Online Bible

Bɔ Filipi 4 - Aŋwɛʼrɛ Ebuumu Fe Nè Ngwe

Abwa é le

¹ Éngɛ bwɔngwa mbu, mbɔn be efwɔ etaa mfu, mmɛ gɛrɛ ma zɔŋɔrɔ é zɔ angɔn ngwo nɛɛ! Mbɔn ba le mmɛ ma gɛnɛ angu gɛrɛ ma fɛfi ndza mbɔʼ mbɔn ngwo nɛɛ! Ne énde bwɔngwa mbu, mbɔn me né twàʼrà angɔn ene etyê ngɔn nè Masakɛ.

² Àgho, Yuodya mane Sintiche, mmɛ buʼ ebwo endɔn kpe mbɔn tsɔmɔ ene ega ŋwaʼ na bwɔngwaaye achim Masakɛ nɔ.

³ Engwo gɛrɛ, gho azhyɛmbyɛ éŋwaʼa ngu, me wa ke kpe ngwo kpede aye bɔnɔ mbɔʼnga angɔ shi fwɛʼ ekama nè mmɛ é sɛ̀ɛrɛ̀ ekɔn ǹchwɔ̀ wunɔ, abwaʼ angɔ gɛrɛ na Klɛmɛnt, mane azhɛmbyɛ dza azê yɛ akumu angɔ mwɔ efwɔ aŋwɛʼrɛ etyê Ngwe ngɛ.

⁴ Mbɔn gɛnɛ angɔn akyɛ gimkpaʼ ene ebuumu ndzɔn nè Masakɛ, mmɛ wu hli kpe mbɔn gɛnɛ angɔn!

⁵ Mbɔn tee ezɔɔrɔ ǹchwɔ̀ ebe bɔ gimkpaʼ. Masakɛ a sa zamma é zeʼ.

⁶ Mbɔn ke nyii angɔn ene ebwa deʼ bo, bɛʼngɛ ene abwa gimkpaʼ yɛ mbɔn ma le ngɛ, mbɔn tsaʼra Ngwe gɛrɛ bii Ngwe ene ela byɛ mbɔn ma ke ngɛ ene ńtara chɛ e ma ndɛʼ ebɛrɛ ngɛ.

⁷ Mala mbɔn le éngɛ shi m̀bwarambwad Ngwe yɛ gho deʼ ne me né nɛɛ mɛ̀ɛrɛ̀ bo ngɛ ya ngo shi ńtara ntsɔn mane azhuŋu ndzɔn ene ǹchwɔ̀ ene ebuumu nè Yeso Kristo.

⁸ É ngùdù bwɔngwa mbu, mbɔn shweere ńtara ntsɔn ene abwa yɛ a mwɔ éŋwaʼa ngɛ, abwa yɛ tye bɔ ghɔ ngɛ, abwa yɛ a me ekoʼro, abwa yɛ bɔ ma kede kpe a ye pɛ ngɛ, abwa yɛ a ma le bɔ ma gɛnɛ amɔ ngɛ, abwa yɛ a me le eghɔ, abwa yɛ a me le edoʼ mane ànòŋò ngɛ.

⁹ Mbɔn le abwa yɛ mbɔn à bɛɛrɛ gɛrɛ zo ena ene aga mane eleabwa ndza ngɛ. Ma mbɔn le éngɛ shi Ngwe yɛ ma ndɛʼ m̀bwarambwad ngɛ ya ngo mwɔ nè mbɔn.

Mmɛ è bɛ̀rɛ angɔn ene etɔ̧ɔrɔ ndza

¹⁰ Mmɛ we gɛnɛ angu ghɛʼ kpe ene ebuumu ndza nè Masakɛ, mbɔn be tee ekpe mbɔn ba kɔʼɔ angu aŋu mbɔn shi tsɔmɔ endzobo shi dɔɔrɔ ngɛ. Mmɛ ke ga ngɛ kpe mbɔn à de ne waʼa angu bo, ne ga ga kpe mbɔn à ke le afwɔ é tee ezɔɔrɔ zɔnɔ bo.

¹¹ Mmɛ ke ga ngɛ kpe mbɔn be bɛʼrɛ angu bo, ene endza egha, mmɛ shi bɛɛrɛ é tsɔmɔ nè ala yɛ mmɛ me le ngɛ.

¹² Mmɛ we nɛɛ na aŋu gho ketsɛʼ ala mwɔ, gɛ̀rɛ̀ nɛɛ na aŋu gho ala mɔ mwɔ ngɛ. Mmɛ à shi bɛɛrɛ ewunɔ gɛrɛ nɛɛ ebwa wɛ e mwɔ é ga kpe gho shi nde zo, ka e mwɔ ene nchwɔrɔ ne me le ala deʼ bo ngɛ.

¹³ Mmɛ we né le abwa gimkpaʼ nyɛ̀rɛ̀ zèʼe ene ekama yɛ Kristo me ndɛʼ ena ngɛ.

¹⁴ Bɛʼngɛ à ne nara aŋu mbɔn à kpede angu endzobo ǹgoʼ ndza ngɛ.

¹⁵ Mbɔn bɔ Filipi, mbɔn be nɛɛ anchwɔnchwɔ kpe èndzobo chɛ mmɛ à nyɛn a Masedonya efwɔ enji mbèmbè byɛ mmɛ à sɛɛrɛ ekɔn ǹchwɔ̀ ngɛ, à tyetye ndɔngwe ndzɔn à kpede angu. À tye tye mbɔn byɛ mala mmɛ a ma zɔ ǹchwɔ̀ kà èbo shi mbɔn à me nɛɛ ngɛ.

¹⁶ Akyɛ akɛkɛ mmɛ a ma ke ekpede a Tesalonika ngɛ, mbɔn à saa ena.

¹⁷ Ke me ga kpe mmɛ na ke ala deʼ bo, ne ga kpe mmɛ na ke kpe e zhiiri ǹtsara ene afwɛʼ yɛ mbɔn ma fwɛʼ ngɛ.

¹⁸ Mmɛ wa ke é bɛrɛ angɔ ene ela byɛ mbɔn à ndɛʼ ena ngɛ gɛrɛ ga endɔn kpe mmɛ a shi zɔ. Epafroditus à zeʼe nè ela mɔmbwo ena, mmɛ gɛnɛ angu ngwo nɛɛ! Ela bɔnɔ gimkpaʼ ne ena na ela etɔ̧ɔrɔ Ngwe nchwɔnchwɔ nɔ, etɔ̧ɔrɔ yɛ e ma ngoʼo esɛɛ ǹchwɔ̀ engɔ gɛrɛ me bɛrɛ ngɛ.

¹⁹ Aŋu Ngwe me le àfɔ̀n mɔ ghɛʼ achim Yeso Kristo ngɛ, engɔ wa ngo ndɛʼ angɔn ela byɛ mbɔn ma ke ngɛ gimkpaʼ.

²⁰ Eghɔ kɛ́ mwɔ ebe àtɛ bɔ ene akyɛ kengudu. Ekoʼro!

Engudu atsaʼra

²¹ Mmɛ gamma ebe bɔ Ngwe gimkpaʼ awaʼa. Bɔ achim Yeso Kristo anɔ kpe mmɛ gamma endɔn.

²² Bɔ Ngwe anɔ gimkpaʼ gamma, ndanda angɔ byɛ e mwɔ a ǹtɔʼ Kaasa ngɛ.

²³ Enarataa Masakɛ Yeso Kristo mwɔ nè mbɔn bɔ gimkpaʼ. Ekoʼro

« Previous