Ato aga mbɔʼ aŋwɛʼrɛ zɔnɔ
Aŋwɛʼrɛ yɛ Paalo à ŋwɛʼrɛ ebe bɔ Filipi ngɛ, à ne saa ebe ndɔngwe mbèmbè yɛ engɔ à klada efwɔ abɛ Yorob, a Masedonya, efwɔ abɛɛ abɛ Rom ngɛ. Paalo à ŋwɛʼrɛ aŋwɛʼrɛ zɔnɔ mwɔ a dzɔm. Efwɔ endzobo zɔnɔ bɔ afwɛʼ kristo tsɛrɛ à na le efɛɛrɛ nè engɔ, ebwa mbɔʼ aŋu a ma tee abwa andɔɔ a ndɔngwe a Filipi ngɛ ma nyii engɔ. Éngɛ aŋwɛʼrɛ zɔnɔ à da me zeʼe nè egɛnɛ mane éŋwaʼa wɛ à me né tòʼrò tye Paalo nyɛ̀rɛ̀ zèʼe ene ebɛrɛtaa kamakam yɛ engɔ à me le ene Yeso Kristo ngɛ.
Enji yɛ engɔ à ŋwɛʼrɛ aŋwɛʼrɛ zɔnɔ ngɛ a ne é ndɛʼ ebɛrɛ ebe bɔ kristo a Filipi, mbɔʼ etɔ̧ɔrɔ angɔ à saa ebe engɔ èndzobo chɛ engɔ à ma ke ekpede ngɛ. Engɔ à nu afwɔ zɔnɔ e wu hli ebe angɔ mbɔʼtye e me né twàʼrà amɔ gɛrɛ le ebɛrɛ ka de mwɔ aŋu engɔ ma zɔ ǹgoʼ angɔ gɛrɛ ma zɔ âmɔ̀ ǹgoʼ ngɛ. Engɔ à bii angɔ kpe e le ezɔɔrɔ Yeso ankɔmɔ é le kpe emo ala mane ebeʼe ekwa sa gbee angɔ ngɛ. Engɔ gɛrɛ wu zhuŋu ebe angɔ kpe etsɔmɔ angɔ ene ebwa ŋwaʼ nè Kristo ne na etɔ̧ɔrɔ deʼ yɛ Ngwe me ndɛʼ ebe angɔ nyɛ̀rɛ̀ zèʼe ene enarataa mɔ ngɛ, ke mwɔ mbɔʼ aŋu e ma zo ega ene entara byɛ atsɛrɛ bɔ Juu ma ke ngɛ bo. Engɔ à ŋwɛʼrɛ mbɔʼ egɛnɛ mane m̀bwarambwad yɛ Ngwe ma ndɛ̀ʼ ebe abɔ byɛ e ma tsɔmɔ ene ebwa ŋwaʼ nè Kristo ngɛ.
Aŋwɛʼrɛ zɔnɔ ne hli mbɔʼ egɛnɛ, éŋwaʼa, é mwɔ ene ega ŋwaʼ mane eklinitaa bɔ kristo ene ebɛrɛtaa mane etsɔmɔ angɔ. E wa tee etaa fyɛ Paalo à me le ene ndɔngwe a Filipi ngɛ.
Aŋu e me gɛ̀bbɛ abwa efwɔ aŋwɛʼrɛ zɔnɔ ngɛ
Ato aga 1:1-11
Abwa yɛ à gli ekwa Paalo mɔmbwo ngɛ 1:12-26
Etsɔmɔ nè Kristo 1:27–2:18
Abwa a me kɛʼ shi ebe Timatyɛ mane Epafroditus ngɛ 2:19-30
E gbeʼre ato bɔ kristo mbɔʼ bɔ m̀pɛ̀ʼ mane abwa bɔɔbɔɔ 3:1–4:9
Paalo mane asɔrɔ mɔ yɛ mwɔ bɔ Filipi ngɛ 4:10-20
Angudu abwa 4:21-23
