Itangô 9 - Bibili 1927 (Omyene)

¹ N’agambi Yeôva gôre Môsès gw’itôve si Sina, g’ôgwèli ôlônga w’ômpum̃a wi mbaṉi waô kogwa pa avila gw’Egipt, awulya inè:

² Israèl wi ga vange ntyagô yi Paki gw’egômbe zi re tetô pa.

³ Aṉwè be panga yô gw’egômbe zi re tetô pa, gô ntyugu y’igôm̃i ni nay y’ôgwèli wiṉo, gw’egômbe zi nkôlô; aṉwè be panga yô ga nt’ar’ampanga môdu ma yô n’izômbyô yôdu ya yô.

⁴ N’agambi Môsès gôr’Israèl, gôre waô gô pange ntyagô yi Paki.

⁵ N’avangi waô ntyagô yi Paki gô ntyugu y’igôm̃i ni nay y’ôgwèli ôlônga gw’egômbe zi nkôlô, gw’itôve si Sina; n’alend’Israèl izômbyô yôdu y’avenyô Yeôva gôre Môsès.

⁶ N’avegagi vovo aṉôm̃e awèwo w’alèngyô fweva pa g’ômwanja w’ebende z’ôma, ko w’avange ntyagô yi Paki gô ntyugu mèyo. N’awôm̃unyi waô ntyugu mèmô g’ôzô wi Môsès na g’ôzô w’Aarône.

⁷ N’aṉôm̃e mè w’awulinyi Môsès inè: azw’are fweva pa g’ômwanja w’ebende z’ôma; ntiṉa nde yi be simbyô zwè inè, azw’ayire ntyagô yi Yeôva gw’egômbe zi re tetô pa gôr’Israèl.

⁸ N’awulinyô waô ne Môsès inè: vengiṉaṉi ko mi mya nte sômbyô ṉwè ne Yeôva.

⁹ N’agambi Yeôva gôre Môsès awulya inè:

¹⁰ Gamba gôr’Israèl, awulinya waô inè: Jog’ôm’edu gôre ṉwè ge gôr’imbambi saṉi afweva g’ômwanja w’ebende z’ôma, ge g’ômwanja w’ôgèndo wa bô, gambèṉè e be pange ntyagô yi Paki gô bimbye Yeôva.

¹¹ Wi ga vange yô g’ôgwèli wi mbaṉi, gô ntyugu y’igôm̃i ni nay, gw’egômbe zi nkôlô; wi be nya yô ni mpèmba yi re levèn fo n’iporo si nôṉe.

¹² W’arig’ezom̃a za yô kwang’ibanga, ge moguṉ’epy’edu za yô. Wi be panga yô ga nt’ar’izômbyô yôdu yi ntyagô yi Paki.

¹³ Jog’ôma wi re nkèrè na yè wi re azele g’ôgèndo apôza gô dende ntyagô yi Paki, ôma mè e be teṉô avila gôr’iṉongo nyè, konde nè e pa jire ntyagô yi Yeôva gw’egômbe zi re tetô pa, ôma mèwoṉo e be dèng’ôgôm̃a w’ibe sè.

¹⁴ J’ôgènda wi dwaṉa gôre ṉwè adende ntyagô yi Paki yi Yeôva, e be denda ga nt’ar’ampanga n’izômbyô yi ntyagô yi Paki. E be dwaṉ’ivanga mèmô gôre ṉwè gôr’ôgènda evangiṉi mèmô kè gôr’ôlwaṉi.

¹⁵ Gô ntyugu y’aṉôgyô nagô y’ikuku, evindi z’aliṽiṉi nagô y’ikuku, ñanja y’idataṉa; avile nkôlô kwang’ibanga z’avegagi gô nagô y’ikuku mpangiṉi ga ôgôṉi.

¹⁶ Yeṉo avegagi zô egômbe zôdu: evindi z’aliṽiṉagi nagô y’ikuku, z’avegagi ôgwèra mpangiṉi ga ôgôṉi.

¹⁷ J’evindi z’atômbô avila gô nagô y’ikuku, gambèṉè Israèl wi kènda; n’Israèl w’asèngagi ôlakô gô mbôra y’agum̃aṉag’evindi.

¹⁸ Israèl w’agèndagi nt’avegag’ôzômbyô wi Yeôva, w’asèngag’ôlakô ga nt’avegagi ôzômbyô wi Yeôva; w’alwaṉagi kè g’ôlakô ôlingô w’alwaṉag’evindi gô nagô y’ikuku.

¹⁹ J’evindi z’adwaṉ’ôling’ôla gô nagô y’ikuku, gambèṉè Israèl w’ayogiṉ’ôzômbyô wi Yeôva, ko w’agènda du.

²⁰ J’evindi z’adwaṉa intyugu sa kwè gô nagô y’ikuku, gambèṉè wi dwaṉa g’ôlakô ga nt’avegag’ôzômbyôwi Yeôva, w’agèndagi kè ga nt’avegag’ôzômbyô wi Yeôva.

²¹ J’evindi z’adwaṉa avile nkôlô kwang’ibanga, ko zô dubw’ibanga, gambèṉè wi kènda. Ja z’adwaṉ’ôm̃anda n’ôgwèra, j’evindi z’adubwa, gambèṉè wi kènda.

²² J’evindi z’adwaṉa gô nagô y’ikuku ntyugu mbaṉi, ge ôgwèli, ge ômpum̃a, gambèṉè Israèl wi dwaṉa g’ôlakô, ko w’agènda du; ndô ja z’adubwa, gambèṉè wi kènda.

²³ W’alwaṉagi g’ôlakô ga nt’avegag’ôzômbyô wi Yeôva, w’agèndagi ga nt’avegag’ôzômbyô wi Yeôva, w’ayogiṉôgô ivanga nyi Yeôva, ga nt’avegag’ôzômbyô wi Yeôva gôre Môsès.