Itangô 25 - Bibili 1927 (Omyene)

¹ N’alwaṉ’Israèl gô Sitim; n’avakily’iṉongo gô belaṉa n’awaṉ’antô wi Môab.

² Awaṉ’antô w’awey’aṉaga gw’intyagô s’inyambyè saô; n’anyeṉ’iṉongo, azaviṉ’inyambyè saô.

³ N’agweṉ’Israèl gô saviṉe Baal‐Peor, n’aṽam̃iṉ’eguṉu zi Yeôva gôr’Israèl.

⁴ N’awulinyi Yeôva Môsès inè: Latiz’ivangiṉi yôdu y’iṉongo, ko banya mongi wi r’ôgara g’ôzô wi Yeôva swaswo ni nkômbe, ko eguṉu eṽôlô zi Yeôva dubwa avila gôr’Israèl.

⁵ N’awulinyi Môsès iyèkèli y’Israèl inè: Ôm’edu gôre ṉwè e ga yôṉ’aṉagi wè wi re kweṉa pa gô saviṉe Baal‐Peor.

⁶ Na vôna, ôṉôm̃e avila gôr’Israèl aṽyeṉi aṽag’ômwantô wi Madyan gôr’awareri yè, gw’antyo mi Môsès na gw’antyo mi mandô yôdu y’Israèl, gw’aleṉagi waô g’ômpômbala wi ñanja y’idataṉa.

⁷ Gw’ayeṉi Finès, y’ômwaṉ’ôṉôm̃e w’Eleazar, y’ômwaṉ’ôṉôm̃e w’Aarône, yi miṉisè, ayeṉa yeṉo, agum̃aṉi avila gô garegare yi mandô, awong’igonga g’ôgo wè.

⁸ N’azôngi yè ôṉôm̃e w’Israèl gô nagô yè y’ikuku, n’arum̃i yè waôdu aṽaṉi igonga gôr’ôṉôm̃e w’Israèl, avila vovo gw’iwum̃u ny’ômwantô. Yeṉo ayèki evunga gôr’Israèl.

⁹ Na waô w’ayônyô ne evunga w’avegag’agôm̃i m’intozèny ambaṉi n’intozèny nay.

¹⁰ N’agambi Yeôva gôre Môsès awulya inè:

¹¹ Finès, y’ômwaṉ’ôṉôm̃e w’Eleazar, y’ômwaṉ’ôṉôm̃e w’Aarône, yi miṉisè, are tômba p’eguṉu zam̃ avila gôr’Israèl, konde avuvi alwaṉa ni mpyô gw’ini nyam̃ gô garegare yaô, ko my’ayiliz’ Israèl gw’eguṉu zam̃.

¹² Yeṉo ô be bulya inè: Mi jeka na yè njeka y’am̃ènjè.

¹³ Yi be dwaṉa gôre yè na gôr’awaṉi wè gô nyum̃i yè njeka y’eṽilô zi miṉisè za pèkèpèkè, konde are dwaṉa pa ni mpyô gôr’Anyambyè yè, ko yè p’ôraṽô wi mpungu y’ibe gôr’Israèl.

¹⁴ Ina ny’ôṉôm̃e w’Israèl w’ayônyô ta n’ômwantô wi Madyan ne Zimri, y’ômwaṉ’ôṉôm̃e wi Salu; ayè avegag’ôvangiṉi wi nagô ya rerè ya mongi Simeon.

¹⁵ Ina ny’ômwantô wi Madyan w’ayônyô ne Kozbi, y’ômwaṉ’ômwantô wi Sur, y’ôvangiṉi wi nagô ya rerè ya mongi Madyan.

¹⁶ N’agambi Yeôva gôre Môsès awulya inè:

¹⁷ Lendiṉe mongi Madyan ga ilôvalôvi, ko jôṉa waô;

¹⁸ konde w’atweṉ’ilôvalôvi yaṉi gô teṉiza ṉwè n’avôṉô maô, g’ômwanja wi Peor, na g’ômwanja wi Kozbi, y’ômwaṉ’ômwantô w’ôvangiṉi wi Madyan, y’ômwareri yaô, w’ajônyô gô ntyugu y’evunga z’avegagi gw’inyanga nyi Peor.