Tobit 7 - Ebaibul

Adolun lore a Raguel

¹ Apaki ŋina alomaryata Tobias ka Rapael Ekibatana, tolimok Tobias Rapael tema, “Lokaato Asaria, yaarae ayoŋ neni a Raguel alokaato kosi.” Aŋun, abu Rapael ya Tobias kai a Raguel, neni aryamuniata ikes Raguel iboi alodiyete analapatu a ŋina alodiyete epuke. Kimalata mono ikes iŋes, ido toboŋok Raguel tema, “Ŋikaitotoi, toyai emalas ŋolo ka alelyanu neni kus, alakara aponare ka akagatakinit ajokis a ŋawat!”

² Abu nai Raguel tema neni a Edina a aberu keŋ, “Ikwaan esorokit lo ka eyenet kaŋ Tobit.”

³ Abu nai Edina kiŋit ikes tema, “Ŋikaitotoi ai iponitotor iyes?” Toboŋokis ikes temasi, “Ikirae isua ŋiletok a Naputali ŋulu erikoritae Ninepe.”

⁴ Kiŋit nabo Edina ikes Tema, “Iyenete iyes eyenet kosi Tobit a?” Toboŋokis ikes temasi, “Ee, ikiyeni isua iŋes.” Kiŋit nabo Edina ikes tema, “Eŋale iŋes a?”

⁵ Toboŋokis ikes temasi, “Eyari iŋes ka eyai emam ŋace.” Kiyatak Tobias tema, “Erae iŋes papa kaŋ!”

⁶ Ani iirari Raguel ŋun, toporu tonu Tobias ka kigwor.

⁷ Abu daŋ Raguel kirwor neni a Tobias tema, “Lokoku kaŋ, elipi toyakasi ŋarereŋisyo neni kon, lokoku a ekile a ŋolo ajokan a ŋolo eyakar apolou. Okoe a lucan lu ŋulu kepotu todoikis neni a ekile a ŋolo eyookino ka etiyae ŋiticisyo ŋulu ka amina, inakis iŋes amudukan!” Abu nai totunakin eyenet keŋ Tobias, ido kikalou.

⁸ Abu aberu keŋ Edina daŋ kikalou aŋuna a Tobit, Sara daŋ nakoku kec, abu kikalou.

⁹ Tosodi toŋol Raguel emesek anamesekin keŋ ka kijau Tobias ka Rapael ka alakara a ŋina apolon. Ani kedaut Tobias ka Rapael akiloŋar ka akiboikin akimuj, tolimok Tobias Rapael tema, “Lokaato Asaria, kiŋit Raguel okoinak ayoŋ Sara ayenet kaŋ.”

Ekiitanu a Tobias ka Sara

¹⁰ Nai abu Raguel kiira ŋakiro a Tobias, ido tolimok Tobias tema, “Kimuj ka tomat, ido tolakar nakoloŋit na nakwaare, anerae mam ituŋanan ice eyakar apedor ŋina kiiset nakoku kaŋ Sara, mati iyoŋ bon lokaato. Nabo daŋ, ekeretakinito ayoŋ ŋikisila ainakin iŋes neni a ekile a ece, mati iyoŋ bon, anerae irae iyoŋ eyenet kaŋ nooi. Nai lokoku kaŋ, kimyek ekesileerek iyoŋ ŋakiro ejok lopite ŋolo eyakatar kire.

¹¹ Abu ayoŋ oinak nakoku kaŋ neni a ŋikilyok a ŋikanikaarei alotuŋa a ŋiyeneta kosi. Apotu ŋul daadaŋ totwaka nakwaare akoloŋit ŋina alosyoto ikes akiryamakin ka iŋes. Lokoku kaŋ, kimuj ka tomat, ido itiyae Ekapolon aŋuna kus a ŋiarei.” Nai abu Tobias tema, “Nyemuji ayoŋ kori nyamasi ayoŋ idiobore akitodol ŋina itemokinio iyoŋ ŋuna emaikina ayoŋ oryamu.” Aŋun, abu Raguel tema, “Etiyae ayoŋ ŋun. Ikiinakin iyoŋ iŋes lopite ŋolo etubunitere alokisila a ŋulu igiritae lokitaabo a Moses ka adaun atubun anakuj atemar ikiinakinio iyoŋ iŋes. Ya ayenet kon, ameun tokona irae iyoŋ lokaato keŋ ka erae iŋes nakaato kon. Ikiinakin iyoŋ iŋes ameun tokona, tari ŋikaru ka ŋikaru. Lokoku kaŋ, elipi Ekapolon ŋolo alokidiama ikiyok ka ikiterereŋ iyes ŋuluarei nakuwar na ka ikiinak iyes akisyon ka ekisil.”

¹² Tonyarau nai Raguel nakoku keŋ Sara. Ani edoluni Sara neni a papa keŋ, totiŋ papa keŋ iŋes akan, ido inak iŋes neni a Tobias tema, “Ya iŋes toruwor aberu kon ikwapei elimunitere alokisila ka anakiro a ŋuna etubunitoe alokisila ka anakiro a ŋuna etubunitoe a ŋuna igiritae lokitaabo a Moses. Ya iŋes, ido todolo ka iŋes emam ŋace neni a papa kon. Elipi kitojok Akuj ŋina anakuj alosit kus a ekisil keŋ.”

¹³ Abu nai Raguel tonyara toto a Sara ayaun abaruwa ŋina igirakinio ŋakiro, ido abu Raguel kigir ŋakiro ŋuna ka acamunet a ekiitanu, ŋuna itoodiunito atemar ainaki iŋes nakoku keŋ neni a Tobias toruwor aberu keŋ lopite ŋolo etubunitere alokisila a Moses.

¹⁴ Kisyakis nai ikes akimuj ka akimat.

¹⁵ Tonyarau Raguel aberu keŋ Edina, ido tolimok iŋes tema, “Nakaato, tosubak agule ŋinace, ido ya Sara inaa.”

¹⁶ Aŋun, abu Edina tolot kitemok ekitaada anagule lopite ŋolo alimokinitor Raguel iŋes, ido ya Sara inaa. Kigwor Edina aŋuna anakoku keŋ. Kedau amyetar ŋakiyo, tolimok nakoku keŋ tema, “Nakoku, tomukyaaniar, elipi ikiinak iyoŋ Ekapolon ŋolo anakuj alelyanu akilo akiyaloloŋ. Nakoku, tomukyaaniar!” Tosodi tolot nai Edina kiŋa.