Pɔɔlo Kɛlata mɔɔ ɔhɛlɛle ɔhɔmanle Felepaema la INTRO1 - BAEBOLO ANZƐƐ BULUKU NWUANZANWUANZAMukenye Pɔɔlo kɛlata ne mɔɔ ɔhɛlɛle ɔhɔmanle Felepaema la, ɔhɛlɛle ɔhɔmanle ɔdaye Pɔɔlo ye asɔne ne mɔɔ ɔlumuale ɔdele wɔ Abolokyi azɛlɛ zo, wɔ Wulomu maanzinli ne mɔɔ bɛfɛlɛ ye Masidonea la anu amra. Mekɛ mɔɔ ɛzoanvolɛ ne kɛlɛ kɛlata ɛhye la, ɛnee ɔla efiade, na eza ye adwenle ɛzɛkye na ɔlɛdi nyane wɔ Kelaese ɛdoavolɛma bie mɔɔ nee ye ɛnli na bɛlɛ ngilehilelɛ ɛtane bɛlɛkilehile Felepae asɔnema ne la anwo. Noko eza kɛlata ne kile anyelielɛ nee adwenle nlane mɔɔ Pɔɔlo lɛ ye, na kyesɛ ɔdaye ye diedi kpole ne mɔɔ wɔ Gyisɛse Kelaese anu la angome na ahola nu kile la. Debie mɔɔ yemɔti Pɔɔlo hɛlɛle kɛlata ne la a le kɛ, ɔkulo kɛ ɔyɛ Felepae Keleseɛnema ne mɔ mo somaa wɔ ninyɛne mɔɔ bɛvale bɛrahyɛle ye wɔ mekɛ mɔɔ ɛnee yehyia kpole la anwo. Ɔluale ɛhye azo ɔzile bɛ ahonle, amaa bɛanyia akɛnrasesebɛ nee adwenle nlane wɔ ye nee bɛ amaneɛnwunlɛ nwo. Ɔzɛlɛle bɛ kɛ bɛzukoa Kelaese bɛtɛɛyɛlɛ ne, na bɛye adubɛnwo nee anyebolo wɔ bɛ ɛbɛlabɔlɛ nu. Ɔhakyele bɛ kɛ bɛ ɛbɛlabɔlɛ ne mɔɔ Kelaese ati bɛlɛbɔ la le Nyamenle ɛlolɛ ahyɛlɛdeɛ mɔɔ bɛlua diedi zo a bɛnyia ye a, na tɛ kɛ asɛɛ bɛlile Dwuuma mɛla ne azo na bɛyɛle mɔɔ mɛla ne se la ati ɔ. Ɔhɛlɛle kɛ ɔsi mɔɔ bɛdabɛ mɔɔ bɛ nee Kelaese lua la anye die la, nee anzonudwolɛ mɔɔ Nyamenle fa maa bɛ la anwo edwɛkɛ. Debie mɔɔ bɛfa ye kɛlata ɛhye anwo la a le anyelielɛ, adwenle nlane, koyɛlɛ nee mɔdenlebɔlɛ wɔ Kelaese ɛdoavolɛma diedi nee ɛbɛlabɔlɛ nu la dawua ɛzilɛ. Eza ɔkile kɛ Pɔɔlo si kulo Felepae asɔne ne la. Mɔɔ wɔ nu la Ngilenu 1.1-11 Pɔɔlo gyinlabelɛ 1.12-26 Ɛbɛlabɔlɛ wɔ Kelaese ati 1.27—2.18 Temɔte nee Ɛpafulodaetɛse anwo ngyehyɛlɛ 2.19-30 Agbɔvolɛ nee munzule nwo kɔkɔbɔlɛ 3.1—4.9 Pɔɔlo nee ɔ gɔnwo mɔ Felepaema 4.10-20 Adwulaleɛ 4.21-23 |
Bible in Nzema © Bible Society of Ghana, 1998.
Bible Society of Ghana