Online Bible

Bɔ Efɛsɔs 3 - Aŋwɛʼrɛ Ebuumu Fe Nè Ngwe

Afwɛʼ yɛ Paalo à fwɛʼ ebe ebɛbɔ ngɛ

¹ Ene ǹji zɔnɔ, mmɛ Paalo ghodzɔm mbɔʼ Yeso Kristo mmɛ à tsaʼra Ngwe ene egha ndzɔn, mbɔn ebɛbɔ.

² Éŋwaʼa mbɔn shi zɔ kpe Ngwe, nyɛ̀rɛ̀ zèʼe ene enarataa mɔ shi ndɛʼ afwɛʼ zɔnɔ ena é fwɛʼ ene ǹchwɔ̀ ndzɔn.

³ Ngwe à le abwa nɛŋɛnɛŋɛ ngɔ gli apɛpɛ gɛrɛ le mmɛ nɛɛ. Mmɛ shi ŋwɛʼrɛ mbɔʼ abwa zɔnɔ ene antiri.

⁴ Mala mbɔn ma ngo zɔʼrɔ abwa yɛ mmɛ me ŋwɛʼrɛ ngɛ, shi mbɔn ba ngo bɛrɛ gɛrɛ nɛ̀ɛ ǹji ene abwa nɛŋɛ Kristo.

⁵ Ngwe à ke le abwa zɔnɔ a gli apɛpɛ ebe ekyɛ bɔ mbèmbè bo. Bɛʼngɛ engɔ shi gli azhwɛɛrɛ mɔ é tee apɛpɛ ebe bèmpwɔnɔntɔm pɛ mane bàmɛnɛkɔn pɛ mɔ.

⁶ Ebwa nɛŋɛ wunɔ ne ga kpe, enyɛrɛ zeʼ achim ega Ngwe, ebɛbɔ mane bɔ Juu ba bùumu àmɔ̀ é gɛ̀bbɛ̀ m̀bɔ̀nɔ yɛ Ngwe à tɔ̧ɔrɔ ebe bɔ mɔ ngɛ. Angɔ na aklo ene ekwa ŋwaʼ, gɛ̀rɛ̀ me le eklo ene etɔ̧ɔrɔ yɛ Ngwe à shi kɛʼɛ nyɛ̀rɛ̀ zèʼe achim Yeso Kristo ngɛ.

⁷ Enyɛrɛ zeʼe ene enarataa Ngwe mane ekama ngɔ, mmɛ shi ma gho afwɛʼ é sɛ̀ɛrɛ̀ ega Ngwe.

⁸ Ka de mwɔ̀ aŋu mmɛ à me kpɛɛ fɔɔ bɔ Ngwe byɛ e me tɛŋɛ kpɛɛ ngɛ, Ngwe ndɛʼ enarataa zɔnɔ ena é sɛ̀ɛrɛ̀ ekɔn ǹchwɔ̀ ebe ebɛbɔ mbɔʼ àfɔ̀n Kristo wɛ e ne ma ngo ngùdù bo ngɛ.

⁹ Ngwe yɛ me ndeere ela gimkpaʼ efwɔ ese ngɛ, à chi angu é tòʼrò ebe bɔ gimkpaʼ mbɔʼ abwa nɛŋɛ zɔnɔ apɛpɛ, yɛ engɔ à shi nɛŋɛ ebe bɔ efwɔ ekyɛ mbèmbè ngɛ.

¹⁰ Ezhuŋu Ngwe à ne ga kpe è wa ngo tee azɔm mɔ ene eghɛʼnji gimkpaʼ nyɛrɛ zeʼ ene eshunu bɔ Ngwe ebe eto mane ekama yɛ e mwɔ ekere ngɛ.

¹¹ Ngwe à fwɛʼ ebwa wunɔ nyɛrɛ zeʼ ene ekɛʼ kengudu yɛ engɔ à shi le nyɛrɛ zeʼ ene ebwa wɛ Yeso Kristo Masakɛ bɔ à shi le ngɛ.

¹² Ene ebuumu bɔ nè Kristo gɛrɛ nyɛrɛ zeʼ ene ebɛrɛtaa yɛ ntsɔ me le ene engɔ ngɛ, ntsɔ ba ngɔɔ efàarà Ngwe nè egere.

¹³ Éngɛ mmɛ buʼ ebwo endɔn kpe mbɔn twaʼra angɔn mbɔʼnga mmɛ na zɔ ǹgoʼ egha ndzɔn. Ǹtsara gimkpaʼ ne endzɔn.

Paalo tsaʼra Ngwe ene bɔ abɛ Efɛsɔs

¹⁴ Ne ǹji yɛ mmɛ ma gunu etongu mbu a chwâ efàarà àtɛ ngu ngɛ.

¹⁵ Engɔ ne egho wɛ è me ndɛʼ ekumu éŋwaʼa mɔmbwo ebe ekla ŋwaʼaŋwaʼ ekere mane a chwâ ngɛ.

¹⁶ Aŋu àfɔ̀n Ngwe me ghɛʼ ngɛ, mmɛ wa tsàʼrà Ngwe kpe nyɛ̀rɛ̀ zèʼe ene ekama azhwɛɛrɛ mɔ, è we ne le mbɔn klini etaa.

¹⁷ Mmɛ gɛrɛ wa tsàʼrà Ngwe egha tsɛrɛ kpe nyɛ̀rɛ̀ zèʼe ene ebɛrɛtaa ndzɔn ene Yeso Kristo ngɛ, azhwɛɛrɛ ngɔ tsɔmɔ efwɔ ńtara ntsɔn. Mala e gli éngɛ, shi mbɔn ba ngo mwɔ na azɔd yɛ egha mɔ me nyii a chwâ kɛ ngɛ, gɛ̀rɛ̀ mwɔ na ndɔ yɛ e me chi etiri ngɔ anchwɔnchwɔ ngɛ.

¹⁸ Mmɛ wa tsàʼrà Ngwe kpe mbɔn mane bɔ Ngwe gimkpaʼ me le azɔm é nɛɛ aŋu Ngwe me le edoʼ ene ntsɔ ngɛ. Edoʼ ngɔ ke le engudu bo.

¹⁹ Mmɛ gɛrɛ wa tsàʼrà Ngwe kpe ka gho deʼ ne me nɛɛ aŋu edoʼ Kristo mwɔ ngɛ bo, Ngwe le mbɔn nɛɛ. Mmɛ na tsàʼrà Ngwe énde mbɔʼtye eleabwa ndzɔn mwɔ ne engɔ Ngwe nɔ.

²⁰ Enjitsɔ ghɔ engɔ wɛ è me né fwɛʼ abwa gimkpaʼ fɔɔ abwa angɔ yɛ ntsɔ ma biiri kà zhuŋu ngɛ, nyɛrɛ zeʼ ene ekama ngɔ yɛ e ma fwɛʼ akwâ bɔ ngɛ.

²¹ Ezodo kɛ́ mwɔ ene ekumu ngɔ ene abwa yɛ engɔ ma fwɛʼ abwaʼ abɔ byɛ e mwɔ efwɔ ndɔngwe ngɛ gɛrɛ nyɛ̀rɛ̀ zèʼe achim abwa yɛ Kristo shi fwɛʼ ngɛ akyɛ gimkpaʼ ngo bwɛn ene endzobo kengudu! Ekoʼro.

« Previous