Nipadrelane 3 - Ngudradreadrekadhane Ka Sisiu 魯凱語聖經

Tigami baai ki swa Saradi kiwkai

¹ “Kusu tigamia si baai ki sasiakawlu belenge ki Saradi kiwkai, iya kai: “Kwini yakai ku pitu ka Ri si pitu ka tariau ki Twaumase, amia kai kawriva: Wathingalaku muswane patuelre; wathingalaku yakai kwi umawmase kwi panianianiakeana amia muswane, ku patengatengane wapacaisu!

² Lakamani kusu pacuna, la pakakeecenge kwi tedrane ka tikianenga kwi apanianiakanesu; asi lwiyane wadreelaku ku tapianesu, ikai ki macali ka Twaumase kaiyana ka kiatulrepenge.

³ Lakamani, kusu madha karimurimuru kwi kilalrasu, kwi tarumarasu kwi sabulrwane, laka patengane paluludu, si katwase cilri ki pasalrivanesu. Alaiyasi kaisu pulringalringau, lri miaku ki tarakupawpa pangitutuluku kela, lai kaisu maka thingale lutuumane lu lri kelaku lukaigane.

⁴ Ai, ikai Saradi, yakaiyana kwi laumawmase kwi tapakabulaneana kwi laimai; kikai laumawmase swadalepe silaimai ku lrawlrapungu ku laimai, si tupapalra kiredele nakwane.

⁵ Kudra pamalebe ku umawmase lai lri mialri silaimai ku lrawlrapungu ka laimai; lutumane lri kainaku mwalra ku naganeini patwalai ki tapacasane ki niake. Ikai cucubungu ki Ama si sasiakawluini, lri pathingala naku iniane ala ka swakai nakwane.

⁶ “Ku taiyane ki Siri kawriva papia ki lakiwkai, ku yakai ku calringa si dulru kilalra, kilalra makanaelre!”

Tigami baai ki swa Piladilapia kiwkai

⁷ “Kusu tigamia si baai ki sasiakawlu belenge ki swa Piladilapia kiwkai, iya kai: “Kudra amani ku saniange si ka patengatengane, ka magagemegeme ku sawsi ki Davidi, sana muelebe kadrwanga ku umawmase ku lri dulru elebe, sana elebe ku lrawlrawdru la kakadrwa ku umawmase ku lri dulru muelebe, amia kai kawriva:

⁸ Wathingalaku muswane patuelre; la thingalaku ka tikiane ku pukusu, ai paluludusu ku sabulrwaneli, la pakaelresu kwi kidremedremesu nakwane. Mwaelebenga naku kwi vaeva kwi lrawlrawdru icucubungu muswane, ka kadrwanga ku umawmase ku lri dulru elebe.

⁹ Drela! Kwini la papapalra ki Satange, ka taratavuvuvulrucu ka ngiatatu swa Yuda, ku patengatengane la kaika swa Yuda, lri pakainganadha ku liniane, si icucubungu ki drapalesu sukubu, lani thingale kwi lalasu aka madalamaku muswane.

¹⁰ Asi lwiyane paluludusu ku drekaseli, si patulrepenge kiadili, lakamani lu kelanga ku akwalriane kai kawmasane, lu kikilrialrialringaunga sanaka umawmase, lri palakebaku muswane.

¹¹ Lri kelanga naku. Gemegema pudriadringai ku yakai muswane patuelre, madha kiribiribici ki palrapalra ku lrigu ka civare ku taakacianesu.

¹² Kudra pamalebe ku umawmase, lri malraku iniane si tuulrudru ki daane ki Twaumaseli; kwi lasu lrika palralrawthunga kai kidaili. Lri pacasa ku pikai ki kinawmasaneini ku nagane ki Twaumaseli si nagane ki cekele ki Twaumase, amani kudra lri twalai belenge ki Twaumaseli si mulebe ka bavane ka Yerusalrime; lai lri pacasaku pikai ki kinawmasaneini ku bavane ku naganeli.

¹³ “Ku taiyane ki Siri kawriva papia ki lakiwkai, ku yakai ku calringa si dulru kilalra, kilalra makanaelre!”

Tigami baai ki Lawdikia kiwkai

¹⁴ “Kusu tigamia si baai ki sasiakawlu belenge ki swa Lawdikia kiwkai, iya kai: “Kudra amani ku ‘Amingi’, ka taraakasikasi ka patengane ku kidremedreme kudra amani ku tatwaladhane bekace ka Twaumase, amia kai kawriva:

¹⁵ Wathingalaku muswane patuelre; wathingalaku muswane ka kaika mangangeerece kaika macuulu; naika mapalrailraingaku ku mangangerecesu ku maculusu!

¹⁶ Asi lwiyane miasu ki mathathiliti ka acilai, kaika mangangerece si kaika maculu, lri patwaladhaku ki nguduili si upa muswane!

¹⁷ Amiasu kai: Maesaesadhaku cekecekele, ka kadrwa ku kawrame. Ai, kaisu wathingale ka matiakurusu turamuru! Matiakukurusu, ka mukimukici, si ka vilralralrakane.

¹⁸ Lakamani, lri pakalrumalaku muswane, papiaili langai kai nithalethalane ka kingi, lasu satacekecekelane; la langadhaku lrawlrapungu ku laimai si silaimai, lani paidringi kwini ki matiainu ka vilralralrakane ka kinawmasane; la langai ku sasulravane ki maca si sakidri ki macasu, lasu dulru drele.

¹⁹ Papia kudra ki kadalameli ku umawmase, lri kaelaelaku si bulru. Lakamani, kaculwa kwi kidremedremesu, la katwase cilri ki pasalrivane.

²⁰ Kilalra, acegecega ku ikai latadre ki lrawlrawdru bangebangebange; alaiyasi ikai ku kialalra kai lingauli si muelebe ku lrawlrawdru, lri mudaanaku. Lri kilringulaku iniane, kwi lasu lai lri mialri taelre kilringulu nakwane.

²¹ Kudra pamalebe ku umawmase, lri baadhaku iniane ku maelane ka puku, lri taelre nakwane nene ikai ki taetalaneli, mia nakwane ka pamalebenga, kaiasasane tadrusa nai nene ki Ama ikai ki taetalaneini.

²² “Ku taiyane ki Siri kawriva papia ki lakiwkai, ku yakai ku calringa si dulru kilalra, kilalra makanaelre!”