Tabekacane 33 - Ngudradreadrekadhane Ka Sisiu 魯凱語聖經

Madradrele ku Yakubu si Isau

¹ Ku Yakubu wadrele sa kelakela ku Isau mailuku ku ta 400 ku umawmase, la malra pawvagai ki lalalakeini, si baai ki Lria si Rakile, si tadrusa ka labaibaini.

² Kwini lasu la malra ki tadrusa ka labaibaini si lalalake lini pakaswalala katwase, ala ka Lria si lalalakeini kabibilrili, ku Rakile si Yusepe laka abibiilrilinga.

³ Ku Yakubu ngiakakamaani aswala liniane; sa deethenga ki takaini yai, la sangupitulu edeede guruthungane idaedae.

⁴ Ku Isau la lailai kidredresenge iniane, si kebere iniane, uma iniane; kwini tadrusa la tubi.

⁵ Ku Isau la pangithalringulu drele, la drele kwini ki laababai si lalalake, la kivaga, “Kikai redelanesu kai laumawmase laka laneane?” Ku Yakubu la tubalre, “Kikai lalalake yai sakialibake ki Twaumase la baai nakwane ka sasiakawlusu.”

⁶ Kwini tadrusa ka labaibaini la ililuku ki lalalake lini mucucubungu, papia ki Isau sukubu,

⁷ la pacungulu ku Lria si lalalakeini, ala ka bibiilrilinga ku Yusepe si Rakile mialri mucucubungu makanaelre sukubu.

⁸ Ku Isau la kivaaganga, “Kwidra aswalalanga ku kipadradresengeli ka twaredelane laka satumanane?” Ku Yakubu la iya kai, “Kikwini yai saceacebe!”

⁹ La iya kai ku Isau, “Agili! Yakainga ku sanaka manemaneli; ngipapikaiyanga kwini lamanemanesu!”

¹⁰ Ku Yakubu la iya kai, “Ini, alaiyasi ka kiaragaisu nakwane, tara malra kikai acebeli. Kikai tapianesu kai kilibake nakwane, sa drelaku ki lringausu, miaku ki wadrele ku lringau ki Twaumase.

¹¹ Ala malra kikai ilukuli kai saceacebe, asi lwiyane ku Twaumase mathalrai nakwane, la baai ku murikaili patuelre.” Ku Yakubu la apapelaeela tarumara iya ki Isau kwini niacebane, kwini lasu ala tarumara.

¹² Ku Isau la iya kai, “Ila takatwasenga, nau aswala muswane.”

¹³ Ku Yakubu la tubalre, “Wathingalesu lavavalakeana kai lalalake; la mialriaku kakalithi kikai wathuthuthuana kai lwange, kiu. Luiyasi dadavaceana nai makavaale, alau lri kidulru kai lalwange si kiu si pacai.

¹⁴ Ila aswalala! Nau abilrili ngiabababalai, lu karidare dadavace kai lwange si kiu si lavavalake, lri karidare nai. Tamadredresengenga ikai ka Idume.”

¹⁵ Ku Isau la iya kai, “Lumia kwini, ala nau paasuru ku umawmase lani sirapale muswane.” Ai ku Yakubu twabalre, “Luiyasi kaisu lri tumanaiya, palrainga!”

¹⁶ Ku Isau la katwase kwini ki vai siwlri mwa ka Idume.

¹⁷ Ai ku Yakubu papialringa kavai Sukuthe, ikai kwini ngitatudaane, la tudaane ki lanilapulapwane ku balrawbau. Lakamani kwini pasi Sukuthe.

¹⁸ Ku Yakubu masuliivate twalai Mesuputamia siwlri mwa kavai Kanange ka cekele Sekeme, la ikai lrilringulu ki cekele tusasuladhane.

¹⁹ Arakai ku idai ka gingi langai ki mwabaibalrithi ki tama ki Sekeme ka Hamure kwini kadaengane.

²⁰ Kwi lasu yakai kwini cegecege ku vaeva ku tapatarumaramarane, la sunagane pasi “Ilri Iru Iseraylri”.