ᐱᓕᐱᔭᓇ 4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᑈᓪ ᑲ ᐃᑕᑦ ᐊᓂᔭᔪᐛ ᑲ ᑕᑈᑎᒥᔨᒋ ᒐ ᐊᑲ ᒋ ᒥᑯᔅᑲᑕᔨᑎᒥᔨᒋ Philippians 4.1-9 (Proper-23 Year A)

¹ ᐊᑯ ᒪᒃ ᓂᐧᑲᓂᓯᑐᒄ, ᒋᔨᐛᐤ ᓇᔅᒡ ᑲ ᓴᒋᐃᑎᑯᒡ, ᒧᔅ ᑲ ᒺᔅᑕᑎᑎᑯᒡ᙮ ᓄᐅᒡ ᒋᒥᔽᔨᑎᒥᐃᓇᐛᐤ ᑭᔭ ᒋ ᒪᒥᒋᐃᓇᐛᐤ ᒐᒋ ᑎᐸᒋᒥᑎᑯᒡ᙮ ᐊᐅᒄ ᐅ ᑲ ᐃᓯ ᐊᔨᒧᑎᒪᑎᑯᒡ ᐊ ᓂᑐᐛᔨᒥᑎᑯᒡ ᒐᒋ ᐊᔨᒋᑲᐳᐅᔭᒄ ᐊ ᑕᑈᔭᔨᒪᒄ ᐅᑎᐸᔨᒋᒐᐤ᙮

² ᓂ ᐱᑯᓴᔨᒪᐅᒡ ᐊᓐᒡ ᐃᔎᐅᒡ ᔪᐅᑎᔭ ᑭᔭ ᓯᓐᑎᑭ ᒐᒋ ᓂᓇᐃᑐᐛᒡ ᐅᑎᐸᔨᒋᒐᐛ ᐊᑲ ᒪᒥᒋᐱᔨᑐᒡ᙮

³ ᓂᐎᒐᐛᑭᓐ ᒧᔅ ᑯᐃᔅᒄ ᑲᒋ ᐃᑎᔨᓐ ᐊ ᐎᒋ ᐊᑐᔅᒐᒥᑕᓐ ᒋ ᐱᑯᓴᔨᒥᑎᓐ ᒐᒋ ᐎᒋᐃᑥᐤ ᐅᒡ ᐃᔎᐅᒡ ᒐᒋ ᐳᓂᒡ ᐊ ᒥᒋᐱᔨᑐᒡ᙮ ᐛᔅ ᑕᐱᔅᑯᓐ ᒋ ᒥᔅᑎ ᐊᑐᔅᒐᐅᒡ ᐊ ᐎᒋᐃᒡ ᐊ ᐛᐎᑎᒧᒡ ᒥᔽᒋᒧᐅᓂᔪᐤ᙮ ᑭᔭ ᑯᓚᒪᓐᑦ ᑭᔭ ᐊᓐᒡ ᑯᑎᑭᒡ ᑲ ᐎᒋ ᐊᑐᔅᒐᒥᒡ, ᐅᑦ ᐃᓯᓂᐧᑲᓱᐅᓄᐛᐛ ᑲ ᒥᓯᓇᑕᔨᒋ ᒋᓴᒪᓂᑐᐛ ᐅᐱᒪᑎᓯᐅ ᒥᓯᓇᐃᑭᓂᔨᒡ ᒐᒋ ᐊᔭᒡ ᑲᒋᒡ ᐱᒪᑎᓯᐅᓂᔪᐤ ᓂᒋ ᐎᒋᐃᑯᐅᒡ᙮

Philippians 4.4-7 (Advent-3 Year C)

⁴ ᒧᔅ ᒥᔽᔨᑎᒧᒄ ᐊ ᑕᑈᔭᔨᒪᒄ ᐅᑎᐸᔨᒋᒐᐤ᙮ ᒥᓐ ᒪᒃ ᒋᑦ ᐃᑎᓇᐛᐤ, “ᒥᔽᔨᑎᒧᒄ !”

⁵ ᐃᓯ ᐱᒪᑎᓯᒄ ᒥᓯᐛ ᐊᐛᓐᒋ ᒐᒋ ᒋᔅᒐᔨᒥᑕᑯᒡ ᐊᔅᐱᔅ ᒥᔪᑥᐛᒄ᙮ ᓴᔅ ᐸᓱᓇᑯᓂᔪᐤ ᒐ ᐃᔅᐱᔅ ᑎᑯᓯᐧᒃ ᐅᑎᐸᔨᒋᒐᐤ᙮

⁶ ᐊᑲᐎᔾ ᒐᒂᓐ ᒋᑭ ᐅᒋ ᒥᑯᔅᑲᑕᔨᑎᒥᐃᑯᐅᓇᐛᐤ᙮ ᐃᔭᐱᒡ ᒥᓯᐛ ᑕᓐ ᒐ ᐊᑎ ᐃᔅᐱᔪᐛᒂ ᐊᔭᒥᐊᒄ, ᐊ ᐛᐎᑎᒧᐛᒄ ᒋᓴᒪᓂᑐᐤ ᒐᒂᔪᐤ ᐊ ᐃᓯ ᓂᑐᐛᔨᑎᒧᐛᒄ᙮ ᑭᔭ ᒋᐸ ᓂᓇᔅᑯᒪᐛᐤ᙮

⁷ ᐊᑯ ᒪᒃ ᒋᓴᒪᓂᑐᐤ ᒐ ᒥᔨᑕᒄ ᒋᔭᒪᔨᑎᒧᐅᓂᔪᐤ ᒐ ᐊᑲ ᒋ ᐊᔨᒪᔨᑎᒥᔅᑲᑯᐛᒄ ᒐᒂᔪᐤ ᒋᒥᑐᓇᔨᒋᑭᓄᐛᐛᒡ ᒪᒃ ᒋᑕᐃᐛᐛᒡ ᐊᓂᔭᔪᐤ ᐊ ᑕᑈᔭᔨᒪᒄ ᙭ ᒋᓴᔅ᙮ ᐊᐅᒄ ᐅ ᒋᔭᒪᔨᑎᒧᐅᓐ ᑲ ᐊᔨᒧᑕᒡ ᓇᒪ ᓇᔅᒡ ᒋ ᓂᔅᑐᑕᑭᓄᐤ ᑕᓐ ᐊᔅᐱᔅ ᒥᔽᔨᑕᒂᒡ᙮

⁸ ᓂᐧᑲᓂᓯᑐᒄ, ᐊᔅᒄ ᐊᑲ ᒋᔅᑕᔭᓐ ᐊ ᒥᓯᓇᐊᒪᑎᑯᒡ, ᐸᐃᒄ ᒥᓐ ᒐᒂᓐ ᒋᑭ ᐎᑎᒪᑎᓇᐛᐤ, ᓱᒃ ᒧᓯᓇᐤ ᒪᒥᑐᓇᔨᑎᒧᒄ ᐊᓂᔭᔪᐛ ᒐᒂᔪᐛ ᑲ ᒥᔽᓯᔨᒋ, ᐊᓂᔭᔪᐛ ᑲ ᒪᒥᒋᐃᐛᒋ, ᒧᔭᒻ ᒐᒂᓐ ᐊ ᑯᐃᔅᑯᓇᒂᒡ, ᒐᒂᓐ ᐊ ᒋᔅᑕᔨᑕᒂᒡ, ᑭᔭ ᑯᐃᔅᒄ ᐃᑐᐅᓐ, ᐸᔭᒋ ᐱᒪᑎᓯᐅᓐ, ᒐᒂᓐ ᐊ ᓇᐊᔨᑎᒥᐃᐛᒡ ᑭᔭ ᒐᒂᓐ ᐊ ᒥᔪ ᐛᐎᑕᑭᓄᐅᒡ᙮

⁹ ᒋᐸ ᑐᑕᓇᐛᐤ ᐊᓐ ᑲ ᐃᓯ ᒋᔅᑯᑎᒪᑎᑯᒡ ᑭᔭ ᐊᓐ ᑲ ᐃᓯ ᐛᐱᒥᔭᒄ ᐊ ᐃᑕᑎᓯᔭᓐ᙮ ᐊᑯ ᒪᒃ ᒋᓴᒪᓂᑐᐤ ᐊᓐ ᑲ ᒥᔨᑕᒄ ᒋᔭᒪᔨᑎᒧᐅᓂᔪᐤ ᒋᑭ ᐎᒐᐅᑯᐛᓇᐛᐤ᙮

ᑈᓪ ᑲ ᓂᓇᔅᑯᒧᑦ ᑕᓐ ᑲ ᐃᓯ ᐎᒋᐊᑭᓄᐅᑦ

¹⁰ ᓇᔅᒡ ᑕᑈ ᓂ ᒥᔽᔨᑎᒥᐃᒄ ᐅᑎᐸᔨᒋᒐᐤ ᒥᓐ ᐊ ᒥᔨᑕᒄ ᒐᒋ ᐛᐎᒋᐃᔭᒄ᙮ ᓴᔅ ᐛᔅᑭᒡ ᑲ ᐎ ᐛᐎᒋᐃᔭᒄ᙮ ᒥᒄ ᒪᒃ ᐊᑯ ᐃᔭᒄ ᒥᓐ ᓇᐃᐱᔨᒡ ᒐᒋ ᓄᑯᑕᔭᒄ ᐊ ᒪᒥᑐᓇᔨᒥᔭᒄ, ᓇᒪᔭᐤ ᑭᑈ ᐎ ᐊ ᐃᑕᔨᒥᑎᑯᒡ ᐊᑲ ᐅᒋ ᐊᐱᑕᔨᒥᔭᒄ ᐛᔅ ᓇᒪᐎᔾ ᐅᒋ ᒥᔪᐱᔪᐤ ᒐᒋ ᐛᐎᒋᐃᐛᔭᒄ᙮

¹¹ ᓇᒪᔭᐤ ᑭᑈ ᐎ ᐊ ᓄᑕᐱᔭᓐ ᒐᒂᓐ ᐛᒋ ᐃᔅᒋᔄᔭᓐ ᐅ᙮ ᐛᔅ ᓴᔅ ᓂᒋ ᒋᔅᒐᔨᑕᓐ ᐃᔭᐱᒡ ᒐᒋ ᓇᐊᔨᑎᒪᓐ ᐊᑎ ᐊᑲ ᓇᔅᒡ ᐊᔭᔭᓐ ᒐᒂᓐ᙮

¹² ᓂ ᒋᔅᒐᔨᑕᓐ ᐛᔅ ᑕᓐ ᐊ ᐃᑕᔨᑕᒂᒡ ᐊ ᓄᑕᐱᔨᓇᓄᐅᒡ ᒐᒂᓐ, ᑭᔭ ᒪᒃ ᑕᓐ ᐊ ᐃᑕᔨᑕᒂᒡ ᐊ ᐛᔪᒋᑕᑭᓄᐅᒡ ᒐᒂᓐ᙮ ᒥᒄ ᑕᓐ ᐊ ᐃᔅᐱᔪᐛᓇ ᓂ ᒋᔅᒐᔨᑕᓐ ᐃᔭᐱᒡ ᒐᒋ ᓇᐊᔨᑎᒪᓐ᙮ ᓇᒪ ᒐᒂᓐ ᐊᓐ ᓂᑦ ᐃᑕᔨᑕᓐ ᐊ ᓯᐛᔨᔭᓐ ᑭᔭ ᒪᒃ ᐊ ᒋᔅᐳᔭᓐ, ᐊ ᒋᔅᑎᒪᑎᓯᔭᓐ ᑭᔭ ᒪᒃ ᐊ ᐛᔪᒋᑕᔭᓐ ᒐᒂᓐ᙮

¹³ ᑕᓐ ᒥᒄ ᒐ ᐃᔅᐱᔪᐛᓇ ᒥᓯᐛ ᓂᑭ ᒋ ᓴᐳᔅᑲᓐ ᐛᔅ ᙭ ᓂ ᒥᔨᒄ ᓱᐧᑲᑎᓯᐅᓂᔪᐤ᙮

¹⁴ ᑕᑈ ᔅᒋ ᒥᔪᑐᑐᓇᐛᐤ ᑲ ᐛᐎᒋᐃᔭᒄ ᑕᓐ ᑲ ᐃᓯ ᐊᔨᒥᐅᔭᓐ᙮

¹⁵ ᒋᔨᐛᐤ ᐱᓕᐸᐃᒡ ᑲ ᐅᒋᔭᒄ, ᒋ ᒋᔅᒐᔨᑕᓇᐛᐤ ᐊ ᑎᓯᒡ ᒪᒧᐤ ᑲ ᐊᔭᒥᐊᐛᑎᓯᒡ ᒋᔨᐛᐤ ᒥᒄ ᐊᒋ ᐛᐎᒋᐃᔭᒄ ᓱᓇᔭᐤ ᐃᔅᐱ ᑲ ᓂᑭᑎᒪᓐ ᒪᓯᑐᓂᔭ᙮ ᒋᔨᐛᐤ ᒥᒄ ᔅᒋ ᐎᒋᐃᓇᐛᐤ ᐅᔅᑭᒡ ᑲ ᐛᐎᑎᒪᓐ ᒥᔽᒋᒧᐅᓐ᙮

¹⁶ ᓇᒪ ᒥᒄ ᐸᐃᒂᐤ ᒋ ᐅᒋ ᐸᒋ ᐃᑎᓴᐊᒧᓇᐛᐤ ᓱᓇᔭᐤ ᑲᒋ ᓄᑕᐱᔭᓐ ᒪᒂᒡ ᐊᓐᑕ ᑕᓴᓗᓇᐃᑲᒡ ᑲᒋ ᑕᔭᓐ᙮

¹⁷ ᓇᒪᔭᐤ ᐊ ᓂᑐᐛᔨᑎᒪᓐ ᒋᓱᓇᔭᓂᒧᐛᐤ ᐊᔪᐛᒃ ᓂᑐᐛᔨᑕᓐ ᒐᒋ ᐛᔪᑎᒡ ᒐ ᐃᓯ ᓱᐛᔨᒥᑯᐅᔭᒄ᙮

¹⁸ ᐊᑯᑕ ᐅ ᐛᑎᒪᑎᑯᒡ ᓴᔅ ᒥᓯᐛ ᐊᒋ ᒥᔅᑭᒪᓐ ᐊᓐ ᑲ ᐃᓯ ᐸᒋ ᐛᐎᒋᐃᐛᔭᒄ᙮ ᓴᔅ ᐊᑐᐎᔅ ᓂᑦ ᐃᔅᐱᔅ ᐊᔭᓐ ᑕᓐ ᑲ ᐃᓯ ᓄᑕᐱᔭᓐ᙮ ᐊᑯ ᒪᒃ ᒥᓯᐛ ᐊ ᐊᔭᔭᓐ ᑕᓐ ᑲ ᐃᓯ ᓄᑕᐱᔭᓐ ᐃᐸᑉᕋᑕᐃᑕᔅ ᐊᒋ ᐸᑐᐅᑦ ᐊᓂᔭᔪᐤ ᒋᒥᑯᓴᐅᓄᐛᐛ ᐅ ᑲ ᐃᓯ ᒥᔭᒄ ᓇᔅᒡ ᐊ ᒥᔽᓯᒡ ᐱᔅᑎᓂᒐᐅᓐ ᐃᓯ ᑭᓄᐛᐸᑎᒻ ᒋᓴᒪᓂᑐᐤ ᑭᔭ ᓇᔅᒡ ᓇᐊᔨᑎᒥᐃᑯᐤ᙮

¹⁹ ᐊᑯ ᒪᒃ ᒋᓴᒪᓂᑐᐤ ᒋᑭ ᐅᑎᓇᒪᑯᐛᐤ ᒥᓯᐛ ᒐᒂᔪᐤ ᐊ ᐃᓯ ᓄᑕᐱᔪᐛᒄ᙮ ᒥᓯᐛ ᒋᑭ ᒥᔨᑯᐛᐤ ᐊ ᐃᓯ ᓄᑕᐱᔪᐛᒄ ᑕᓐ ᐊ ᐃᓯ ᓇᔅᒡ ᐛᔪᐅᒡ ᒥᔪᑐᑎᒪᒐᑦ ᙭ ᒋᓴᓴ ᐅᒡ᙮

²⁰ ᑲᒋᒡ ᒋᑭ ᒪᒥᒋᒪᑭᓄᐤ ᒋᓴᒪᓂᑐᐤ ᒍᑕᐎᓄᐤ᙮ ᐊᒥᓐ᙮

ᒪᔅᑕᔾ ᑲ ᐃᑎᓯᓇᐊᒧᐛᑦ ᑈᓪ ᐊᓂᔭᔪᐛ ᒋᓴᓴ ᐅᑦ ᐃᔨᒥᔪᐛ ᐱᓕᐸᐃᒡ ᑲ ᑕᔨᒋ

²¹ ᐛᒋᔭᒪᐧᑯᒡ ᒥᓯᐛ ᐊᓐᒡ ᑲ ᑕᑈᔭᔨᒪᒡ ᙭ ᒋᓴᓴ᙮ ᒋᐧᑲᓂᓯᓄᐅᒡ ᐅᑕ ᑲ ᐃᑕᒡ ᑭᔭ ᐎᔨᐛᐤ᙮

²² ᒥᓯᐛ ᐊᓐᒡ ᑲ ᑕᑈᑕᒡ ᒋᑎᒥᔅᑲᑯᐛᐅᒡ, ᑭᔭ ᐊᓐᒡ ᑲ ᐊᑐᔅᒐᒡ ᒋᓴᐅᒋᒪᐛ ᓯᓴᕋ ᐊ ᑕᔨᒋ᙮

²³ ᓇᑐᑎᒧᐛᐤ ᒪᒃ ᐅᑎᐸᔨᒋᒐᐤ ᒋᓴᔅ ᙭ ᒥᓯᐛ ᒐᒋ ᐃᓯ ᒋᓴᐛᑐᑕᑕᒄ᙮