Online Bible

Bɔ Filipi 3 - Aŋwɛʼrɛ Ebuumu Fe Nè Ngwe

Abwa yɛ a me koʼro efàarà Ngwe ngɛ

¹ É ngùdù bwɔngwa mbu, mbɔn gɛnɛ angɔn ene ebuumu ndzɔn nè Masakɛ, ka mmɛ de shi wu ga ebwa mmɛ shi dye ŋwɛʼrɛ ngɛ tsɛʼ ebwa deʼ bo. E we nara endɔn, ma mmɛ wu ga.

² Mbɔn zɔmmɔ angɔn nè abɔ byɛ e ma le abwa bɔɔbɔɔ ngɛ, e boro chɛ, abɔ byɛ e ma twàʼrà amɔ kpe é ndee bɔ ngɛ.

³ Na ntsɔ byɛ e me ndee abɔ ene éŋwaʼa ngɛ, ke mwɔ angɔ bo enga ntsɔ na ghɔ Ngwe ene azhwɛɛrɛ mɔ ma gɛnɛ abɔ ene etyê bɔ ene ebuumu bɔ nè Yeso Kristo. Ntsɔ ke shi ńtara bɔ ene abwa nyɛm ekwa bo.

⁴ Bɛʼngɛ mmɛ we le ǹji é shi etaa mfu ene abwa zɔnɔ. Mala bɔ deʼ zhuŋu kpe mbɔɔ be né shi ńtara ntsɔɔ ene abwa nyɛm ekwa, shi mmɛ à ba ye ma shi mfu etaa fɔɔ.

⁵ Â ndee angu mmɛ mwɔ ǹkyɛ̀ bi, mmɛ na gho Israel e zeʼe efwɔ ekla Bɛnjamin, mmɛ na bu ndɔ ebe bɔ Hibru. E ngɔɔ ene eshi etsɛrɛ bɔ Juu, mmɛ na gho Farisii.

⁶ Mmɛ à ne le etaa na gho Farisii nɔ ene aghɛʼ yɛ mmɛ à ma nyii a ndɔngwe é nyii bɔ kristo ngɛ. E ngɔɔ ene eleabwa yɛ â me koʼro efàarà Ngwe é ma shi etsɛrɛ ngɛ, mmɛ à ke le ǹklàŋà bo.

⁷ Bɛʼngɛ abwa zɔnɔ gimkpaʼ yɛ mmɛ à zhuŋu kpe ǹtsara deʼ à na anyi ngɛ, mmɛ à chi etaa ndza anyi ene egha Kristo.

⁸ Gɛ de ke tyetye abwa yɛ bo, abwa gimkpaʼ mmɛ à chi eta anyi ene egha abwa tsɛrɛ yɛ â me nara ena ghɛʼ, wɛ mwɔ é nɛɛ Yeso Kristo Masakɛ ngu. Mmɛ shi waʼa ela gimkpaʼ ene egha ngɔ. Mmɛ kede ela gimkpaʼ e mwɔ akɔ̀mashɛ mbɔʼtye ǹtsara ndza mwɔ Kristo.

⁹ Mmɛ we mwɔ ene ebuumu nè engɔ. Mmɛ ke wu le ebwa deʼ wɛ e me koʼro efàarà Ngwe ngɛ ene egha ndza bo. M̀pè ebwa deʼ yɛ ma zeʼe kpe gho à na shi etsɛrɛ ngɛ bo. Bɛʼngɛ angɔ mmɛ ma le ngɛ na angɔ yɛ e ma ndɛʼ à zeʼe achim ebɛrɛtaa ene Kristo ngɛ. Angɔ a me zeʼe ebe Ngwe achim ebɛrɛtaa ngɛ.

¹⁰ Ebwa mmɛ ma ke ngɛ né nɛɛ Kristo anchwɔnchwɔ gɛrɛ ma ke é zɔ aŋu ekama ngɔ ma fwɛʼ ekwa ngu ngɛ, nkirinkin aŋu Ngwe à gli ekama mɔ é zhwɛɛmɛ Kristo ene ewu aŋu engɔ à ku ngɛ. Mmɛ gɛrɛ we ndeere angu é zɔ ǹgoʼ nè engɔ mbɔʼtye mmɛ zo ega Ngwe, nkirinkin na aŋu Kristo à gɛrɛ zɔ ǹgoʼ é zo ega Ngwe ngɛ. Mmɛ gɛrɛ we doʼo é ku mbɔʼ Kristo aŋu engɔ à ku mbɔʼ mmɛ ngɛ.

¹¹ É ma zhùŋù à kɔ̀ʼ kpe e yà zhwɛɛmɛ angu ene ewu ngɔɔ efwɔ etyê.

Dɔrɔ mà twàʼrà awɛ ene ala ngwo ma ke ngɛ

¹² Mmɛ ke ma ndooro angu kpe mmɛ shi nde ebwa kà mmɛ a shi pɛ fɔɔrɔ bo. Mmɛ à wa twàʼrà angu é shi ebwa wɛ Yeso Kristo à nde egha ndza ngɛ.

¹³ Bɛʼngɛ bwɔngwa mbu, mmɛ de ke zhuŋu kpe mmɛ a shi nde ebwa bo, ebwa ŋwaʼ wɛ mmɛ ma le ngɛ ne ga kpe, mmɛ dzɛrɛ engɔ e mwɔ achim ngɛ e twaʼra angu é bwɛn ene engɔ embè ndza ngɛ.

¹⁴ Éngɛ mmɛ na dɔrɔ me nɔm aghɔɔ ndza ene ala yɛ a mwɔ embè ndza ngɛ, mbɔʼtye mmɛ nde ebwa wɛ Ngwe me zɔʼɔ angu achim Yeso Kristo ene etyê kemyɛ wɛ e mwɔ ezob ngɛ.

¹⁵ Ntsɔ bɔ gimkpaʼ byɛ ntsɔ shi tɛbɛ ene azhwɛɛrɛ Ngwe ngɛ ntsɔ le ezɔɔrɔ ŋwaʼ zɔnɔ. Bɛʼngɛ mala bɔ deʼ abwaʼ ndzɔn me le ezɔɔrɔ tsɛrɛ shi Ngwe mɔmbwo ya pɛ̀ɛrɛ̀ eto mbɔn anyi.

¹⁶ Ke e de mwɔ ene, ntsɔ fɔɔ embè é kiri ebwa wɛ ntsɔ a shi kiri é bwɛn enjitsɔ ngɛ.

¹⁷ Bwɔngwa mbu, mbɔn fɔɔ embè é kiri alo bla ndza, mbɔn tɛʼ aghɔɔ ene abɔ byɛ e ma kìrì anɛ̂ abwa ǹchwɔ̀ yɛ mbyɛɛ à tee endɔn ngɛ.

¹⁸ Mmɛ shi ga ebwa wunɔ endɔn akyɛ akɛkɛ, shi mmɛ wu ga enjitsɔ nè endɛrɛ aghɔɔ ndza, bɔ akɛkɛ ba aŋu, ezɔɔrɔ abwa angɔ ya le angɔ mwɔ bɔ m̀pɛ̀ʼ ene ewu Kristo azɔd baʼra.

¹⁹ E ba ngo tsɔŋɔ angɔ mbɔʼnga ngwe angɔ na é le andɔŋɔ ene nyɛm ekwa. Angɔ na fɛfi amɔ ene abwa yɛ angɔ a ye ma jù anyi ngɛ. Angɔ na zhuŋu tye me ela efwɔ ese zɔnɔ.

²⁰ Mwɔ ene egha bɔ, ntsɔ be nɛɛ kpe afwɔ bɔ ne ezob, e ma tɛŋɛ à kɔʼɔ ma m̀pwèerè bɔ Masakɛ Yeso Kristo é kla zeʼe ezob.

²¹ Engɔ wa ngo kobo nyɛm ekwa zɔnɔ ntsɔ me le e me la ma ku nɔ, e ndɛʼ ebe bɔ me engɔ yɛ è mwɔ ne engɔ mane enɛŋɛrɛkɛ nɔ. Engɔ wa ngo gli ekama yɛ engɔ me le ngɛ é buumu ela gimkpaʼ enji mɔ.

« Previous