Itangô 5 - Bibili 1927 (Omyene)

¹ N’agambi Yeôva gôre Môsès, awulya inè:

² Zômby’Israèl gô tômb’aṉaga waôdu wi re n’inkaṉi ya gelô avila g’ôlakô, n’ôm’edu wi re n’ôzômba ge ôma wi re fweva pa vo ebende.

³ Aṉôm̃e ntyo antô, aṉwè be tômba waô avila g’ôlakô, ko w’afweviz’ôlakô wi re myè dwaṉa pa gô garegare.

⁴ N’alend’Israèl yeṉo arômba waô gw’igala ny’ôlakô; ga nt’azômbyi Yeôva Môsès, yeṉo alend’Israèl.

⁵ N’agambi Yeôva gôre Môsès, awulya inè:

⁶ Gamba gôr’Israèl, inè: Jog’ôma ge ômwantô afwem̃a gôr’ôrangaṉô wè gô dende mbe g’ômwanja wi Yeôva ko yè dwaṉa kè ôgara,

⁷ gambèṉè e be mèm̃’ibe sè, ko yè fwiṉiza yom̃i yè yôdu yi re yè dènga pa ni mpoṉo mbe, ko yè kunda vovo mbèy y’ôtaṉè ya yô; e be pa yô gôre yè g’ômwanji wè wi re dwaṉa p’ôgara.

⁸ Ja e zel’ôma vovo wi re n’inyanga nyi yom̃a yi re dèngô pa ni mpoṉo mbe, yom̃a yiṉo yi be tô bya gôre Yeôva ko yô dwaṉa gôre miṉisè, tômbare p’idombè nyi taṽe mpungu y’ibe nyi pô g’ôraṽô g’ômwanja w’ôgara.

⁹ Ntyagw’edu yi yom̃a yi re pangô p’ôrunda ne Israèl, yi be dwaṉa gôre miṉisè yi be jira yô.

¹⁰ Yom̃a yi be dwaṉa pangô p’ôrunda yi be dwaṉa gôre yè, ezom̃’edu zi be dwaṉa pô pa gôre yè, zi be dwaṉ’izè.

¹¹ N’agambi Yeôva gôre Môsès, awulya inè:

¹² Gamba gôr’Israèl, ko bulinya waô inè: J’ômwantô adubwa avila gôr’ôṉôm̃u wè, ko yè dwaṉ’evôvevôve;

¹³ jog’ôṉôm̃’ômwèṉè adèwa na yè, ko igamba jumbuṉô gw’antyo m’ôṉôm̃u wè; jog’are fweva pa gô ntyorya, ko alwaṉ’ôyeṉi gôre yè, ge yè kôtô egômbe zi dèwa waô;

¹⁴ jog’ôṉôm̃e akôtô ne ivuva ko yè dwaṉ’ômpuvampuva gôr’ômwantô wè, wi re fweva pa, ge j’akôtô ne ivuva ko yè dwaṉ’ômpuvampuva gôr’ômwantô wè wi re azele fweva pa du,

¹⁵ gambèṉè ôma mè e be bag’ômwantô wè gôre miṉisè, ko yè baga gô ntyagô y’inya g’ômwanja w’ômwantô mbèy y’igôm̃i y’efa yi farinya yi orze; awonga du agali ge yè fwela vovo ya yi nkangô, konde yô ne ntyagô yi mpagaga y’ivuva, mpagaga yi jônginy’ibe.

¹⁶ Ni miṉisè yi be pang’ômwantô gô susa pyèrè ko kum̃anyè g’ôzô wi Yeôva.

¹⁷ Gambèṉè miṉisè yi be bong’aṉingô m’ôrunda gw’evagô z’iwôṉô; yi be bonge ntyèngè gw’iroy yi nagô y’ikuku, awela yô gw’aṉingô.

¹⁸ Miṉisè yi be kum̃any’ômwantô g’ôzô wi Yeôva, ko yè puruṉ’itwe s’ômwantô, ko yè fwele ntyagô y’ijônginya gw’ago mè, yô ne ntyagô y’ivuva, ni miṉisè yi be kôt’aṉingô mi nôṉe mi bag’ôzavô gw’ago mè.

¹⁹ Ni miṉisè yi be tangiz’ômwantô ôrangô, awulinyè inè: Jogo ô zele dèwa pa n’ôṉôm̃y’edu, j’egômbe zi re wè gôr’ôṉôm̃u wo ô pa dubwa du gô fweviz’ôkuṽi wo, gambèṉè aṉingô miṉo mi nôṉe mi bag’ôzavô, m’alwaṉe du ijuwa gôre wè.

²⁰ Ndô j’egômbe zi re wè gôr’ôṉôm̃u wo ô re dubwa pa ko wè fwevizô, na j’ôṉôm̃’ômwèṉè, tômbare pa ôṉôm̃u womè, are dèwa pa na wè,

²¹ gambèṉè miṉisè yi be tangiz’ômwantô n’ôrangô w’ôzavô, awulya inè: Yeôva e ga vange wè ôzavô n’ibikô gô garegare y’aṉagi wo, mpangag’iṽèṽèṉi nyo gô keta n’iwum̃u nyo gô dum̃a,

²² ko aṉingô miṉo mi bag’ôzavô jingiṉa gw’isègè yo, ko mô pang’iwum̃u nyo gô dum̃a agetiz’iṽèṽèṉi nyo; gambèṉè ômwantô e bulya inè: Amèn, Amèn.

²³ Ni miṉisè yi be tènd’izavô yiṉo gw’ezangô, avila vovo yi be sizô n’aṉingô mi nôṉe.

²⁴ N’ayè e be pang’ômwantô gô jong’aṉingô mi nôṉe mi bag’ôzavô, ko aṉingô mi bag’ôzavô jingiṉa gô gare yè, ko mô kalwe nôṉe.

²⁵ Miṉisè yi be bonge ntyagô y’ivuva avila gw’ago m’ômwantô; e be piṉa yô g’ôzô wi Yeôva, ko yè jira yô gô mbôra yi jirô intyagô.

²⁶ Miṉisè yi be bonge ntyom̃è y’ôgo yi ntyagô yiṉo yi mpagaga ga ôyônginyô, ko yè peza yô gô mbôra yi jirô intyagô. Avila vovo e be jonj’ômwantô aṉingô.

²⁷ J’ayè jonjè p’aṉingô, gambèṉè be twa inè, j’ômwantô afwevi ko yè dwaṉ’evôvevôve gôr’ôṉôm̃u wè, ko aṉingô mi bag’ôzavô jingiṉa gô gare yè ko aṉingô kalwe nôṉe, ko iwum̃u nyè dum̃a n’iṽèṽèṉi nyè keta, gambèṉè ômwantô mè e be dwaṉ’ôzavô gô garegare y’aṉagi wè.

²⁸ Ndô j’ômwantô e zele fweva pa ko yè dwaṉe nkèrè, gambèṉè ômwantô ayeṉizô du njuke ko yè jaṉ’awaṉa.

²⁹ Nyiṉo ne ivanga g’ômwanja w’ivuva g’ômwanja w’ômwantô wi re gôr’ôṉôm̃u wè ko yè fwem̃a aweva;

³⁰ na g’ômwanja w’ôṉôm̃e wi re kôtô pa ne ivuva ko yè dwaṉ’ômpuvampuva gôr’ômwantô wè; miṉisè yi be kum̃anyô ômwantô g’ôzô wi Yeôva, ko yè denda gôre yè ivanga nyiṉo nyôdu.

³¹ Ôṉôm̃e e be dwaṉa yangayanga avila gw’ifwem̃a, n’ômwantô e be dèng’ôrevuṉô w’ibe sè.