Online Bible

2 Bɔ Tɛsalonika 3 - Aŋwɛʼrɛ Ebuumu Fe Nè Ngwe

Paalo bii kpe e tsàʼrà Ngwe eto mbɔɔ

¹ Bwɔngwaanɔm mane bwɔngwaaye mbyɛɛ, mbɔn tsaʼra Ngwe ato njɛɛ kpe ega Masakɛ tɛb gɛrɛ sɛ̀ʼ abwaʼ abɔ tsɛrɛ shi bɔ nu ene eghɔ, nkirinkin na aŋu à mwɔ abwaʼ ndzɔn ngɛ.

² Mbɔn gɛrɛ tsàʼrà Ngwe kpe Ngwe chi angbɛɛ eblabwo bɔ ǹchù mane bɔ bɔɔbɔɔ enga ke mwɔ bɔ gimkpaʼ byɛ e ma zo ekɔn mɔmbwo ngɛ ma bɛ̀rɛ ekɔn wunɔ bo.

³ Bɛʼngɛ Masakɛ wa fwɛʼ aŋu engɔ shi ga ngɛ. Engɔ wa ngo twàʼrà angɔn, kɔʼ angɔn mbɔʼtye asatan ne fwɛʼ ebwa bɔɔbɔɔ deʼ ekwa ngɔn bo.

⁴ Mbyɛɛ be le ebɛrɛ ene mbɔn kpe, mbɔn ba le gɛrɛ ma ngɔɔ embè é le abwa yɛ mbyɛɛ ga endɔn ngɛ.

⁵ Masakɛ bɔ le mbɔn nɛɛ aŋu Ngwe me doʼo angɔn ngɛ gɛrɛ le mbɔn klini etaa ene aghɛʼ ŋwaʼ yɛ engɔ Masakɛ à klini etaa ngɛ.

Paalo ga kpe bɔ be koʼro é fwɛ̀ʼɛ

⁶ Asɔrɔ njɛɛ, mbyɛɛ ga endɔn ene ekumu Masakɛ bɔ Yeso Kristo kpe, mbɔn ke tsɔmɔ afwɔbi nè bɔ werenji mane abɔ byɛ e ne me doʼo é kiri abwa yɛ mbyɛɛ à tee ebe angɔ ngɛ bo.

⁷ Mbɔn mbwo be nɛɛ anchwɔnchwɔ kpe mbɔn be koʼro é le ma abwa yɛ mbyɛɛ ma tee ngɛ. Èndzobo chɛ mbyɛɛ à mwɔ nè mbɔn ngɛ, mbyɛɛ à ke ma le ewerenji bo.

⁸ Mbyɛɛ à ke ma nu ala gho deʼ tɔrɔ ke nɛ̀rɛ̀ bo. Mbyɛɛ à ba na fwɛʼ ǹklì mane nchi mbɔʼtye mbyɛɛ ne sa nyii gho deʼ abwaʼ ndzɔn bo.

⁹ Mbyɛɛ à ke ma le énde ngɛ mbɔʼnga à ne mwɔ afwɔ njɛɛ é ga endɔn kpe mbɔn ndɛʼ ala endyɛɛ bo bo. Mbyɛɛ à le éngɛ kpe mbɔn zɔ sa kìrì.

¹⁰ Èndzobo chɛ mbyɛɛ à mwɔ nè mbɔn ngɛ, mbyɛɛ à na doʼo à ga endɔn kpe, “Gho deʼ wɛ ne fwɛʼ bo ngɛ ka nde.”

¹¹ Mbyɛɛ à ga énde mbɔʼnga mbyɛɛ zo kpe abɔ deʼ abwaʼ ndzɔn ba le ewerenji ne ma fwɛʼ ala deʼ bo, à tye é zhiri à pànà abwa abɔ tsɛrɛ.

¹² Ene ekumu Masakɛ bɔ Yeso Kristo, mbyɛɛ ga ebe abɔ bɔnɔ gbeʼre eto angɔ kpe angɔ sa tsɔmɔ à fwɛʼ mbɔʼtye angɔ le ala deʼ é nde.

¹³ Bɛʼngɛ bwɔngwa, mbɔn ke bwad é le ǹchwɔ̀ bo.

¹⁴ Mbɔn nu azɔm ene abɔ byɛ e ne ma shi abwa yɛ mbyɛɛ à ŋwɛʼrɛ sàa endɔn ngɛ bo. Mbɔn ke le ebwa deʼ é le nè angɔ bo mbɔʼtye eju bere angɔ.

¹⁵ Mbɔn ke nu angɔ na bɔ m̀pɛ̀ʼ nɔ bo, bɛʼngɛ mbɔn gbeʼre eto angɔ na bɔ kristo nɔ.

Aga ngudu

¹⁶ Masakɛ wɛ m̀bwarambwad ma zeʼe ebe engɔ ngɛ ndɛʼ m̀bwarambwad endɔn akyɛ gimkpaʼ ene eghɛʼ gimkpaʼ. Masakɛ mwɔ nè mbɔn bɔ gimkpaʼ.

¹⁷ Mmɛ Paalo a me ŋwɛʼrɛ aŋwɛʼrɛ zɔnɔ ene abwo ndza mɔmbwo. Na anɛ̂ ene eŋwɛʼrɛ mbu gimkpaʼ. Mmɛ ne ŋwɛʼrɛ eŋwɛʼrɛ mbu gimkpaʼ énde.

¹⁸ Enarataa Masakɛ bɔ Yeso Kristo mwɔ nè mbɔn bɔ gimkpaʼ.