Pɔɔlo Kɛlata mɔɔ ɔhɛlɛle ɔhɔmanle Felepaema la 2 - BAEBOLO ANZƐƐ BULUKU NWUANZANWUANZA

Kelaese bɛtɛɛyɛlɛ nee ye kpoleyɛlɛ

¹ Bɛdie Kelaese bɛdi la ati bɛ nwo yɛ se. Ye ɛhulolɛ ne kyekye bɛ rɛle. Sunsum ne maa bɛdi ahua, ɔmaa bɛyɛ atiakunlukɛnlɛma bɛmaa bɛ nwo ngoko ngoko, na bɛse bɛ nwo anwunvɔne.

² Akee mesɛlɛ bɛ kɛ bɛhye bɛ nwo file, bɛnyia adwenle ko, bɛhulo bɛ nwo ngoko ngoko na bɛmaa me fɛlɛkolilɛ ne ɛli munli.

³ Bɛmmayɛ debie biala angomedi nu anzɛɛ adubɛnwo nu; dahuu bɛva anwoazehanlɛ bɛbu bɛ gɔnwo mɔ bɛdɛla bɛ nwo bɔbɔ.

⁴ Awie biala mmadwenle ɔ ngomekye ye boɛyɛlɛ nwo, na ɔdwenle ɔ gɔnwo mɔ noko ɛdeɛ nwo.

⁵ Bɛmaa zɛhae subane ne mɔɔ ɛnee Kelaese Gyisɛse lɛ la ɛvinde bɛ ɛbɛla nu.

⁶ Yemɔ bɔbɔ mɔɔ ɔ nee Nyamenle bɛ su le ko la, yeandwenle nwo yeampele kɛ ɔ nee Nyamenle kɛzɛ.

⁷ Ɔkpɔlale ɔ kunlu ɔyɛle ɔ nwo akɛlɛ na bɛwole ye kɛ sonla biala la, Ɔrale kɛ ɔle sonla,

⁸ ɔbɛlɛle ɔ nwo aze ɔyɛle tieyɛ ɔhɔle ewule nu, na ɔwule meanubaka zo bɔbɔ.

⁹ Ɔlua zo Nyamenle ɛkpogya ye zo na yemaa ye duma fofolɛ mɔɔ tɛla aluma muala.

¹⁰ Ɛhye ati, anwuma nee aze nee ɛbolɔ amra amuala bahoto Gyisɛse na bɛali ye duma ne eni,

¹¹ na awie biala aha ye baguase kɛ, Gyisɛse Kelaese le Awulae, bɛava bɛawula Nyamenle Selɛ ne anyunlunyia.

Bɛda kɛ bɛle ewiade ahɛnlaneɛ

¹² Zɔhane ati ayi mɔ, kɛmɔ bɛlile me edwɛkɛ zo wɔ mekɛ mɔɔ ɛnee me nee bɛ de la, ɔhyia ɛsesebɛ kɛ akee bɛkɛyɛ ye zɔhane kɛkala mɔɔ me nee bɛ ɛnde la. Bɛva ɛzulolɛ nee anwowozolɛ bɛli bɛ ngoanelielɛ ne anwo gyima bɛhɔ awieleɛ,

¹³ ɔluakɛ Nyamenle ɛlɛdi gyima wɔ bɛ nu dahuu, amaa bɛanyia ɛhulolɛ na bɛahola bɛayɛ mɔɔ ɔkpondɛ la.

¹⁴ Bɛmmatendɛ bɛ nzo abo na bɛsu kpolera wɔ bɛ debie biala ɛyɛlɛ nu,

¹⁵ amaa awie annwu nvonleɛ biala wɔ bɛ nwo anzɛɛ anzu bɛ nɔhalɛlilɛ nwo kpolera kɛ bɛle Nyamenle amra mɔɔ evinli fee ɛnle bɛ nwo, wɔ adalɛ nee ɛtane ewiade ye anu a. Saa bɛwɔ bɛ avinli a bɛda kɛ bɛmɛ a bɛle ewiade ahɛnlaneɛ a,

¹⁶ na bɛzɔ ngoane edwɛkɛ ne anu boɛ, amaa Kenle mɔɔ Kelaese kɛra la meanyia bie meadu me nwo kɛ meanzu ɛnriandilɛ ne mgbane anzɛɛ meanyɛ me gyima ne mgbane.

¹⁷ Saa bɔbɔ ɔba ye kɛ bɛfa me mogya bɛaye ɛdɛne bɛagua bɛ diedi azubɔlɛ zo bɛamaa Nyamenle a, anrɛɛ me nye die nwolɛ kpole na me nee bɛ di fɛlɛko.

¹⁸ Zɔhane ala yɛɛ ɔwɔ kɛ bɛdabɛ noko bɛ nye die na bɛ nee me di fɛlɛko a.

Temɔte nee Ɛpafulodaetɛse

¹⁹ Me nye la kɛ saa ɔyɛ Awulae Gyisɛse ɛhulolɛ a ɔnrɛhyɛ biala na meazoa Temɔte wɔ bɛ nwo lɔ, amaa meade bɛ nganeɛ na me nye alie.

²⁰ Menlɛ awie mɔɔ kɛdwenle bɛ nwo kpalɛ kɛ medame la, kyesɛ Temɔte ala, yɛɛ yemɔ noko ala a kɛdwenle bɛ nwo a.

²¹ Bɛdabɛ mɔɔ bɛha la biala ɛlɛbɔ ye ɛbɛla mɔɔ hyia ye la, na yegyakyi mɔɔ Gyisɛse Kelaese kpondɛ kɛ ɔyɛ la.

²² Bɛdabɛ bɛze Temɔte bolɛ mɔɔ sonle a. Bɛze gyima kpalɛ mɔɔ ɔyɛle ɔ nwo kɛ ralɛ na ɔ nee me yɛlile wɔ Edwɛkpa ne anwo a.

²³ Yemɔ yɛɛ me nye la kɛ saa menyia menwu kɛ ninyɛne ɛlɛsi ahɔ ye wɔ ɛke la a ɛnee menwɔzoa ye wɔ bɛ nwo lɔ a.

²⁴ Me rɛle wɔ Awulae anu kɛ ɔnrɛhyɛ biala na medame mumua ne meara bɛ nwo lɔ.

²⁵ Medwenle nwo kɛ eza ɔwɔ kɛ mesoa adiema Ɛpafulodaetɛse noko wɔ bɛ nwo nehane, ɔ nee me a yɛdi gyima ye a, yɛɛ yegyinla me nzi yeho kpalɛ kɛ me gɔnwo sogyanli, eza yezonle na yeboa me kɛ ɔle bɛ soanvolɛ wɔ mekɛ mɔɔ mengɔle ɛhyianlɛ nu la.

²⁶ Ɔ nwo ɛlɛdɔ bɛ muala, na ɔlɛdi nyane kɛ bɛdele ye anwonyane nganeɛ a.

²⁷ Nɔhalɛ, ɔwule ɔwiele. Na Nyamenle a ɛnwu ye anwunvɔne a, na tɛ yemɔ a yenwu ye anwunvɔne a na mame bɔbɔ ɔ, anrɛɛ me nyanelilɛ ne kɛbo zolɛ.

²⁸ Zɔhane ati, memaa yeazia yeara bɛ nwo lɔ bieko ndɛndɛ, amaa bɛnwu ye a bɛ nye alie na medame noko meapɛ me adwenleadwenle ne azo.

²⁹ Bɛva fɛlɛkolilɛ bɛlie ye kɛ bɛ diema wɔ Awulae ati. Bɛli menli mɔɔ le kɛ ɔdaye la eni,

³⁰ ɔboalekɛ Kelaese gyima ne yɛɛ bɛ moalɛ mɔɔ ɔlua me ti ɔliele kɛ ɔfa yearɛlɛ me la ati a ɔvale ye ngoane ɔdole nzeleba a.