Itangô 4 - Bibili 1927 (Omyene)

¹ N’agambi Yeôva gôre Môsès, awulya inè:

² Rangaṉ’awaṉ’aṉôm̃e wi Keat gôr’awaṉa wi Leviti n’imbuṽe saô, n’inagô s’ireri saô,

³ avila g’ôṉèro w’agôm̃i m’impum̃’ararô na kwanga g’ôṉèro w’agôm̃i m’impum̃’ataṉè waôdu wi re n’inyanga gô janj’eṽilw’edu gô ñanja y’idataṉa.

⁴ Yiṉo ne ṽilô y’awaṉ’aṉôm̃e wi Keat gô ñanja y’idataṉa; yô ne ya y’ôrunda.

⁵ J’ôlakô w’atôrô, Aarône n’awaṉi wè aṉôm̃e wi be bya gô puruṉ’ôṉamba wi re diṽiṉô pa, ko waô pugiṉa wô gw’egara z’ampanga.

⁶ Wi be dimbiṉa g’ôlômba wa zô efu z’ebanda z’ôṉongo w’ôsolomèngèlè, wi be sambuṉa g’ôlômba ôṉamba w’ôsolomèngèlè; avila vovo wi be fwel’ibô s’egara z’ampanga.

⁷ Wi be jany’ôṉamba w’ôsolomèngèlè gô tavulu yi mpèmba yi re dôṽyô pa g’ôzô wi Yeôva, na wi be fwela g’ôlômba pèlè, amogi, n’ikopu ni ntyèngè g’ôṉamba w’ôsolo mèngèlè g’ômwanja w’intyagô; mpèmba yi be dwaṉa vovo egômbe zôdu;

⁸ wi be janya gô yom̃a yiṉo ôṉamba wa teṉateṉa, na wi be pugiṉa wô n’efu z’ebanda z’ôsolomèngèlè; avila vovo wi be fwel’ibô si tavulu.

⁹ Wi be bong’ôṉamba w’ôsolomèngèlè, ko waô pugiṉ’ômwanga wi dôṽyô ilambi, ilambi sa wô, ôṽenda wa wô, ipambô sa wô, ni vagô yôdu ya wô y’agali, yi re dôṽyô pa gô janja na wô;

¹⁰ wi be fwela yô, ni vagô ya yô yôdu gw’efu z’ebanda z’ôṉongo w’ôsolomèngèlè; avila vovo wi be fwela yô gw’ibô.

¹¹ Wi be jany’ôṉamba w’ôsolomèngèlè gô mbôra yi jirô intyagô yi sika ya teṉateṉa ko waô pugiṉa wô gw’efu z’ebanda z’ôṉongo w’ôsolomèngèlè; avila vovo wi be fwel’ibô si mbôra yi jirô intyagô.

¹² Wi be bonge vagô yôdu yi janjiṉ’eṽilô gô mbôra y’ôrunda, wi be fwela yô g’ôṉamba w’ôsolomèngèlè, ko waô pugiṉa wô gw’efu z’ebanda z’ôṉongo w’ôsolomèngèlè, avila vovo wi be fwela yô gw’ibô.

¹³ Wi be tômb’ômbu wi mbôra yi jirô intyagô, gambèṉè wi be janya gô mbôra yi jirô intyagô ôṉamba w’angola;

¹⁴ wi be fwela g’ôlômba vagô yôdu yi re dôṽyô pa gw’eṽilô za yô, intyèngè, intum̃a, ipambô, ilômbô ni ya yôdu yi mbôra yi jirô intyagô. Wi be janya g’ôlômba efu z’ebanda z’ôsolomèngèlè, avila vovo wi be fwel’ibô gô yô.

¹⁵ Gô be mèṉiz’Aarône n’awaṉi wè aṉôm̃e gô pugiṉe mbôra y’ôrunda ni vagô yôdu yi mbôra y’ôrunda, gambèṉè awaṉ’aṉôm̃e wi Keat wi be bya gô tôr’ôlakô, gô twaṉe yom̃a, ndô w’agôza du ya y’ôrunda waô vende juwa. Yiṉo ne ṽilô y’irwaṉisi y’avenyô gôr’awaṉ’aṉôm̃e wi Keat gô ñanja y’idataṉa.

¹⁶ Eleazar, y’ômwaṉ’ôṉôm̃e w’Aarône, ayè be dwaṉ’ôvenjavenji w’agali m’ômwanga wi dôṽyô ilambi, ni ya yi nkangô, ni ntyagô y’inya ya pèkèpèkè, n’agali m’isagya; e be dwaṉ’ôvenjavenji wi nagô y’ikuku yôdu ni ya yôdu yi re gô yô, mbôra y’ôrunda ni yom̃a ya yô.

¹⁷ N’agambi Yeôva gôre Môsès na gôr’Aarône, awulya inè:

¹⁸ Areṉaṉi du mbuṽe y’inagô sa mongi Keat avila gô garegare yi Leviti;

¹⁹ lendaṉi yeṉo gôre waô, ko waô dwaṉa bo, ko w’ayuwa du, gô be susa waô pyèrè ni mbôra y’ôrund’ômpôlômè, gambèṉè Aarône n’awaṉi wè aṉôm̃e wi be bya, na wi be dôṽyô ôm’edu gôre waô gw’ijanji sè na gw’eṽilô zè;

²⁰ ko w’ayeṉa du yom̃a y’ôrunda gô be jingiṉa waô, wi vende juwa.

²¹ N’agambi Yeôva gôre Môsès, awulya inè:

²² Ranga kè awaṉ’aṉôm̃e wi Gèrson n’inagô s’ireri saô, n’imbuṽe s’ireri saô,

²³ ô be tanga avila g’ôṉèro w’agôm̃i m’impum̃’ararô kwanga g’ôṉèro w’agôm̃i m’impum̃’ataṉè, waôdu wi re n’inyanga gô janj’eṽilw’edu gô ñanja y’idataṉa.

²⁴ Yiṉo ne ṽilô y’imbuṽe sa mongi Gèrson, ṽilô yi be dendô waô ni yom̃a yi be twaṉô waô.

²⁵ Wi be twaṉe tava yi ndèkè yi ñanja y’idataṉa, n’ikuku nya yô, n’efu za yô, n’efu z’ebanda z’ôsolomèngèlè zi fwelô g’ôlômba, iṉamba y asangala mi re g’ômpômbala wi ñanja y’idataṉa.

²⁶ Iṉamba y’asangala m’evungu, n’iṉamba y’asangala m’ômpômbala w’iguge ny’evungu, vingôvingô nagô y’ikuku ni mbôra yi jirô intyagô, ikulu ya yô ni yom̃a yôdu yi re gô yô; na wi be dende ṽilô yôdu yi re gôgô.

²⁷ Gô ṽilô yaô, awaṉ’aṉôm̃e wa mongi Gèrson, wi be dwaṉa gw’ipangiṉa s’Aarône na gôr’awaṉi wè aṉôm̃e gô ya yôdu yi be twaṉô waô na gô ṽilô yôdu yi be dendô waô, ko dôṽyaṉi waô gô bandam̃iṉe ya yôdu yi re waô twaṉa pa.

²⁸ Yiṉo ne ṽilô y’imbuṽe s’awaṉ’aṉôm̃e wa mongi Gèrson gô ñanja y’idataṉa, ni ya yi re na waô yi be pangiṉô ne Itamar y’ômwaṉ’ôṉôm̃e w’Aarône yi miṉisè.

²⁹ Ô be tang’awaṉ’aṉôm̃e wi Merari n’imbuṽe saô, n’inagô s’ireri saô;

³⁰ ô be tang’avila g’ôṉèro w’agôm̃i m’impum̃’ararô kwanga g’ôṉèro w’agôm̃i m’impum̃’ataṉè, waôdu wi re n’inyanga gô janj’eṽilw’edu gô ñanja y’idataṉa.

³¹ Yiṉo ne yom̃a yi re pô pa waô gô bandam̃iṉa ni yom̃a yi re waô gô twaṉa gô ṽilô yaô yôdu gô ñanja y’idataṉa; intimbe si nagô y’ikuku, n’ibô sa yô, am̃èngo ma yô, intiṉa sa yô,

³² ageṉô m’evungu vingôvingô, intiṉa sa mô, ikulu ya mô, ni yom̃a yôdu yi re gô yô, n’ezom̃’edu zi re dôṽyô pa gw’eṽilô zaô. Aṉwè be tènd’ana ma yom̃a yi re dôṽyô pa gw’ibandam̃iṉi saô na yi re waô gô twaṉa.

³³ Yiṉo ne ṽilô y’imbuṽe s’awaṉ’aṉôm̃e wi Merari, ṽilô yaô yôdu gô ñanja y’idataṉa gô pangiṉô ne Itamar, y’ômwaṉ’ôṉôm̃e w’Aarône yi miṉisè.

³⁴ Môsès n’Aarône n’ivangiṉi yi mandô w’arangi awaṉ’aṉôm̃e wa mongi Keat, n’imbuṽe saô, n’inagô s’ireri saô gôre waôdu,

³⁵ avila g’ôṉèro w’agôm̃i m’impum̃’ararô kwanga g’ôṉèro w’agôm̃i m’impum̃’ataṉè, waô w’avegagi n’inyanga gô janj’evilw’edu gô ñanja y’idataṉa;

³⁶ waô w’arangyô n’imbuṽe saô w’avegagi ntozèny mbaṉi ni nkam̃’ôrwageṉô n’agôm̃i ataṉè.

³⁷ Wiṉo ne waô w’imbuṽe sa mongi Keat w’arangyô, waôdu w’ayanjagi ṽilô gô ñanja y’idataṉa; Môsès n’Aarône w’arangi waô ga nt’azômbyô Môsès ne Yeôva.

³⁸ N’awaṉ’aṉôm̃e wi Gèrson w’arangyô n’imbuṽe saô, n’inagô s’ireri saô,

³⁹ avila g’ôṉèro w’agôm̃i m’impum̃’ararô kwanga g’ôṉèro w’agôm̃i m’impum̃’ataṉè, waôdu w’avegagi n’inyanga gô janj’eṽilw’edu gô ñanja y’idataṉa.

⁴⁰ Waô w’arangyô n’imbuṽe saô n’inagô s’ireri saô, w’avegagi ntozèny mbaṉi ni nkam̃’ôrôṽa n’agôm̃i ararô.

⁴¹ Wiṉo ne waô w’imbuṽe s’awaṉ’aṉôm̃e wi Gèrson w’arangyô waôdu w’ayanjagi ṽilô gô ñanja y’idataṉa; Môsès n’Aarône w’arangi waô ga nt’azômbyi Yeôva.

⁴² Waô w’imbuṽe s’awaṉ’aṉôm̃e wi Merari w’arangyô n’imbuṽe saô n’inagô s’ireri saô,

⁴³ avila g’ôṉèro w’agôm̃i m’impum̃’ararô kwanga g’ôṉèro w’agôm̃i m’impum̃’ataṉè, waôdu w’avegagi n’inyanga gô janj’eṽilw’edu gô ñanja y’idataṉa,

⁴⁴ waô w’arangyô, n’imbuṽe saô, w’avegagi ntozèny ntyarô ni nkam̃a mbaṉi.

⁴⁵ Wiṉo ne waô w’imbuṽe s’awaṉ’aṉôm̃e wi Merari w’arangyô; Môsès n’Aarône w’arangi waô ga nt’azômbyô Môsès ne Yeôva.

⁴⁶ Leviti waôdu w’arangyô ne Môsès n’Aarône n’ivangiṉi y’Israèl, w’arangyô n’imbuṽe saô n’inagô s’ireri saô,

⁴⁷ avila g’ôṉèro w’agôm̃i m’impum̃’ararô kwanga g’ôṉèro w’agôm̃i m’impum̃’ataṉè, waôdu w’avegagi n’inyanga gô janj’eṽilw’edu na gô twaṉe yom̃a gô ñanja y’idataṉa,

⁴⁸ waôdu w’arangyô w’avegagi ntozèny eṉanay ni nkam̃’ôtaṉè n’agôm̃i eṉanay.

⁴⁹ W’arangyô ga nt’azômbyô Môsès ne Yeôva, ôm’edu ga nt’ar’eṽilô zè zi re yè gô janja, n’ezom̃a zi re yè gô twaṉa; w’arangyô ga nt’azômbyi Yeôva Môsès.