Itangô 22 - Bibili 1927 (Omyene)

¹ N’alubw’Israèl, azèng’ôlakô gw’idèdè yi Môab, gô ntye mori yi Yoridan swaswo ni Yerikô.

² Balak, y’ômwaṉ’ôṉôm̃e wi Sipor, ayeṉ’isam̃u yôdu y’alendyô ne Israèl gôre mongi Amôre.

³ Ni Môab aryeṉi pôlômè g’ômwanja w’aṉaga, konde w’avegag’awenge, agôtyô yè n’ererya g’ômwanja w’Israèl.

⁴ N’awulinyi Môab aṉèro wa mongi Madyan inè: Nkondo yiṉo yi ga nye yom̃a yôdu yi re kômbiṉa pa zwè, ga nte nye nyare am̃aṉi ambezô m’intyaga. Balak, y’ômwaṉ’ôṉôm̃e wi Sipor, ayè avegag’egômbe mè ôga wi Môab.

⁵ N’arôm̃i yè igende gôre Balaam, y’ômwaṉ’ôṉôm̃e wi Beor, gô Petor, yi re g’ôrèmbo gô ntye y’awaṉ’aṉôm̃e w’iṉongo nyè, gô kôvè, awulinyè inè: Vôna, aṉaga w’agogwi avila gw’Egipt wi buṉa gô ntye alwaṉa swaswo na myè.

⁶ Kokolo, ôvirô gô sav’aṉaga wiṉo konde wi re ngulu vyagaṉô na myè; vendetwa mi ko bôla waô ko miè suga waô avila gô ntye, konde my’avôrô inè, ayè yi saviṉô wè e be saviṉô, n’ayè yi savô wè e be savô.

⁷ N’alubw’aṉèro wi Môab n’aṉèro wi Madyan ni yom̃a yi mpagaga gôr’ôganga w’imbwiri. Aṽyeṉi waô gôre Balaam arakilyè agamba mi Balak.

⁸ N’awulinyô waô ne Balaam inè: Lèwaṉi ôgwèra wiṉo vèṉo, na mi be fwiṉiza ṉwè igamba ga nt’are Yeôva gô bulinya myè. N’alwaṉi gogi yi Môab gôre Balaam.

⁹ N’aṽyeṉi Anyambyè gôre Balaam awulya inè: Aṉôm̃e wiṉo wi re gôre wè wa mande?

¹⁰ Awiṉizi Balaam gôr’Anyambyè inè: Aṉôm̃e w’atôm̃ô ne Balak, y’ômwaṉ’ôṉôm̃e wi Sipor, y’ôga wi Môab, gô bulinya myè inè:

¹¹ Vôna, aṉaga w’agogwi avila gw’Egipt wi buṉa gô ntye: sambô yôgô gô sava waô, vendetwa mi ko nwa na waô, azuga waô.

¹² N’awulinyi Anyambyè Balaam inè: Agènda du na waô, azava du aṉaga mè, konde wi re saviṉô pa.

¹³ N’agum̃aṉi Balaam ibanga awulinyè gogi yi Balak inè: Gèndaṉi gô ntye yaṉi konde Yeôva abiki gô tiga myè gô kènda na ṉwè.

¹⁴ N’agum̃aṉ’ivangiṉi yi Môab, awinya gôre Balak, awulya inè: Balaam abika gô bya na zwè.

¹⁵ N’arô tôm̃i Balak gogi yèṉè yenge n’anyanga vyagaṉô ni gogi lônga.

¹⁶ N’aṽyeṉi waô gôre Balaam awulinyè inè: Yeṉo bulye Balak, y’ômwaṉ’ôṉôm̃e wi Sipor inè: Kokolo, alwaṉ’ezom̃a zi dego gô bya gôre myè;

¹⁷ konde mi be po ôlub’ômpôlô, na mi be dend’ezom̃y’edu zi re wè gô bulinya myè; kokolo, ôvirô gô sav’aṉaga mèwoṉo.

¹⁸ Awiṉizi Balaam awuliny’inyôngô si Balak inè: Vangaṉe Balak tô pa myè nagô yè ralye ni sika ya pupu na ya teṉateṉa, my’ayolye gô dend’ezom̃y’edu ezangô ge evôlô gô sir’ôzômbyô wi Yeôva, Anyambyè yam̃.

¹⁹ Ndô vèṉo, kokoloaṉi lwaṉaṉi vèṉo ôgwèra wiṉo, ko mi mya ga nt’are Yeôva, gô tô bulinya myè.

²⁰ N’aṽyeṉ’Anyambyè gôre Balaam ôgwèra, awulinyè inè: Gô re nè, aṉôm̃e wiṉo w’abyeṉi gô kôvo, gum̃aṉa ko kènda na waô; ndô ô be denda ga nte be bulinya myè wè.

²¹ N’agum̃aṉi Balaam ibanga, n’aweli yè ezom̃a zi dwaṉiṉa gw’ikavala gô buru yè, n’agèndi ni gogi yi Môab.

²² N’aṽend’Anyambyè pôlô konde agèndi; ni yenjèl yi Yeôva y’agum̃aṉi gô mpoṉo gô degè. N’agèndi Balaam panda pa gô buru yè, n’inyôngô sè mbaṉi s’avegagi na yè.

²³ N’ayeṉi buru yenjèl yi Yeôva nkum̃aṉaga gô mpoṉo n’ôkwari wè w’iwora bem̃eṉe g’ôgo; n’ayèrwi buru gô mpoṉo agènda gw’intyaga. N’awôli Balaam buru gô kèndya yô gô mpoṉo.

²⁴ Yenjèl yi Yeôva y’agum̃aṉi gô mpoṉo ntyo ntyaga y’igoli ntyo ntyaga y’igoli; izamb’imbaṉi yi mpoṉo y’avegagi nôgô p’ikômba.

²⁵ N’ayeṉi buru yenjèl yi Yeôva; n’ayèzi yô g’ôgômba, n’aṽangatyi yô ôgôlô wi Balaam g’ôgômba. N’arô bôlô yô ne Balaam nyongo nyèṉè.

²⁶ N’agèndi yenjèl yi Yeôva bô kwè, agum̃aṉa gô mbôra ya bôba, yi re yè ayolye gô kegwa gô nkôṽa yi nômyè ntyo gô nkôṽa yi nyantwè.

²⁷ N’ayeṉi buru yenjèl yi Yeôva, n’avuri yô ampuva gô ntye. N’aṽendi Balaam pôlô, awôle buru ni ntôngô yè.

²⁸ N’aṉunguṉi Yeôva ôgwaṉa wi buru, n’awulinyi yô Balaam inè: My’are wè denda p’ande gôre wè gô bôla myè vèṉo nyongo ntyarô?

²⁹ N’awiṉizi Balaam gôre buru inè: Konde nè ô sèlya myè; arwe nè my’are n’ôkwara bem̃eṉe g’ôgo, gavoṉo my’atô jôṉo pelè. Awulinyi buru Balaam inè:

³⁰ Myè arange buru yo yi pandô wè egômbe zôdu kwanga ṉèṉo wiṉo? My’are denda pa yeṉo ni mori gôre wè? Awiṉizi Balaam inè: Nyawè.

³¹ N’aṉunguṉi Yeôva antyo mi Balaam, n’ayeṉi Balaam yenjèl yi Yeôva nkum̃aṉaga gô mpoṉo ôkwari wè w’iwora bem̃eṉe g’ôgo, n’alèmbi yè mbè, avur’ôzô wè gô ntye.

³² N’awulinyô yè ne yenjèl yi Yeôva inè: Ntiṉa nde y’abôlo buru yo vèṉo nyongo ntyarô? Vôna, my’abya gô dego konde mèyoṉo yi re swaswo na myè ne mpoṉo y’ijiliza.

³³ Buru y’ajeṉa myè ko yô jèrwa vèṉo avila g’ôzô wam̃ nyongo ntyarô; arwe nè yi pa jèrwa avila gôre myè, gavoṉo my’atô jôṉo ko mi tôlize buru.

³⁴ N’awulinyi Balaam yenjèl yi Yeôva inè: My’afwem̃a konde mi pa mya inè, ô re kum̃aṉa pa swaswo na myè gô mpoṉo; na vèṉo, ja w’asèmba myè, gambèṉè mi be fwinya.

³⁵ N’awulinyi yenjèl yi Yeôva Balaam inè: Gènda n’aṉaga wiṉo; ndô ô be teta kaô agamba mi be bulinya myè wè. N’agèndi Balaam ni gogi yi Balak.

³⁶ Na gw’ayogyô Balak inè, Balaam abyeṉi, agogwi yè gô dataṉa na yè kwanga gô nkala yi Môab y’avegagi g’ôgômbiṉô w’Arnon g’ôm̃ôndô w’ôgômbiṉô.

³⁷ N’awulinyi Balak Balaam inè: Mi pa tôm̃’igende gôre wè gô kôvo? Ntiṉa nde yi re wè ô pa bya gôre myè? Sambô my’azele ni ngulu gô pendyo n’ôlubô?

³⁸ N’awulinyi Balaam Balak inè: Vôna, my’abyeṉi gôre wè, ndô vèṉo mi be dwaṉa n’inyanga gô buly’ezom̃a ga nte be dwaṉa zô? Mi be buly’agamba m’Anyambyè mi be fwel’ôgwaṉi wam̃.

³⁹ N’agèndi Balaam ni Balak, n’aṽyeṉi waô gô Kiryat‐Usot.

⁴⁰ N’ayiri Balak inyare n’adombè ntyagô, n’arôm̃i yè yô gôre Balaam na gôre gogi y’avegagi na yè.

⁴¹ Ibanga, Balak awongi Balaam n’avandyè yè gô Bamot‐Baal, vovo ayeṉi Balaam mbèy y’iṉongo.