Itangô 8 - Bibili 1927 (Omyene)

¹ N’agambi Yeôva gôre Môsès, awulya inè:

² Gamba gôr’Aarône, ko bulinyè inè: Gô be dôṽyô ilambi g’ômwanga wi dôṽyô ilambi, ilambi ôrwageṉô si ga ṽam̃iṉe swaswo gô wô.

³ N’alendi Aarône yeṉo; alôṽyi yè ilambi swaswo n’ômwanga wi dôṽyô ilambi, ga nt’azômbyi Yeôva Môsès.

⁴ Ômwanga wi dôṽyô ilambi w’avangyô ni sika ya teṉateṉa tulô pa; kwanga gô ntiṉa ya wô, kwanga gw’agônjô ma wô, w’avegagi sika ya teṉateṉa tulô pa; Môsès avang’ômwanga wi dôṽyô ilambi gw’egolaṉi z’arevyô yè ne Yeôva.

⁵ N’agambi Yeôva gôre Môsès, awulya inè:

⁶ Wonge Leviti avila gô garegare y’awaṉa w’Israèl, ko jombunya waô.

⁷ Vôna nte be jombunyo waô; nyènya gôre waô aṉingô m’ôraṽô wi mpungu y’ibe; wi ga vang’ôṽenda wi sèngiṉa gô pyagaṉa gw’ikuṽi yaô yôdu, wi ga yôvuṉ’ingoy saô, ko waô jombuṉ’ikuṽi yaô.

⁸ Gambèṉè wi ga wong’ômwaṉa wi nyam̃a, ni ntyagô yi mpagaga ya pèkèpèkè yi farinya mbya bindô pa n’agali; ko wè bong’ômwaṉ’ômwèṉè wi nyam̃a gô ntyagô y’ôraṽô wi mpungu y’ibe.

⁹ Ko wè pange Leviti gô susa pyèrè swaswo ni ñanja y’idataṉa, ko wè datize mandô yôdu y’Israèl.

¹⁰ Ko pange Leviti gô susa pyèrè g’ôzô wi Yeôva; ko Israèl taly’ago maô gôre Leviti.

¹¹ Gambèṉè Aarône e be pange Leviti gô piṉô g’ôzô wi Yeôva, ga ntyagô y’Israèl, ko waô dwaṉ’ôrunda gw’eṽilô zi Yeôva.

¹² Leviti wi be taly’ago maô gô wônjô y’inyare; ko wè jire mori gô ntyagô y’ôraṽô wi mpungu y’ibe, ni mori gô ntyagô yi pezô, ko ôraṽô wi mpungu y’ibe pô gôre Leviti.

¹³ Ko wè kum̃anye Leviti g’ôzô w’Aarône na gw’azô m’awaṉa w’Aarône, ko wè panga waô gô piṉô ga ntyagô g’ôzô wi Yeôva.

¹⁴ Ko wè pinje Leviti avila gô garegare y’Israèl; ni Leviti wi be dwaṉ’iwam̃.

¹⁵ Avila vovo Leviti wi be bya gô dend’eṽilô gô ñanja y’idataṉa. Yeṉo be jombunyo waô, ko wè panga waô gô piṉô ga ntyagô.

¹⁶ Konde waôdu w’apenyô gôre myè avila gôr’Israèl; my’are bonga pa waô gôre myè gw’inyanga ny’injalyè, avila gôr’injalyè sôdu s’Israèl.

¹⁷ Konde injalyè sôdu s’Israèl isam̃, aṉôm̃e n’inyam̃a ta, gô ntyugu y’awôli myè injalyè sôdu gw’Egipt, my’are panga pa sô ôrunda gôre myèmè.

¹⁸ My’are bonga pe Leviti gw’inyanga ny’injalyè sôdu s’Israèl.

¹⁹ My’are pa pe Leviti waôdu gôr’Aarône na gôr’awaṉi wè aṉôm̃e, avila gôr’Israèl, ko waô dend’eṽilô z’Israèl gô ñanja y’idataṉa, ko waô p’ôraṽô wi mpungu y’ibe gôr’Israèl, ko Israèl w’awôlô ne evung’edu, gô susa waô pyèrè ni mbôra y’ôrunda.

²⁰ Môsès, Aarône ni mandô yôdu y’Israèl w’alendi gôre Leviti isam̃u yôdu y’azômbyi Yeôva Môsès g’ômwanja wi Leviti; yeṉo alend’Israèl gôre waô.

²¹ N’ayombuṉi Leviti ikuṽi yaô, ayôvuṉ’ingoy saô, n’avangyô waô n’Aarône gô piṉô ga ntyagô g’ôzô wi Yeôva, ko yè p’ôraṽô wi mpungu y’ibe g’ômwanji waô ko waô jombwa.

²² Avila vovo, Leviti aṽyeṉi gô dend’eṽilô zaô gô ñanja y’idataṉa g’ôzô w’Aarône na gw’azô m’awaṉi wè aṉôm̃e, ga nt’azômbyô ne Yeôva gôre Môsès g’ômwanja wi Leviti; yeṉo alendi yè gôre waô.

²³ N’agambi Yeôva gôre Môsès, awulya inè:

²⁴ Vôn’igamba nt’are nyô gôre Leviti. Avila g’ôṉèro w’agôm̃i m’impum̃’ambaṉi n’impum̃’itaṉè na vyagaṉô na vovo, ôm’edu wi Levi e be jingiṉa gw’eṽilô zi ñanja y’idataṉa gô janj’eṽilô vovo.

²⁵ Avila g’ôṉèro w’agôm̃i m’impum̃’ataṉè, gambèṉè e be kogwa avila gw’eṽilô, ko yè arô janja zô nyèṉè.

²⁶ E be nunguṉ’awareri yè gô ñanja y’idataṉa gô penjavenj’eza zi re pô pa waô gô bandam̃iṉa; ndô ayanj’eṽilô nyèṉè. Ô be denda kè gôre Leviti g’ômwanja wi ṽilô yaô.