Online Bible

Bɔ Efɛsɔs 5 - Aŋwɛʼrɛ Ebuumu Fe Nè Ngwe

Bɔ kristo tsɔmɔ efwɔ ekɛʼ

¹ Aŋu mbɔn mwɔ bwɔ Ngwe byɛ engɔ me doʼo ghɛʼ ngɛ, mbɔn a da tsɔmɔ ne engɔ nɔ.

² Mbɔn sa tsɔmɔ ene edoʼ, nkirinkin na Yeso à doʼo abɔ ndɛʼ ekwa mɔ ato bɔ, na ala etɔ̧ɔrɔ yɛ à mwɔ etɔ̧ɔrɔ yɛ e ma le Ngwe gɛnɛ amɔ ngɛ.

³ Aŋu mbɔn mwɔ bɔ Ngwe ngɛ, e ke me nara kpe e sɛrɛ abwa deʼ abwaʼ ndzɔn mbɔʼ endese kà emo ala kà eleabwa ḿfiri bo.

⁴ E gɛ de ke koʼro endɔn é ma ga aga atii mane aga ǹtsara atii bo. Ankɔmɔ éngɛ mbɔn ndɛʼ ebɛrɛ ebe Ngwe.

⁵ Mbɔn ba shi nɛ̀ɛ kpe tsɛʼ gho deʼ wɛ e ma nde ese, kà gà abwa ḿfiri, kà e ma mò ala ngɛ, ma yà nyii efwɔ ebwa m̀fɔ̀ Kristo mane Ngwe bo. M̀pè gho zɔnɔ yà ne le ala yɛ Ngwe me tɔ̧ɔrɔ é ndɛʼ ebe bɔ mɔ ngɛ bo.

⁶ Mbɔn ke le gho deʼ ndooro angɔn ene ega atii bo, mbɔʼnga na m̀pèrè abwa tsɔnɔ à ma le Ngwe bɔɔ etaa ekwa abɔ byɛ e ne ma zo engɔ bo ngɛ.

⁷ Éngɛ mbɔn ke le ebwa deʼ é le nè m̀pèrè bɔ tsɔnɔ bo ka mpiʼ.

⁸ Mbɔn mɔ à gɛrɛ ne efwɔ ǹklì ambèmbè, enjitsɔ wɛ mbɔn shi bɔ Masakɛ ngɛ, mbɔn shi ne ekɛʼ nɔ. Éngɛ mbɔn sa tsɔmɔ na bɔ efwɔ ekɛʼ nɔ.

⁹ Abɔ byɛ e mwɔ efwɔ ekɛʼ ngɛ na le ǹchwɔ̀, ma le abwa yɛ a me koʼro ngɛ gɛrɛ ma ga éŋwaʼa.

¹⁰ Mbɔn nɛɛ abwa yɛ à ma le Masakɛ ma gɛnɛ amɔ ngɛ.

¹¹ Mbɔn ke le ebwa deʼ é le nè abɔ byɛ e mwɔ efwɔ ǹklì, ka e ma le abwa ketsɛʼ ǹji ngɛ bo. Ankɔmɔ engɛ̂, mbɔn tee kpe abwa yɛ ke nara bo.

¹² Ne ebwa ju é sɛrɛ abwa yɛ bɔ kenɛɛ Ngwe ma fwɛʼ efwɔ kɔ ngɛ.

¹³ Èndzobo chɛ abwa zɔnɔ gli apɛpɛ ngɛ, bɔ shi nɛ̀ɛ aŋu ebwa wɛ mwɔ ngɛ.

¹⁴ Ela byɛ e mwɔ apɛpɛ ngɛ ne mwɔ ne ekɛʼ nɔ. Ne ǹji yɛ aŋwɛʼrɛ Ngwe me ga kpe “Àfuumu m̀bwɛrɛ, tam ekere! Ke mwɔ na gho ku nɔ bo. Shi ekɛʼ Yeso pɛ ekwa ngwɛ.”

¹⁵ Éngɛ mbɔn zɔmmɔ angɔn aŋu mbɔn ma tsɔmɔ ngɛ. Mbɔn ke tsɔmɔ na bɔ atii nɔ bo, bɛʼngɛ mbɔn tsɔmɔ na bɔ azɔm nɔ.

¹⁶ Afwɔ gli é le ebwa ǹchwɔ̀, mbɔn le mbɔʼnga enji bɔnɔ ne enji bɔɔbɔɔ.

¹⁷ Mbɔn ke mwɔ ejiŋi bɔ bo, bɛʼngɛ mbɔn nɛɛ ǹji ene abwa yɛ Masakɛ ma ke kpe mbɔn fwɛʼ ngɛ.

¹⁸ Mbɔn ke ŋwɔ mɔm e bere angɔn bo, mbɔʼnga è ma ngo tsɔŋɔ angɔn. Ankɔmɔ éngɛ mbɔn ba le shi azhwɛɛrɛ Ngwe shweere angɔn akyɛ gimkpaʼ.

¹⁹ Mbɔn sa kwɔrɔ atsa yɛ a me gli efwɔ aŋwɛʼrɛ Ngwe ngɛ, mbɔn kwɔrɔ atsa yɛ mbɔn bɔ gimkpaʼ me nɛɛ ngɛ, mbɔn kwɔrɔ atsa yɛ azhwɛɛrɛ Ngwe ma ndɛʼ endɔn ngɛ, mbɔn gɛrɛ sa kwɔrɔ atsa efwɔ aŋwɛʼrɛ Ngwe yɛ a me zeʼe efwɔ ńtara ntsɔn ngɛ é ghɔ Masakɛ.

²⁰ Ene ekumu Masakɛ bɔ Yeso Kristo, mbɔn sa ndɛʼ ebɛrɛ akyɛ gimkpaʼ ene ela gimkpaʼ ebe Ngwe àtɛ bo.

Paalo tɛ̂ʼ Âyeanɔm mane ânɔmaye

²¹ Mbɔn bwaara angɔn mbɔrɔmbɔn mbɔʼ eghɔ ndzɔn ebe Kristo

²² Âyeanɔm, mbɔn bwaara angɔn ebe ânɔm mbɔn nkirinkin na mbɔn me bwaara angɔn ebe Masakɛ nɔ,

²³ mbɔʼnga anɔm na ato ebe âye amɔ nkirinkin na Kristo mwɔ ato ebe ndɔngwe nɔ. Kristo mɔmbwo à ndɛʼ ekwa mɔ é pwèerè ndɔngwe yɛ è mwɔ ne ekwa ngɔ nɔ.

²⁴ Aŋu ndɔngwe me bwaara amɔ enji Kristo ngɛ, nkirinkin âyeanɔm bwaara amɔ ene abwa gimkpaʼ enji ânɔm amɔ.

²⁵ Ânɔmaye mbɔn doʼ âye mbɔn nkirinkin aŋu Kristo à doʼo ndɔngwe è ndɛʼ ekwa mɔ mbɔʼ engɔ nɔ.

²⁶ Engɔ à le énde mbɔʼtye ndɔngwe me pɛ. Engɔ à gli ndim mane ega mɔ é le ndɔngwe me pɛ.

²⁷ Engɔ à le énde é le kpe eshunu bɔ Ngwe me nara me tsɛʼ anɛ̂ mfiri deʼ anyi bo. Engɔ a gɛrɛ le énde mbɔʼtye e ne le ebwa bɔɔbɔɔ deʼ mbɔʼ ndɔngwe bo, ankɔmɔ éngɛ angɔ me pɛ me tsɛʼ ebwa deʼ é ke angɔ anyi bo.

²⁸ Nkirinkin na afwɔ ndzɔn anɔmaye mbɔn doʼ eye mbɔn na aŋu mbɔn me doʼo akwa ndzɔn ngɛ. Anɔm wɛ me doʼ eye mɔ ngɛ we doʼ ekwa mɔ mɔmbwo.

²⁹ Tsɛ̀ʼ gho deʼ me né gwè ekwa mɔ bo. E ba na ndèe nkirinkin na Yeso à ma le ene ndɔngwe yɛ mwɔ ekwa ngɔ ngɛ nɔ.

³⁰ Ntsɔ na aklo ene ekwa ngɔ.

³¹ Aŋu aŋwɛʼrɛ Ngwe me ga kpe, “Ene ǹji zɔnɔ anɔm wa sàarà àtɛ mane áʼɔ̧̀ mɔ buumu àmɔ̀ nè eye mɔ, angɔ bɔ fyee shi ma gho ŋwaʼ.”

³² E ke me zàmma ebe bɔ é nɛɛ éŋwaʼa wɛ è me nɛŋɛ efwɔ ebwa wunɔ ngɛ bo. Abwa zɔnɔ na ga mbɔʼ Yeso Kristo mane eshunu bɔ Ngwe.

³³ Bɛʼngɛ e gɛrɛ ne ga ndɛʼ endɔn, anɔmaye ŋwàʼaŋwàʼ doʼ eye mɔ ne è me doʼ ekwa mɔ nɔ, ayeanɔm ŋwàʼaŋwàʼ gɛrɛ ndɛʼ eghɔ ebe enɔm mɔ.

« Previous