Tobit 6 - Ebaibul

¹ Aŋun, abu toto keŋ a Tobias tojoŋo akigworo. Abu nai Tobias toloma kiŋa ka abu emalaika torukosi ka iŋes,

Alosit Rages

² abu daŋ eeŋok tolomut ka Tobias ka torukosi ka ikes ŋuluarei. Aŋun, apotu ikes toloto kaapei. Ani ewari akwap akoloŋit ŋina esyaunan, apotu ikes topero nakwaare diyete aŋolol Tigris.

³ Abu nai Tobias totiyaar naŋolol akilotar ŋakejen keŋ, toporu ekolya ŋoloti aburon anakipi kikatak akilikor akeju a Tobias, tosodi tobias kiworou.

⁴ Abu nai emalaika tolimok Tobias tema, “Kikamu ekolya ŋol, kimiidikin neni keŋ.”

⁵ Aŋun abu Tobias kikamu ekolya kiriu anakipi. Tema nai emalaika neni a Tobias, “Tocil akook ke ekolya a ŋol, ido tolemu apid, eliŋa ka emany. Kiric ikes, nai tocaka ŋamoliteny; anerae erae apid, eliŋa ka emany a ekolya ekitoe.”

⁶ Aŋun, kedau Tobias akicil akook a ekolya, abu kiwuak iwapei apid, eliŋa emany ka abu tope ka tonyam akiriŋ a ekolya ace, ido kiŋadaiya ace aŋuna ka akiwuakin acumbi. Apotu ŋuluarei toloto kiŋaren kaapei tari ŋina adolioto diyete Media.

⁷ Kiŋit nai Tobias emalaika tema, “Lokaato Asaria, erae mono apid, eliŋa, ka emany a ekolya ekitoe ainyo?”

⁸ Toboŋok emalaika tema, “Ani eruwor eliŋa ka emany a ekolya ipedori iyoŋ akicuny topuruu alodiyete ituŋanan ŋini isicanit ekipye, kori etau ŋolo aronon, ido eekari anituŋanan aronis daadaŋ ŋina eaunit ekipye, kori etau ŋolo aronon ka nyeyakaun nabo jik aronis ŋin nituŋanan.

⁹ Ani eruwor apid, ipedori iyoŋ akiwosakin nakonyen a ituŋanan a ŋini eya ŋikadeidei ŋulu akwaŋak, tokutak apid neni eya ŋikadeidei ŋulu akwaŋak, ejokunete nai ŋakonyen a ituŋanan a ŋin.”

Ŋakiro ŋuna alimokini Rapael Tobias

¹⁰ Apaki ŋina alomarya Rapael nakwap a Media ka eapikini Ekibatana,

¹¹ Tema Rapael neni a Tobias, “Lokaato Tobias.” Tema Tobias, “Ayai,” Tema nai Rapael neni keŋ, “Emaikina iwon opero akoloŋit na nakwaare lore a Raguel. Erae iŋes eyenet kon ka eyakar iŋes nakoku keŋ ŋina enyaritae Sara.

¹² Emamukar iŋes ikoku ŋinisapat ŋini erae ekeruman ŋiboro keŋ, kori ikoku ice ŋinipese mati Sara bon, ido ikwapei iraakar iyoŋ eyenet keŋ, iyoŋ bon akilo ŋikilyok ŋuluce daadaŋ iyakar apedor ŋina kiiset iŋes. Nabo daŋ iyoŋ emaikina kirum ŋiboro a papa keŋ. Adepar ŋun, erae Sara apese ŋina epiiryana, etitiny ka ibus nooi, ido erae papa keŋ ekile ŋolo ajokan.”

¹³ Torubak iŋes irworo tema, “Iyakar iyoŋ apedor daadaŋ ŋina kiiset Sara. Aŋun, lokaato, kiirarae ayoŋ, nakoloŋit na nakwaare, erwori ayoŋ ŋakiro a Sara neni a papa a Sara, ikotere iwon ikiyai iŋes erae ateran aŋuna kon. Ani eboŋoryo iwon alo Rages, ikitiyae iwon ŋasuban ŋuna ke ekiitanu keŋ, anerae ayeni ayoŋ kire jik atemar nyepedori Raguel awounia iŋes nyiit iyoŋ, kori akiikin ainakin iŋes neni a ekile a ece, ido nyeryamu atubokino ŋina ka atwanare lopite ŋolo elimunitere anakiro a ŋuna etubunitoe a ŋuna igiritae lokitaabo a Moses. Kire jik, ayeni iŋes atemar erae iyoŋ akilo ituŋanan ice, emaikina kiit nakoku keŋ. Aŋun, lokaato kiira ŋakiro kaŋ, ido akoloŋit na nakwaare ikirwori iwon ŋuna ka apese a ŋin ka itemokinio etiŋanu kon ka iŋes. Tosodi ani eboŋoryo iwon alo Rages, eyaaryo iwon iŋes, orukosi ka iŋes lore kus.”

¹⁴ Tolimok nai Tobias Rapael tema, “Lokaato Asaria, abu ayoŋ eira atemar apotu ŋikilyok ŋikanikaarei kiita iŋes ka atemar apotu ŋikilyok ŋul daadaŋ totwaka anagule a apese a ŋin. Atwakenenete ŋikilyok ŋul nakwaare akoloŋit ŋina iryamakinotor ikes ka apese ŋin. Eira ayoŋ ŋituŋa irworosi atemar arae ekipye iŋes aari ŋikilyok ŋul.

¹⁵ Nyewani ekipye ŋol apese ŋin, nai eari ekile daadaŋ ŋolo ecamit alosit neni ka apese a ŋin. Aŋun, ikwapei tokona araakar ayoŋ lokoku a papa kaŋ epei bon ŋolo aneni keŋ, akuryana ayoŋ atwanare, ido oinak papa kaŋ ka toto kaŋ totwaka aŋuna ekegworotor ayoŋ ka emamukatar ikes ikoku ice ŋini enuki ikes.”

¹⁶ Kiŋit nai Rapael Tobias tema, “Nyitamunit iyoŋ ŋakiro ŋuna ikilimokini iyoŋ papa kon, apaki ŋina ikilimokinia iŋes iyoŋ atemar emaikina iyoŋ toryamu aberu alotuŋa a ekal a papa kon a? Lokaato, kiirarae ayoŋ tokona, ido nyirwor nabo ŋuna a ekipye a ŋol. Ya apese ŋin, ayeni ayoŋ atemar akoloŋit napei na nakwaare, ikiinakinio iyoŋ Sara toruwor aberu kon.

¹⁷ Ani ilomari iyoŋ nagule keŋ, ya emany a ekolya edio ka eliŋa edio, ido kiwuak ikes nisipirya ŋini icunyere ekinyate, eurunete emany ka eliŋa a ekolya,

¹⁸ iŋuuni ekipye eure ŋol, ido toem ka nyiŋolikinio nabo ekipye alodiyete Sara jik. Nai ani eriŋa iyes nyeloto akiper, emaikina iyes ŋiarei tonyout mono, ido kilipa, iŋitasi aneni a Ekapolon a ŋolo anakuj ikiinak iyes akisyon ka ayakau emam ŋace. Nyikuryan, anerae atyakaritae iŋes aŋuna kon ŋinapei eriŋa akwap nyesubuna. Iuni iyoŋ iŋes ka irukorete iyoŋ ka iŋes. Atami ayoŋ atemar iryamuni iyoŋ ŋidwe aneni keŋ, ido ikwaanikin ikes ka ŋikaitotoi aneni kon. Tokona, nyilimu ŋakiro ŋace!” Ani iirari Tobias ŋakiro a Rapael ka toyenu daŋ atemar erae Sara ayenet keŋ, ŋina eyanasi ka iŋes anateker a papa keŋ, abu Tobias tominak Sara nooi ka abu etau keŋ kiitan iŋes.