Tobit 13 - Ebaibul

Alakara a Tobit neni ka Akuj

¹ Tema nai Tobit, “Kipuroe Akuj ŋina eyari ŋikaru ka ŋikaru, anerae erubakini apukan keŋ ananyameta a daadaŋ;

² isicaneneene iŋes ka isyoniyenene; ikirikori iŋes nakibois a ŋikatwak, nakibois ŋina alotooma akwap jik ka ikilemuni iŋes alotooma akwap anakibois a ŋikatwak a ŋina nyilelebunun ŋituŋa, ido mam ibore ebucar anapedor keŋ.

³ Kiiutu iŋes alokiŋaren ŋituŋa a ŋakwapin, okoe iyes ŋidwe a Isirael, anerae ikielak iŋes iyes nakwapin,

⁴ ikitoodik iŋes iyes apolou keŋ tari aina. Kitopoloosi iŋes alokiŋaren ŋisubuna ŋulu eyarete daadaŋ, anerae erae iŋes Ekapolon yok ka Akuj yok. Erae iŋes papa yok ka Akuj ŋina a ŋikaru ka ŋikaru.

⁵ Ikisicani iŋes iyes aŋuna a ŋasecisya kus, nai ikisyoni nabo iŋes iyes daadaŋ. Ikicununi iŋes iyes anakwapin a daadaŋ aŋuna aponi ikielar iyes.

⁶ Ani kiboŋosi iyes neni keŋ a ŋitai kus a daadaŋ ka akiyar kus a daadaŋ anakitiya ŋuna a kire alokiŋaren keŋ, eboŋuni nai iŋes neni kus ka nyiwai nabo iŋes ereet keŋ aneni kus. Aŋun, kiŋolikisi tokona ŋuna etiya iŋes aŋuna kus; kiiutu iŋes icelasi nooi. Kipuro Ekapolon ŋolo ka akiyookino ka kitopoloosi erwosit ŋolo a ŋanyameta a daadaŋ. Eiunit ayoŋ iŋes anakwap a ŋina akarikoritae, etoodiunit ayoŋ apedor keŋ ka ailiil keŋ anakwap a ŋikasecak abala, ‘Iyes ŋikasecak, toboŋutu ka kitiyata ŋuna iyookino alokiŋaren keŋ; acepaki itiyae iŋes ejok neni kus ikisyon iyes.’

⁷ Ani eruwor ayoŋ, etopoloorit ayoŋ Akuj kaŋ, ido elelyani akiyar kaŋ aneni a Erwosit a ŋolo anakuj.

⁸ Emaikina ŋituŋa daadaŋ kirworo ŋuna ka ailiil keŋ ka kiiutu iŋes alo Yerusalem.

⁹ Okoe ŋituŋa a Yerusalem, a etaun a ŋolo asegan abu iŋes ikisican iyes aŋuna ka aronis a ŋina ipotu iyes kitiyata, nai isyoni iŋes nabo ŋidwe a ŋulu iyookino.

¹⁰ Kiiutu Ekapolon, anerae ejok iŋes ka kipuro Erwosit ŋolo a ŋanyameta a daadaŋ, ikotere ebuni nabo iŋes akiboi neni kon alotooma alelyanu. Elipi kitalaka Akuj daadaŋ ŋulu erae ŋirikuno ŋulu iboiyete alotooma Yerusalem ka tominak daadaŋ ŋulu iboiyete alotooma kon ŋulu eryamunito ŋican ka tominak ŋanyameta daadaŋ ŋikaru ka ŋikaru.

¹¹ Ileereuni ajokis kon anakisaleta a akwap a daadaŋ, epote ŋituŋa a ŋakwapin a ŋuna alwanak neni kon, epote neni kon ŋituŋa ŋulu iboiyete anakwapin a ŋuna alwanak nooi aŋuna a ekiro kon a ŋolo asegan, eyaunete ŋainakineta aŋuna a Erwosit a ŋolo anakuj. Erubakinete ŋanyameta ka ŋanyameta eosi ka alelyanu alotooma kon, erubakini ekiro a etaun a ŋolo eseunitae eyai ŋikaru ka ŋikaru.

¹² Icenen ituŋanan ŋini irworo neni kon ŋakiro ŋuna ikimanitor iyoŋ; icenen ŋituŋa daadaŋ ŋulu ikikamarete iyoŋ, ido toritaanasi ŋarwatatain kon, icenen ŋituŋa daadaŋ ŋulu ikamarete ŋaduketa kon ŋuna aoyak ka kicunyakis ŋirerya kon. Nai erereŋ ŋikaru ka ŋikaru ŋituŋa daadaŋ ŋulu ikitopoloorito iyoŋ.

¹³ Toloto nai, tolelyana aŋuna a ŋidwe a ŋituŋa a ŋulu itiyaete ŋuna iyookino, anerae ecunakinio ikes iwapei, ido ipurete Ekapolon ŋolo a ŋanyameta a daadaŋ.

¹⁴ Erereŋ ŋulu ikiminasi iyoŋ ka erereŋ ŋulu elelyanete alotooma ajokis kon. Erereŋ daŋ ŋituŋa daadaŋ ŋulu iyaloloŋete ka iyoŋ aŋuna a ŋican kon, anerae alelyanete ikes kaapei ka iyoŋ, ido iŋolikinete apolou kon ŋikaru ka ŋikaru.

¹⁵ Ipuro akiyar kaŋ Ekapolon, Erwosit ŋolo apolon,

¹⁶ anerae edukokinio Yerusalem toruwor akai keŋ ŋina aŋanyameta a daadaŋ. Abuni ayoŋ alakar erae keyar ŋipiya a ŋiletok kaŋ, kiŋolikis apolou kon ka kiiut Erwosit ŋolo anakuj. Edukokinio ŋipukei a Yerusalem a ŋasuwa a ŋuna enyaritae sapire ka emerald ka edukokinio ŋarwatatain a Yerusalem a ŋamoru a ŋuna epol egyelit. Edukokinio ŋaduketa keŋ ŋuna aoyak a egolid ka edukokinio ŋaduketa keŋ ŋunajiet a egolid.

¹⁷ Epetanakinio ŋamoru lorotin a Yerusalem, iwuananakinio ŋinapito ŋulu amilimilak ka ŋamoru a Opir lorotin keŋ.

¹⁸ Eosi ŋituŋa alopukei a Yerusalem ŋieosyo ŋulu ka alelyanu, ecelunete ŋituŋa a ŋakais keŋ a daadaŋ temasi, ‘Aleluia! Kipuroe Akuj a Isirael!’ Ipurete ŋulu iterereŋitoe ekiro ŋolo asegan ŋikaru ka ŋikaru.”