Online Bible

Bɔ Efɛsɔs 2 - Aŋwɛʼrɛ Ebuumu Fe Nè Ngwe

¹ À ne èjɛ̂ deʼ, mbɔn mwɔ na bɔ kudu nɔ mbɔʼnga mbɔn a ma le abwa yɛ Ngwe à ne me doʼo bo ngɛ ene kèzobwa mane abwa bɔɔbɔɔ ndzɔn.

² Èndzobo chɛ mbɔn à na kìrì ma aghɛʼnji bɔɔbɔɔ efwɔ ese, mbɔn ma zo me ebe eto ebe ezhwɛɛrɛ kamakam efwɔ efɔɔ, azɔnɔ à na azhwɛɛrɛ yɛ à ma fwɛʼ akwa abɔ byɛ e ne ma fwɛʼ abwa yɛ Ngwe ma ke ngɛ bo.

³ Éŋwaʼaŋwâʼ ntsɔ ne mwɔ na angɔ nɔ, gɛ̀rɛ̀ ma tsɔmɔ ene ezɔɔrɔ yɛ akwa bɔ ma ke ngɛ, ma fwɛʼ ma abwa yɛ a me koʼro akwa bɔ mane azhuŋu bɔ ngɛ, ene ezɔɔrɔ zɔnɔ ntsɔ ma le Ngwe ma bɔɔ etaa. Engɔ gɛrɛ wa ge enyii akwa bɔ na aŋu è ma ge enyii ekwa abɔ abê ngɛ.

⁴ Bɛʼngɛ eklasɔn Ngwe ye ghɛʼ da dɛʼɛ, edoʼ ngɔ ene bɔ gɛrɛ me ghɛʼ tsa.

⁵ Aŋu ntsɔ mwɔ na bɔ kudu da abwa bɔɔbɔɔ bɔ ngɛ, engɔ shi zhwɛɛmɛ abɔ nè Kristo. Ene enarataa Ngwe a shi pwèerè angɔn.

⁶ Enyɛrɛ zeʼe ene ebuumu bɔ nè Yeso Kristo, Ngwe à zhwɛɛmɛ abɔ nè engɔ é mwɔ nè engɔ ekere.

⁷ Ngwe à le énde é tee enarataa mɔ ebe bɔ nyɛ̀rɛ̀ zèʼe achim Yeso, aŋu engɔ me kama ngɛ, mbɔʼtye à shi endzobo deʼ, e zeʼe nɔ bɔ zɔ aŋu enarataa ngɔ me ghɛʼ gɛrɛ mwɔ efwɔ ela gimkpaʼ ngɛ.

⁸ Ne enarataa Ngwe à pwèerè angɔn nyɛ̀rɛ̀ zèʼe ene ebɛrɛtaa ndzɔn ene Kristo, ke mwɔ abwa yɛ mbɔn me le ngɛ a me le abwa zɔnɔ a gli bo, ne etɔ̧ɔrɔ Ngwe.

⁹ Ke mwɔ abwa yɛ mbɔn shi fwɛʼ ngɛ a me le e pweere angɔn, tye gho deʼ le ǹji é sa fɛfi mɔ bo.

¹⁰ Ngwe à shi ndèerè abɔ aŋu ntsɔ mwɔ ngɛ. Engɔ à ndèerè abɔ é mwɔ na Yeso Kristo nɔ. Engɔ à shi kɛʼɛ egha tsɛrɛ é le kpe ntsɔ sa tsɔmɔ ene ezɔɔrɔ zɔnɔ, ndèerè abɔ é sa tsɔmɔ ene abwa ǹchwɔ̀ yɛ engɔ à shi dye le ebe bɔ é sa fwɛʼ ngɛ.

É mwɔ ene ebwa ŋwaʼ nè Kristo

¹¹ Mbɔn ebɛbɔ, mbɔn ke dzɛrɛ m̀pèrè bɔ chɛ mbɔn à me dye mwɔ ngɛ bo. Bɔ Juu byɛ e ma zɔʼrɔ àmɔ̀ kpe a shi ndee angɔɔ ma zɔʼrɔ àgɔn kpe bɔ kèndèe akwa ngɛ, bɛʼngɛ é ndèe akwa zɔnɔ ne ene nyɛm ekwa, à ma le ma gho.

¹² Mbɔn wu zhuŋu kpe à ne èndzobo chɛ mbɔn à ke me ene ebwa ŋwaʼ nè Kristo bo. Mbɔn à na àgɔn, gɛrɛ me tsɛʼ abwaʼ abɔ byɛ Ngwe à me chi ngɛ bo, gɛ̀rɛ̀ ne me le afwɔ deʼ efwɔ atsɛrɛ Ngwe yɛ a me mwɔ mbɔʼ atɔ̧ɔrɔ Ngwe ebe bɔ mɔ ngɛ bo. Aŋu mbɔn à ma tsɔmɔ efwɔ ese ngɛ, mbɔn à ke me le ezhuŋu kɔʼɔ bo gɛrɛ ne me nɛɛ Ngwe bo.

¹³ Bɛʼngɛ enjitsɔ ewu yɛ Yeso Kristo à ku edɔm azɔd baʼra nyɛ̀rɛ̀ zèʼe ene anɔm mɔ yɛ à tu ato ndzɔn ngɛ, â shi le mbɔn zeʼ ebara Ngwe.

¹⁴ Enga Kristo mɔmbwo à shi ndɛʼ m̀bwarambwad ebe bɔ, è le bɔ Juu mane ebɛbɔ mwɔ bɔ ŋwaʼ ngɛ. Ene anɔm mɔ engɔ à munu eba ndɔ wɛ à me sɛ̀ʼrɛ angɔn gɛrɛ me le angɔn mbɔn mwɔ bɔ m̀pɛ̀ʼ ngɛ.

¹⁵ Engɔ à nyiimi etsɛrɛ bɔ Juu ene atɛʼɛ mɔ é le kpe akla fyee zɔnɔ firi shi ekla fe ŋwaʼ ene ebuumu nè engɔ. Ene aghɛʼ zɔnɔ engɔ ma le m̀bwarambwad.

¹⁶ Enyɛrɛ zeʼ ene ewu ngɔ azɔd baʼra, Kristo à nyiimi m̀pɛ̀ʼ angɔ, nyɛ̀rɛ̀ zeʼ ene azɔd baʼra, engɔ bùumu akla zɔnɔ a mwɔ ekla ŋwaʼ gɛrɛ wu nu angɔ zeʼ achim ebe Ngwe

¹⁷ Éngɛ Yeso à zeʼ gɛrɛ sɛ̀ɛrɛ̀ ekɔn ǹchwɔ̀ mbɔʼ m̀bwarambwad ebe bɔ gimkpaʼ, endɔn ebɛbɔ byɛ â mwɔ ezhin dɔɔdɔɔ ebe Ngwe mane bɔ Juu byɛ â mwɔ ebara engɔ ngɛ.

¹⁸ Ne nyɛrɛ zeʼ achim Kristo wɛ mbɔn bɔ gimkpaʼ, bɔ Juu mane ebɛbɔ ma zeʼ efàarà Àtɛ. Na azhwɛɛrɛ pɛ ŋwaʼ yɛ a shi kpede abɔ é le engɛ̂.

¹⁹ Éngɛ mbɔn ebɛbɔ ke wu bli ma àgɔn kà bɔ ezhin dɔɔdɔɔ bo, mbɔn shi enjitsɔ ma bɔ abɛ ŋwaʼ mane bɔ Ngwe gɛrɛ shi bɔ ekla Ngwe.

²⁰ Éngɛ mbɔn gɛrɛ ne mwɔ na eku byɛ e ma byɛ ndɔrɔ anyi wɛ e me zhiiri ene etirindɔ, etirindɔ yɛ me mwɔ na bèmpwɔnɔntɔm mane bàmɛnɛkɔn Ngwe nɔ, etyê ndɔʼndɔ mwɔ Yeso mɔmbwo ngɛ.

²¹ Ne engɔ Kristo wɛ me klini ndɔ gimkpaʼ afwɔbi ma le ndɔ ma tɛ̀bɛ é mwɔ ndɔngwe kɛ́ yɛ e me pɛ, e me chi shi me ebe Masakɛ ngɛ.

²² Ene ebuumu nè engɔ, mbɔn shi buumu angɔn na bɔ kristo nɔ afwɔ ŋwaʼ. Aŋu mbɔn mwɔ ene ega ŋwaʼ ngɛ, mbɔn ne mwɔ na ndɔ yɛ Ngwe ma mwɔ efwɔ nɔ. Ngwe na azhwɛɛrɛ.

« Previous