Online Bible

Bɔ Efɛsɔs 4 - Aŋwɛʼrɛ Ebuumu Fe Nè Ngwe

Bɔ Ngwe be ene ebuumu nè Kristo

¹ Mmɛ Paalo, wɛ ma ghodzɔm mbɔʼnga mmɛ ma fwɛʼ ebe Masakɛ ngɛ, buʼ ebwo endɔn kpe mbɔn sa tsɔmɔ ene ezɔɔrɔ yɛ e me nara ngɛ é tee kpe na Ngwe a me zɔʼ angɔn.

² Mbɔn sa bwaara akwa ndzɔn ne ma ghɔnɔ bo. Mbɔn le eklinitaa sa todo angɔn mbɔrɔmbɔn ene edoʼ.

³ Mbɔn twaʼra angɔn ene eghɛʼ gimkpaʼ é le kpe mbɔn tsɔmɔ ene ebwa ŋwaʼ ene m̀bwarambwad yɛ azhwɛɛrɛ pɛ me buumu angɔn é mwɔ gho ŋwaʼ ngɛ.

⁴ Ntsɔ ne le nyɛmekwa ŋwaʼ mane azhwɛɛrɛ ŋwaʼ nkirinkin na aŋu ntsɔ me le ezhuŋu kɔʼɔ ŋwaʼ yɛ Ngwe à shi tɔ̧ɔrɔ èndzobo chɛ engɔ à zɔʼ angɔn ngɛ.

⁵ Ntsɔ ne le Masakɛ ŋwaʼ, ebɛrɛtaa ŋwaʼ mane enu ndim ŋwaʼ.

⁶ Ntsɔ be le Ngwe ŋwaʼ yɛ mwɔ Àtɛ ebe bɔ gimkpaʼ, mwɔ Masakɛ ebe bɔ gimkpaʼ, yɛ è ma le ntsɔ fwɛʼ ela gimkpaʼ gɛrɛ tsɔmɔ efwɔ akwa bɔ ntsɔ bɔ gimkpaʼ ene azhwɛɛrɛ.

⁷ Bɛʼngɛ Kristo à shi gɛ̀bbɛ enarataa mɔ ebe gho ŋwàʼaŋwàʼ ene aghɛʼnji yɛ à me koʼro ebe engɔ ngɛ.

⁸ Ne ǹji yɛ aŋwɛʼrɛ Ngwe me ga kpe “Èndzobo chɛ engɔ à kwaʼ ngɔ̀ɔ ekere ngɛ, à ngɔɔ nè ebaŋabɔ dzɔm gɛrɛ ndɛʼ ela ebe bɔ mɔ.”

⁹ Enjitsɔ e be ŋwɛʼrɛ kpe, “Engɔ à ngɔ̀ɔ ekere” ne ga kpe ayɛ? E ne tee kpe engɔ à shi dye mwɔ a chwâ anɔ.

¹⁰ Engɔ wɛ à kla ngɔ̀ɔ a chwâ ngɛ gɛrɛ ne eŋwàʼ wɛ à kwaʼ ngɔ̀ɔ ezob ngɛ, mbɔʼtye engɔ me né le abwa gimkpaʼ mɛ̀ɛrɛ̀.

¹¹ Engɔ à ndɛʼ atɔ̧ɔrɔ ebe bɔ kpe e sa fwɛʼ anyi, engɔ à le adeʼ mwɔ bèmpwɔnɔntɔm, adeʼ bàmɛnɛkɔn Ngwe, adeʼ ma zhìn à sɛ̀ɛrɛ̀ ekɔn ǹchwɔ̀, adeʼ ma gbèe bɔ kristo, adeʼ gɛrɛ ma tee abwa.

¹² Â ne le atɔ̧ɔrɔ zɔnɔ kpe bɔ kristo ndeere akwa àmɔ̀ é fwɛʼ afwɛʼ Ngwe, é le eshunu bɔ kristo me tsɔmɔ ene ekama,

¹³ bwɛn èndzobo chɛ ntsɔ ma ngo tsɔmɔ ene ega ŋwaʼ ene ebɛrɛtaa mane ebwa wɛ ntsɔ me nɛɛ mbɔʼ ŋwɔ Ngwe ngɛ. Mala ntsɔ le énde, shi ntsɔ ba mwɔ bɔ bere gɛrɛ mwɔ na kristo nɔ.

¹⁴ Éngɛ ntsɔ ke ma wu mwɔ na adɔ̀kpara byɛ bɔ andɔɔ ma sa firi abɔ efwɔ andɔɔ ntsɔ sa bɛ̀rɛbɛrɛ ngɛ bo, kà na azɔd zɔ à ma gòdò à ngɔ̀ɔ ene abɛɛ yɛ efùu ma ngɔɔ ngɛ bo.

¹⁵ Ankɔmɔ éngɛ ntsɔ ba ngo sa ga éŋwaʼa ene edoʼ ma tee edoʼ ebe bɔ gimkpaʼ gɛrɛ tɛb ene eghɛʼ gimkpaʼ na Kristo wɛ è mwɔ ato ene ekwa mɔ nɔ.

¹⁶ Kristo à shi buumu bɔ mɔ gimkpaʼ afwɔ ŋwaʼ na aŋu aklo ekwa me buumu amɔ é le ekwa ŋwaʼ nɔ. Eklo ekwa ŋwaʼaŋwaʼ na fwɛʼ èmɔ eklo afwɛʼ ene edoʼ é le kpe ekwa gimkpaʼ ma tɛ̀bɛ gɛrɛ ma kama.

Etsɔmɔ fe efwɔ Kristo

¹⁷ Enjitsɔ mmɛ ga endɔn gɛrɛ wu hli ene ekumu Masakɛ kpe, mbɔn ke sa wa tsɔmɔ na bɔ byɛ e ne me nɛɛ Ngwe ngɛ bo, ma le abwa atii yɛ a ne me né ekpede angɔ ngɛ bo.

¹⁸ Ńtara angɔ à ne le ǹchù, angɔ ke le etyê wɛ Ngwe à ma ndɛʼ ngɛ bo mbɔʼnga angɔ à ke nɛɛ ebwa deʼ mbɔʼ Ngwe bo gɛrɛ shi kaama ńtara àmɔ̀.

¹⁹ Angɔ na de ma le abwa bɔɔbɔɔ, e ke ma ju bo, shi ndɛʼ akwa amɔ ene ela nyɛmekwa mane abwa tsɛrɛ yɛ a ne me pɛ bo ngɛ.

²⁰ Bɛʼngɛ endɔn, ke mwɔ abwa yɛ mbɔn à bɛɛrɛ mbɔʼ Kristo ngɛ aye ngɛ bo.

²¹ Eŋwàʼ ŋwaʼ mbɔn à shi zo mbɔʼ engɔ, e gɛrɛ shi tee éŋwaʼa wɛ e mwɔ efwɔ Yeso ngɛ endɔn na bɔ e ma kìrì engɔ nɔ.

²² Â shi tee endɔn kpe mbɔn waʼ abwa bɔɔbɔɔ yɛ mbɔn a ma le ngɛ, eghɛʼnji sam byɛ mbɔn à ma tsɔmɔ, yɛ à ma ndooro angɔn é le ma abwa yɛ nyɛmekwa à ma ke ngɛ.

²³ Â gɛrɛ tee angɔn kpe mbɔn le Ngwe kobo ńtara ntsɔn mbɔʼtye mbɔn le ezhuŋu fe.

²⁴ A gɛrɛ tee angɔn kpe mbɔn klada é mwɔ na bɔ fe nɔ, na aŋu Ngwe à me ke kpe mbɔn mwɔ ngɛ, éngɛ ga kpe eleabwa ndzɔn me koʼro mbɔn gɛrɛ me pɛ efàarà Ngwe.

²⁵ Enyɛrɛ éngɛ, mbɔn waʼ andɔɔ sa ga ma éŋwaʼa abwaʼ ndzɔn, mbɔʼnga ntsɔ bɔ gimkpaʼ na gho ŋwaʼ ene ekwa Kristo.

²⁶ Mala eboo mfyɛ kwaʼ, e ke le kpe ngwo le ebwa bɔɔbɔɔ bo, ke shi eboo fyɛ e ko bo.

²⁷ Eboo fa ndɛʼ afwɔ ebe asatan é nyii efwɔ ekwa ngwɛ.

²⁸ Abɔ byɛ e ma ji ngɛ ke wu ji bo, ankɔmɔ engɛ̂, angɔ fwɛʼ ene ebwo àmɔ̀ mɔmbwo ene éŋwaʼa mbɔʼtye angɔ le ala deʼ ene egha amɔ gɛrɛ le adeʼ è kpede bɔ ndzaŋa.

²⁹ Mbɔn ke sa chi aga bɔɔbɔɔ aklo ndzɔn bo, bɛʼngɛ mbɔn sa ga abwa yɛ à ma le ebɛrɛtaa bɔ ma tɛ̀bɛ gɛrɛ ga abwa yɛ a ma le abɔ byɛ e ma zhuru endɔn ngɛ ma kama.

³⁰ Gɛrɛ ke le azhwɛɛrɛ Ngwe sa jù bo. Nɛɛ kpe engɔ na anɛ̂ Ngwe akwa ndzɔn é kɔʼɔ èndzobo chɛ engɔ ma ngo zɔn eto mbɔn ngɛ.

³¹ Mbɔn waʼ abwa gimkpaʼ yɛ à ma le ńtara ntsɔn ma twa ngɛ, mbɔn ke le emboro ntsɔn ma kwaʼ bo, mbɔn ke sa zhwɔ̀ bo, mbɔn ke sa nde akɔɔ ato abɔ tsɛrɛ bo mane abwa tsɛrɛ yɛ a me bɔɔ ngɛ.

³² Ankɔmɔ éngɛ mbɔn sa le ǹchwɔ̀ ekwa abɔ be, mbɔn sa tee eklasɔn gɛrɛ dzɛ̀d anyimabwa gho wè na aŋu Ngwe à dzɛd andzɔn abwa bɔɔbɔɔ nyɛ̀rɛ̀ zèʼe achim Kristo ngɛ.

« Previous