Itangô 23 - Bibili 1927 (Omyene)

¹ N’awulinyi Balaam Balak inè: Vangiṉa myè vèṉo imbôra si jirô intyagô ôrwageṉô, ko kekiza myè vèṉo inyare ôrwageṉô, n’adombè aṉôm̃e ôrwageṉô.

² N’alendi Balak ga nt’awulinyô yè ne Balaam; n’ayiri Balak ni Balaam gô mbôr’edu yi jirô intyagô nyare mori n’idomb’im̃ori.

³ N’awulinyi Balaam Balak inè: Gum̃aṉa pyèrè ni ntyagô yo yi pezô, na myè, mi be kènda, vendetwa Yeôva e be bya gô dataṉa na myè, gambèṉè mi be bulinyo ga nt’are yè gô myeza myè. N’agèndi yè gô mbôra ndôndwi.

⁴ N’aṽyeṉi Anyambyè g’ôzô wi Balaam, n’awulinyô yè ne Balaam inè: My’are panga p’imbôra si jirô intyagô ôrwageṉô, na jira pa gô mbôr’edu yi jirô intyagô nyare mori n’idomb’im̃ori.

⁵ N’aweli Yeôva agamba g’ôgwaṉa wi Balaam, awulyè inè: Winya gôre Balak, ko kamba gôre yè yeṉo.

⁶ N’awinyi Balaam gôre yè; na vôna, Balak avegagi kum̃aṉa pa pyèrè ni ntyagô yè yi pezô, ayè ni gogi yôdu yi Môab.

⁷ N’avogi Balaam awulya inè: Balak, ô re panga pa myè gô sum̃iṉa avila gw’Aram, Ôga wi Môab are panga pa myè gô sum̃iṉa avila gw’inômba si nkôṽa yi tongwa ni nkômbe inè: Ôvirô gô save Yakob! Ôvirô gô bendiṉ’Israèl!

⁸ Mi be sava sè ôma wi r’Anyambyè e pa sava du? Mi be benda sè ja Yeôva e pa benda du?

⁹ Mi jeṉe waô avila gô ntyay y’adô, Mi silya waô gô sanômba lôndwi; Waô ne iṉongo nyi dwaṉe ntyambè, Wi re w’arangô du gôr’aṉongo.

¹⁰ Mande yi re ko tange ntyèngè yi Yakob, Ge gô tete ntangô y’ereṉe zi nay z’Israèl? Mi ga yuwe ijuwa s’aṉaga wa gôre, Ko ntyay yam̃ dwaṉa ga waô.

¹¹ N’awulinyi Balak Balaam inè: Ô re denda p’ande gôre myè? My’alèki wè gô sav’ôlôvalôvi wam̃, na vôna, ô saviṉè!

¹² N’awiṉizi yè awulya inè: Mi ga ṽandam̃iṉe gô bulya ga nte sômbyô myè ne Yeôva g’ôgwaṉi wam̃?

¹³ N’awiṉizyô yè ne Balak inè: Sambô, ôvirô na myè gô mbôra nyèṉè vovo be jeṉo waô; ô be jeṉa waô kaô mbèy mori, w’ayeṉe waô dududu, ko sava waô vovo.

¹⁴ N’agèndyè yè gô ntyaga yi Sôfim, gw’esôsôlô zi Pisga; n’aṉôgi yè imbôra si jirô intyagô ôrwageṉô, n’ayiri yè gô mbôry’edu yi jirô intyagô nyare mori n’idomb’im̃ori.

¹⁵ N’awulinyi Balaam Balak inè: Gum̃aṉa vèṉo pyèrè ni ntyagô yo yi pezô, na myè, mi be kènda gô dataṉa n’Anyambyè.

¹⁶ N’aṽyeṉi Yeôva g’ôzô wi Balaam; aweli yè agamba g’ôgwaṉi wè, awulyè inè: Winya ko kamba yeṉo.

¹⁷ N’awinyi Balaam gôre yè, na vôna, Balak avegagi kum̃aṉa pa pyèrè ni ntyagô yè yi pezô, ayè ni gogi yi Môab. N’awulinyô yè ne Balak inè: Yeôva abulya sè?

¹⁸ N’avogi Balaam awulya inè: Gum̃aṉa, Balak ko jogo! Vôganyô gôre myè, ômwaṉ’ôṉôm̃e wi Sipor!

¹⁹ Anyambyè aranga du ôma wi re ko nôka, Ge ômwaṉ’ôṉôm̃e wi re ko nige nkôndi. Ayè bulya p’igamba, alende nyô? Ge ayè myeza p’ôsam̃u, alende wô?

²⁰ Vôna my’are dènga p’ôzômbyô gô saviṉa waô: Wi re saviṉô pa, my’arô kaluṉe wô du.

²¹ E pa pikilya du ibe gôre Yakob, Ge jeṉa du ifwem̃a gôr’Israèl; Yeôva, Anyambyè yè are na yè, Ayè ne ôgi wè, ayè ne igeṽi nyè.

²² Anyambyè agogunyi waô avila gw’Egipt Are gôre waô ga nyare yi ngulu.

²³ Ôganga w’abambô wi zele du gôre Yakob, Ge ôganga w’imbwiri gôr’Israèl; Gw’egômbe z’ijela e be bulyô gôre Yakob na gôr’Israèl inè, Eṽilô z’Anyambyè n’ande.

²⁴ Zô ne iṉongo nyi kum̃aṉa ga liyoṉi nyantô, Nyi kum̃aṉa ga liyoṉi nôm̃e; Nyi dèwa du kaô ny’anya im̃aṉô, Kaô ny’ajonge ntyiṉa ya mongi wi kwèrô vôra.

²⁵ N’awulinyi Balak Balaam inè: Azava waô ndô azaviṉa kè waô.

²⁶ N’awiṉizi Balaam awulinye Balak inè: Mi be dend’isam̃u yôdu yi be bulinyô myè ne Yeôva?

²⁷ N’awulinyi Balak Balaam inè: Sambô, ôvirô, mi be kèndyo gô mbôra nyèṉè; vendetwa yi be tondy’Anyambyè ko wè sav’iṉongo nyiṉo.

²⁸ N’agèndi Balak Balaam gw’esôsôlô zi Peor yi re swaswo n’itôve.

²⁹ N’awulinyi Balaam Balak inè: Nôgiṉa myè vèṉo imbôra si jirô intyagô ôrwageṉô ko kekiza myè vèṉo inyare ôrwageṉô n’adombè aṉôm̃e ôrwageṉô.

³⁰ N’alendi Balak ga nt’awulyi Balaam, n’ayiri yè gô mbôry’edu yi jirô intyagô nyare mori n’idombè im̃ori.