes, emaikina iwon onuka iŋes nyeyenuna idiotuŋanan.”

¹³ Aŋun, apotu ikes kiyakiyasi aketiyan apei, abu aketiyan ŋin kinokak etaa, toŋaa ekek a agule a ŋina aya Sara ka Tobias, ido toloma tooma, toryamu aketiyan ŋin Sara ka Tobias ejotoete kaapei nooi.

¹⁴ Toloma nai aketiyan ŋin anagule ka abu tolimok Raguel ka Edina atemar ejotoete Sara ka Tobias ka mam ŋakiro ŋuna aronok ŋuna itiyakina.

¹⁵ Aŋun apotu ikes kipuro Akuj ŋina alokidiama, ido tema Raguel, “Okoe Akuj, irereŋ iyoŋ a arereŋu a ŋina asegan nooi, emaikina ŋiseuna kon daadaŋ ikipuro iyoŋ, emaikina ikes ikipuro iyoŋ ŋikaru ka ŋikaru.

¹⁶ Irereŋ iyoŋ, anerae ikiinak iyoŋ ayoŋ alakara, emam ŋuna aronok ŋuna etiyakin lopite ŋolo atamakinitor ayoŋ, nai itiya iyoŋ neni kosi anakisyon kon a ŋina apolon.

¹⁷ Irereŋ iyoŋ, anerae ibu iyoŋ kisyoni ŋidwe ŋul ŋiarei, ŋulu arae ikes bon aya lokalya kec. Okoe Ekapolon, kisyoni ikes ka inak ikes toyakas emam ŋace, kisiyook ŋuna ka akiyar kec analakara ka anakisyon.”

¹⁸ Abu nai Raguel tolimok ŋiketiyak keŋ akinyakakin ŋalup nakipany eriŋa akwap nyiwalara.

Ŋasuban ŋuna a Ekiitanu

¹⁹ Ekaku a ŋun, tolimok Raguel aberu keŋ akipoun ŋabopuloe ŋuna alalak ka abu iŋes tolot lobaren keŋ tolemu ŋitaak ŋiarei ka ŋimeesekin ŋiomwon, tolimok ŋituŋa atemar toŋolae ŋibaren ŋul. Aŋun, apotu ikes togeikis akitemonokin.

²⁰ Tonyarau nai Raguel Tobias kikoŋ neni keŋ irworo ŋakiro nu, “Nyirotokini iyoŋ a ne akitodol ŋina elunyarotor ŋirwa ŋitomon ka ŋiomwon, nai iboi iyoŋ a ne imuji ka imasi kaapei ka ayoŋ ka iinakini iyoŋ nakoku kaŋ ŋina sek abu kiyaloloŋio toyakaunor alelyanu.

²¹ Ani ekaku, ya atutubet apei a ŋiboro a ŋulu ayakar ayoŋ toboŋorya emam ŋace neni a papa kon, atutubet a ŋiboro ŋinace, eruwor ŋina kon kadau ayoŋ ka aberu kaŋ atwakare. Lokoku kaŋ, tomukyaniar. Arae ayoŋ papa kon ka erae Edina toto kon, ido ikirae isua ŋulu kon ka ŋulu aberu kon ameun tokona tari ŋikaru ka ŋikaru. Lokoku, tomukyaaniar.”