Online Bible

2 Bɔ Tɛsalonika 2 - Aŋwɛʼrɛ Ebuumu Fe Nè Ngwe

Gho bɔɔbɔɔ wa zeʼe

¹ Asɔrɔ ndza enjitsɔ mmɛ wa ke ga endɔn aŋu Masakɛ Yeso Kristo ma zeʼe mane aŋu ntsɔ ma ngo shunu abɔ nè engɔ ngɛ. Mmɛ buʼ ebwo endɔn

² kpe e ke zamma buguru eto mbɔn kà mbɔn sa kidi aŋu e ma ga kpe anji Masakɛ shi zeʼe ngɛ bo. Ngadeʼ bɔ na zhuŋu kpe mbyɛɛ à ga abwa zɔnɔ èndzobo chɛ mbyɛɛ à ma ga abwa yɛ azhwɛɛrɛ à gbee angbɛɛ é ga, kà èndzobo chɛ mbyɛɛ à ma sɛ̀ɛrɛ̀ ega Ngwe ngɛ, kà kpe mbyɛɛ à ŋwɛʼrɛ efwɔ eŋwɛʼrɛ saa endɔn. Bɛʼngɛ mbyɛɛ à ke le éngɛ bo.

³ Mbɔn ke le kpe gho deʼ ndooro angɔn bo, ka de mwɔ ene aghɛʼ ze. Anji zɔnɔ yà ne zeʼe bwɛn èndzobo chɛ bɔ kèzobwa ma dye zeʼe, abɔ e ne ma shi atsɛrɛ bo ngɛ gli apɛpɛ, angɔ byɛ â shi shi kpe e ba ngɔɔ edzɔwu ngɛ.

⁴ Engɔ wa ngo tɔn ela byɛ bɔ ma zɔʼrɔ kpe na ngwere ngɛ mbɔʼtye engɔ nu afwɔ mɔ efwɔ ndɔngwe kɛ̀ sa ga kpe mbè na Ngwe.

⁵ Mbɔn ke wu zhuŋu kpe mmɛ à ga abwa zɔnɔ endɔn èndzobo chɛ mmɛ à mwɔ nè mbɔn ngɛ bo?

⁶ Mbɔn be nɛɛ ala yɛ a me kɔrɔ ebwa wunɔ é gli ngɛ. Endzobo yɛ e me koʼro ngɛ ya dye zeʼ, gho ǹchù wa ngo gli apɛpɛ.

⁷ Amyɛnɛ abwa ǹchù a sa nu afwɔ enjitsɔ. Bɛʼngɛ ebwa e ma ngo gli ngɛ wa ke enjitsɔ gli, bwɛn èndzobo chɛ Ngwe ma chi egho wɛ me kɔrɔ ebwa wunɔ é gli ngɛ.

⁸ Éngɛ e ba ngo zɔ gho ǹchù. Èndzobo chɛ Masakɛ Yeso zeʼ ngɛ, engɔ wa zhudu egho wunɔ ene azhuʼ mɔ gɛrɛ tsɔŋɔ engɔ ene enɛŋɛrɛ mɔ.

⁹ Gho ǹchù wa ngo zeʼ ene ekama asatan sa le anɛ̂ abwa andɔɔ mane abwa zodo zodo andɔɔ.

¹⁰ Engɔ wa ngo ga m̀pèrè andɔɔ gimkpaʼ ebe abɔ byɛ e ma anji é nyim ngɛ. Abɔ bɔnɔ yà nyim mbɔʼnga angɔ à tɔn é bɛrɛ éŋwaʼa tye e pweere angɔ bo.

¹¹ Éngɛ Ngwe ndɛʼ ekama ebe angɔ é le ezhuŋu andɔɔ mbɔʼtye angɔ bɛrɛ ebwa wa mwɔ andɔɔ ngɛ.

¹² Enɛrɛ ebe abɔ byɛ e ne bɛrɛ ene éŋwaʼa bo ma gɛnɛ amɔ me ene é le ma abwa bɔɔbɔɔ ngɛ yà zɔ ǹgoʼ.

Ngwe à chi kpe é pwèerè angɔn

¹³ Bwɔngwa mbyɛɛ, mbyɛɛ ba ndɛ̀ʼ ebɛrɛ ebe Ngwe akyɛ gimkpaʼ mbɔʼ mbɔn byɛ Masakɛ me doʼo ngɛ. Ngwe à chi angɔn na bɔ mbèmbè é pwèerè ene ekama azhwɛɛrɛ nɔ. Engɔ à le énde mbɔʼtye ngɛ nyɛ̀rɛ̀ zèʼe ene ebɛrɛtaa yɛ mbɔn à me le ene éŋwaʼa ngɛ, mbɔn mwɔ bɔ byɛ e me pɛ ngɛ.

¹⁴ Ngwe à zɔʼ angɔn nyɛ̀rɛ̀ zèʼe ene ekɔn ǹchwɔ̀ wɛ mbyɛɛ à sɛɛrɛ endɔn ngɛ. Engɔ à zɔʼ angɔn kpe mbɔn zeʼ nu engɔn eklo ene enɛŋɛrɛkɛ Masakɛ bɔ Yeso Kristo.

¹⁵ Bwɔngwaanɔm mane bwɔngwaaye mbyɛɛ, enyɛrɛ ngɛ mbɔn klini abwa éŋwaʼa yɛ mbyɛɛ à nu gɛrɛ ndɛ̀ʼ kà ŋwɛʼrɛ endɔn ngɛ ene ekama.

¹⁶ Enjitsɔ Masakɛ bɔ Yeso Kristo mane Ngwe àtɛ bɔ wɛ à me doʼo abɔ ngɛ, nyɛ̀rɛ̀ zèʼe ene enarataa mɔ le ntsɔ sa twàʼrà abɔ gɛrɛ ndɛʼ ezhuŋu kɔʼɔ ebe bɔ ene abwa gimkpaʼ.

¹⁷ Ngwe twaʼra angɔn gɛrɛ ndɛʼ ekama endɔn é le gɛrɛ ga ebwa wɛ e me nara ngɛ.

« Previous