Itangô 24 - Bibili 1927 (Omyene)

¹ Na gw’ayeṉi Balaam inè, Yeôva arondi gô saviṉ’Israèl, e pa kènda du ga nt’agèndi yè gw’inyongw’im̃ori gô dataṉa n’aganga w’abambô; ndô ageguny’ôzô wè gô nkôṽa y’itôve.

² N’arômbiṉi Balaam antyo mè, n’ayeṉi yè Israèl sènga p’ôlakô ga nt’ar’imbuṽe saô. N’iṉiṉa ny’Anyambyè ny’avegagi gôre waô.

³ N’avogi Balaam awulya inè: Igamba nyi Balaam, y’ômwaṉ’ôṉôm̃e wi Beor, Igamba ny’ôma wi r’antyo zange.

⁴ Igamba ny’ôma wi jogw’agamba m’Anyambyè, G’ômwanja w’ôma wi jeṉ’iyeṉô y’ôma wi ngulu yôdu Na g’ômwanja w’ôma wi puraṉa mbè wi r’antyo mè zange.

⁵ Mèpiṉi nde yi r’inagô so s’akuku, ô Yakob! Alwaṉô mo, ô Israèl!

⁶ My’are sambuṉô pa ga idèdè, Ga intyaga si re pyèrè n’ôrèmbo, G’aguwu mi re bèṉô pa ne Yeôva, Ga ikum̃e g’ôzamba w’aṉingô.

⁷ Aṉingô mi pôva avila gw’ikulu sè, N’ôwongo wè wi re teṽizô pa n’aṉingw’am̃enge. Ôgi wè wi dwaṉ’ ômpôlô vyagaṉô n’Agag, N’ipangiṉi sè si dwaṉa ni ngulu.

⁸ Anyambyè agogunyè avila gw’Egipt, Are gôre yè ga nyare yi ngulu. E ny’aṉongo mi kum̃aṉa gôre yè, E moguṉe pi yaô, arum̃a waô n’izongo yè.

⁹ Alèwi ampuva kwè ga liyoni, ga liyoni nyantô: Mande be nongunyè? Ôzaviṉô gôr’ôm’edu wi be saviṉo, N’ôzavô gôr’ôm’edu wi be savo!

¹⁰ N’avendi Balak pôlô gôre Balaam; n’aruli yè agoṽi, awulinye Balaam inè: My’aweyi wè gô sav’ilôvalôvi yam̃, na vôna vèṉo ô re saviṉa pa yô nyongo ntyarô.

¹¹ Sambô wanga, ko kènda gô nagô yo! My’awulya nè: Mi be po ôlubô, ndô Yeôva adegi wè gô dènga wô.

¹² N’awiṉizi Balaam gôre Balak inè: E! mi pa buliny’agende m’arôm̃yô wè gôre myè inè:

¹³ Vangaṉe Balak tô pa myè nagô yè ralye ni sika ya pupu na ya teṉateṉa, my’ayolye myèmè gô dende mbya ge mbe gô sir’ôzômbyô wi Yeôva; mi be kamba ga nte be bulye Yeôva?

¹⁴ Ndô vèṉo vôna, mi kènda gôr’iṉongo nyam̃. Ôvirô, mi be myezo ga nte be dend’iṉongo nyiṉo gôr’iṉongo nyam̃ gô gômbe num̃uṉa.

¹⁵ N’avogi Balaam awulya inè Igamba nyi Balaam, y’ômwaṉ’ôṉôm̃e wi Beor, Igamba ny’ôma wi r’antyo zange,

¹⁶ Igamba ny’ôma wi jogw’agamba m’Anyambye, G’ômwanja w’ôma mè wi my’imôndo s’Ôma w’Igôṉômè, G’ômwanja w’ôma wi jeṉ’iyeṉô y’ôma wi ngulu yôdu, G’ômwanja w’ôma wi puruṉa mbè wi r’antyo mè zange.

¹⁷ Mi jeṉè ndô aranga vèṉo, Mi pônè ndô aranga pyèrè. Ôgègèṉi wi kogwa avila gôre Yakob, Ôtôngô w’ôga wi kum̃aṉa avila gôr’Israèl. E bôl’izamba yi Môab Ko yè nyigyanyigy’awaṉa wi Sèt.

¹⁸ Edom ne iṉivi sè, E niva kè Seir, ilôvalôvi yè. Israèl e tum̃inye ngulu yè.

¹⁹ Ayè yi kogwa avila gôre Yakob e pangiṉa ni ngulu, E jôṉa waô wi pera avila gw’inkala.

²⁰ N’ayeṉi Balaam Amalèk. N’avogi yè awulya inè: Amalèk ne ôlônga gôr’aṉongo, Ndô e be jilizô gô ntyugu.

²¹ N’ayeṉi Balaam mongi Keni. N’avogi yè awulya inè: Ilwaṉô nyo nyi re jola, N’ikundu nyo nyi re nôgô pa gw’idô.

²² Ndô mwô’Keni e be sugô Gô be kôtô wè ne mongi Asur mbwedi.

²³ N’avogi Balaam awulya inè: E! mande be dwaṉa bo Anyambyè dwaṉizè pa?

²⁴ Ndô am̃atanga mi be bya avila gô Kitim, Mi be sônya mongi Asur, mi be sônya mongi Ebèr; N’ayè kè e be jilizô.

²⁵ N’agum̃aṉi Balaam, agènda, awinya gô nagô yè. N’agèndi kè Balak gô nkôṽi yè.