Tobit 10 - Ebaibul

Atamatam a ŋikauruunak a Tobias

¹ Apaki ŋin, a ŋinakoloŋit, abu Tobit torubak imari ŋirwa ŋulu eai Tobias aŋuna ka alosit ka aboŋun. Tosodi ani elunyar ŋirwa toriŋa bo lokoku keŋ nyeboŋuno,

² totamak iŋes tema, “Ikamaritae mono tokona iŋes a? Kori ketwana Gabael, ido mam ituŋanan einakini iŋes ŋisiliŋa a?”

³ Togeik iŋes akiyaloloŋ.

⁴ Tolimu Ana aberu keŋ tema, “Atwana lokoku kaŋ nyeriŋa iŋes eyari.” Tosodi togeik akigworo ka akiyaloloŋ aŋuna alokoku keŋ, tolimu tema,

⁵ “Okoe ayoŋ, ikoku kaŋ, akica ŋina a ŋakonyen kaŋ, a ca kaŋ aŋuna abunio ekemyekinia iyoŋ tolot.”

⁶ Nai torubak Tobit elimonokini iŋes ebe, “Kililiŋ, tojoŋo akiyaloloŋ ŋinaminat kaŋ, eyai edya ejok. Acepaki itiyakina aina ŋakiro ŋadi ŋuna sek pa ayenio. Erae ekile ŋolo arukoryata iŋes ituŋanan ŋini ikinyoma, epei a ŋiyeneta yok pei. Nyiyaloloŋ aŋuna keŋ eyakaun iŋes ne alotooma apaki ŋina euruwana.”

⁷ Tolimok Ana Tobit tema, “Kililiŋ ŋolo erae iyoŋ! Tojoŋo amodyanakin ayoŋ. Atwana lokoku kaŋ.” Aŋinakoloŋit ekerikiraanar iŋes kiŋa akiŋolyanakin erot ŋolokuwar amekini lokoku keŋ elosi, nai pa eŋolyaanakini idiotuŋanan. Ani edoiyori akoloŋ alomanari iŋes lore, ido kiyaloloŋ ka kigwor akuwar daadaŋ ka pa ajotoonor iŋes jik. Ani elunyar ŋirwa ŋitomon ka ŋiomwon ŋulu a ŋasuban a ekiitanu, ŋirwa ŋulu sek ekoŋit Raguel akiwuap aŋuna anakoku keŋ, tolot Tobias neni keŋ tema, “Kimyekinae ayoŋ oboŋo, anerae ayeni ayoŋ atemar etamete papa kaŋ ka toto kaŋ atemar nyekeŋolikinete ayoŋ nabo. Aŋun, akadyekit ayoŋ iyoŋ, okoe papa, ikimyek ayoŋ oboŋo neni a papa kaŋ a elope. Adau sek ayoŋ akisileerekin iyoŋ epite ŋolo emyekinia ayoŋ iŋes.”

Togeut Tobias ka Sara alosit aboŋor lore

⁸ Nai tema Raguel neni a Tobias, “Kiboi ikoku kaŋ, eboiyoto ka ayoŋ; eyakiyari ayoŋ ŋituŋa neni a papa kon Tobit, ido elimokinete ikes iŋes ŋakiro kon.”

⁹ Nai tema Tobias, “Mam! Akadyekit ayoŋ iyoŋ, kimyekinae ayoŋ oboŋo neni a papa kaŋ.”

¹⁰ Aŋun abu Raguel inak atipei neni a Tobias Sara aberu a Tobias, inak daŋ iŋes atutubet apei a ŋiboro keŋ a lu: Ŋapi ka ŋipi, ŋimoŋin ka ŋamesekin, ŋisigirya ka ŋikaala, ŋilowi, ŋisiliŋa ka ŋiboro ŋulu ka akai.

¹¹ Tosodi nai kiŋolek ikes erotokinete emam ŋace, tonu Raguel Tobias tema, “Lokoku kaŋ, tolot ejok, ikidar Akuj alorot. Ikiyok Ekapolon ŋolo anakuj iyoŋ ka Sara aberu kon ka elipi eŋolik ŋidwe kus eriŋa ayoŋ nyetwana.”

¹² Abu nai Raguel tonu nakoku keŋ Sara tolimok iŋes tema, “Nakoku kaŋ, kitopoloorite papa alokile kon ka toto alokile kon, anerae ameun tokona erae ikes papa ka toto kon lopite ŋolo a ŋikauruunak kon. Nakoku, ape a ekisil, elipi eira ayoŋ ŋakiro ŋuna ajokak aŋuna kon ŋirwa daadaŋ ŋulu ayarya ayoŋ.” Kimala nai Raguel Tobias ka Sara, ido kimyek ikes toloto. Tema Edina neni a Tobias, “Lokoku kaŋ ka lokaato kaŋ ŋolominat, elipi ikiyok iyes Akuj ŋina anakuj todolo iyes ejok, elipi daŋ oyar apaki ŋina aoyan eŋolik ŋidwe kon ka ŋulu a anakoku kaŋ Sara eriŋa ayoŋ nyetwana. Akainakini ayoŋ iyoŋ nakoku kaŋ ite Ekapolon, nyitiya ŋakiro ŋadi ŋuna einakinete iŋes akiyaloloŋ ŋirwa ŋulu ka akiyar keŋ daadaŋ. Lokoku kaŋ, ape a ekisil. Ameun tokona arae ayoŋ toto kon ka erae Sara aberu kon ŋinaminat. Elipi ikiyok Akuj iwon daadaŋ ŋirwa daadaŋ ŋulu ka akiyar yok.” Abu nai Edina tonu Tobias ka Sara, ido kiŋolik ikes erotokinete emam ŋace.

¹³ Torotok Tobias aneni a Raguel elakara ka elelyani, ipuro Ekapolon ŋolo anakuj ka anakwap, erwosit a daadaŋ. Epuro iŋes Ekapolon, anerae abu kisiyook ejok ŋuna ka alosit keŋ. Ekaku aŋun daadaŋ, tolimok Tobias Raguel ka aberu keŋ Edina ŋakiro nu, “Akalimoki ayoŋ Ekapolon akitopoloorit iyes ŋirwa daadaŋ ŋulu ka akiyar kaŋ.”