Online Bible

Bɔ Filipi 2 - Aŋwɛʼrɛ Ebuumu Fe Nè Ngwe

É bwaara ekwa na Kristo nɔ

¹ Etsɔmɔ ndzɔn eblabwo Kristo ya le mbɔn kam, edoʼ ngɔ gɛrɛ bɔŋɔ angɔn. Mbɔn be le ebuumu nè azhwɛɛrɛ Ngwe é ma le ǹchwɔ̀ gɛrɛ ma klasɔn ene abɔ abê.

² Mmɛ buʼ ebwo endɔn kpe, mbɔn le angu mmɛ mɛɛrɛ gɛnɛ angu aŋu ntsɔ me le ezhuŋu ŋwaʼ mane edoʼ ŋwaʼ, ńtara mane ezhuŋu abwa bɔ me koʼokoʼo ngɛ.

³ Mbɔn ke le ebwa deʼ ene awɛɛ kà ene aghɛʼ deʼ é fɛfi bo, bɛʼngɛ mbɔn bwaara akwa ndzɔn mbɔrɔmbɔn, è ma kede abɔ abê kpe ebe fɔɔ angɔn.

⁴ Mbɔn zhuŋu mbɔʼ abɔ abê akyɛ gimkpaʼ, mbɔn ke sa zhuŋu tye ma mbɔʼ mbɔn bo.

⁵ Ezɔɔrɔ le abwa ndzɔn mwɔ ne engɔ Yeso Kristo à me mwɔ ngɛ.

⁶ Engɔ à ne le ezɔɔrɔ Ngwe akyɛ gimkpaʼ, bɛʼngɛ engɔ à ke zhuŋu kpe mbè le kpe mbè we ne me koʼokoʼo nè Ngwe bo.

⁷ Bɛʼngɛ ene edoʼ mɔ engɔ à saara ela byɛ engɔ à me le ngɛ è nu ezɔɔrɔ gho afwɛʼ. Â be engɔ è me nu ezɔɔrɔ gho.

⁸ Engɔ à bwaara ekwa mɔ, è zhiri aghɛʼnji zo ebwa karadidi bwɛn anji ewu, ka de mwɔ ewu edɔm azɔd baʼra.

⁹ Ne ǹji yɛ Ngwe à beʼre engɔ ekere fɔɔ efwɔ gimkpaʼ gɛrɛ ndɛʼ ekumu wɛ e me fɔɔ akumu gimkpaʼ ebe engɔ ngɛ.

¹⁰ Mbɔʼtye ene ekumu Yeso ela gimkpaʼ ezob, a chwâ mane angɔ enji chwâ ngɛ gunu etongu amɔ efàarà Yeso.

¹¹ Angɔ bɔ gimkpaʼ ba bɔ̀nɔ̀ kpe Yeso Kristo na Masakɛ, e ndɛʼ eghɔ ebe Ngwe àtɛ.

E ma pɛ̀ na ekɛʼ efwɔ ese nɔ

¹² Éngɛ nɔ, asɔrɔ ndza, aŋu mbɔn à ma zhuru ega ngu èndzobo chɛ mmɛ à mwɔ nè mbɔn ngɛ, e we nara kpe mbɔn shi mɛ̀ɛrɛ zhuru angu aŋu mmɛ me tsɛʼ nè mbɔn bo ngɛ. Mbɔn fɔɔ embè é fwɛʼ ene ebum ene Ngwe ma bwaara akwa ndzɔn ebe Ngwe mbɔʼtye mbɔn mɛɛrɛ è le epweere ndzɔn.

¹³ Enga Ngwe ya fwɛʼ akwa ndzɔn akyɛ gimkpaʼ é le kpe mbɔn me doʼo é le gɛrɛ me né zhuru abwa yɛ engɔ ma ke ngɛ.

¹⁴ Mbɔn fwɛʼ abwa gimkpaʼ ne ma kùmù kà fɛ̀ɛrɛ bo,

¹⁵ mbɔʼtye mbɔn mwɔ bɔ byɛ e ne me nɛɛ ebwa bɔɔbɔɔ deʼ bo, gɛ̀rɛ̀ me pɛ na bwɔ nchwɔnchwɔ Ngwe byɛ e ma tsɔmɔ efwɔ ese bidi nè bɔ bɔɔbɔɔ nɔ. E we nara mbɔn pɛ abwaʼ angɔ na ńtɔrɔta ma pɛ ezob nɔ,

¹⁶ aŋu mbɔn ma ndɛʼ ekɔn etyê ebe angɔ ngɛ. Mala mbɔn le engɛ̂, shi mmɛ wa ngo me le ǹji é fɛfi ndza mbɔʼ mbɔn anji yɛ Kristo ma wu zeʼe ngɛ mbɔʼnga e wa ngo tee apɛpɛ kpe ekɔnɔshin mane afwɛʼ ndza ke fɔɔ bli bo.

¹⁷ Ngadeʼ e ba ngo zhudu angu, ewu ndza ya ngo mwɔ na ala etɔ̧ɔrɔ yɛ e me ndɛʼ ebe Ngwe ngɛ nɔ. Ewunɔ wa ngo le ebɛrɛtaa ndzɔn ene Kristo me kama. Nyɛrɛ zeʼe ngɛ, mbɔn shi ndɛʼ akwa ndzɔn mɛɛrɛ ebe Ngwe é ma le ebwa wɛ engɔ ma ke ngɛ. Nkirinkin na aŋu àtɛ zhiri ma ndɛʼ etɔ̧ɔrɔ ebe Ngwe ngɛ. Na aŋu mmɛ shi ndɛʼ ekwa ngu gimkpaʼ ebe Ngwe ene ebuumu nè mbɔn ngɛ, ka e de ma ke é zhudu angu, mmɛ wa gɛnɛ angu, mbɔʼnga mmɛ shi ndɛʼ ekwa ngu gimkpaʼ ebe Ngwe, mbɔn gɛrɛ shi ndɛʼ akwa ndzɔn gimkpaʼ ebe Ngwe.

¹⁸ Nkirinkin mbɔn gɛnɛ angɔn gɛrɛ ma gɛnɛ angɔn nè mmɛ.

Timatyɛ mane Epafroditus

¹⁹ Ma Ngwe bɛrɛ, mmɛ wa zhuŋu é tɔm Timatyɛ endɔn afwɔ mpiʼ, mbɔʼtye ebwa wɛ engɔ ma ga ena mbɔʼ mbɔn ngɛ ma ngo twàʼrà angu.

²⁰ À tye Timatyɛ wunɔ zhiʼ me nɛɛ etaa mfu gɛrɛ ma zhuŋu ǹchwɔ̀ mbɔʼ mbɔn.

²¹ Abɔ abê gimkpaʼ na zhuŋu tye ma âmɔ̀ abwa, ne mwɔ ebwa mbɔʼ Yeso Kristo bo.

²² Mbɔn mɔmbwo be nɛɛ na aŋu Timatyɛ shi tee epɔb mɔ endɔn ngɛ, gɛ̀rɛ̀ nɛɛ na aŋu mmɛ nè ngɔ mbyɛɛ shi fwɛʼɛ afwɔbi na ŋwɔ mane àtɛ nɔ mbɔʼ ekɔn ǹchwɔ̀ wunɔ.

²³ Éngɛ mmɛ wa zhuŋu é tɔm engɔ endɔn afwɔ mpiʼ, aŋu mmɛ ma zɔ na aŋu abwa ma ngo mwɔ abɛɛ ndza ngɛ.

²⁴ Mmɛ we bɛrɛ nè Masakɛ kpe mmɛ mɔmbwo wa zamma zeʼe endɔn.

²⁵ Mmɛ shi zhuŋu kpe e we nara é tɔm ghongwa bɔ Epafroditus endɔn, engɔ shi fwɛʼ gɛrɛ twàʼrà amɔ nè mmɛ na ghontɔm ngɔn nɔ é kpèdè angu.

²⁶ Engɔ wa kidi é zɔ angɔn, etaa ngɔ shi me diri mbɔʼnga mbɔn à zo kpe engɔ à na gwɔn.

²⁷ Éŋwaʼaŋwâʼ engɔ à na gwɔn e fwɛ ewu, bɛʼngɛ Ngwe à klasɔn ene engɔ, ke tye ene engɔ bo gɛrɛ mane mmɛ é chi sɔn kamakam ekwa ngu.

²⁸ Mmɛ gɛrɛ na kidi é tɔm engɔ endɔn mbɔʼtye mbɔn me gɛnɛ angɔn e wu zɔ engɔ, sɔn ntsa gɛrɛ ma ngo sòdò.

²⁹ Mbɔn nu engɔ ene egɛnɛ na ghongwa achim Masakɛ Yeso Kristo nɔ. Mbɔn ghɔ m̀pèrè bɔ na angɔ nɔ,

³⁰ mbɔʼnga engɔ à fwɛʼ, e fwɛ ewu mbɔʼ afwɛʼ Kristo, è ndɛʼ angu ekpede yɛ mbɔn mbwo â ne me né ndɛʼ bo ngɛ.

« Previous