Estèr 9 - Bibili 1927 (Omyene)

¹ G’ôgwèli w’igôm̃i ni mbaṉi, wô ne ôgwèli w’Adar, gô ntyugu y’igôm̃i ni ntyarô y’ôgwèli, ntyugu y’avegag’ôzômbyô n’ivanga ny’ôga gô dendô, na y’aleṽiṉ’ilôvalôvi y’Iju gô pangiṉa waô, gambèṉè igamba ny’avekwaṉi, ko Iju pangiṉ’ilôvalôvi yaô.

² N’alataṉ’Iju gw’inkali saô, gô lele yôdu y’ôga Asuerus, gô kôta waô w’aṽeli gô jeṉiza waô nkaza; e re pegeg’ôma w’ayolyi gô keṽe waô, konde itya s’agôt’aṉongo môdu.

³ N’ivangiṉi yôdu yi lele, n’ikômisèri, n’iguvèrnèr, ni mongi w’ayanjagi ṽilô y’ôga, w’aṉunguṉ’Iju, g’ômwanja w’itya si Mardôke s’agôti waô.

⁴ Konde Mardôke avegagi ni ngulu gô nagô y’ôga, n’elum̃i zè z’avazangaṉi gô lele yôdu, konde ngulu y’avendi gôre yè vyagaṉô na vyagaṉô.

⁵ N’awôl’Iju ilôvalôvi yaô yôdu n’ôkwara, ayôṉa waô, ayiliza waô; n’alendi waô ntondiṉi yaô gôre waô w’aṉumbi waô.

⁶ Gô Suse, nkala y’ôga, Iju w’ayôṉi ayiliz’inkam̃a s’aṉag’ataṉè,

⁷ n’ayôṉi waô Parsandata, Dalfon, Aspata, Pôrata,

⁸ Adalya, Aridata, Parmasta,

⁹ Arizay, Ariday, ni Vayezata,

¹⁰ igôm̃i ny’awaṉa w’Aman, y’ômwaṉa w’Amedata, y’ôlôvalôvi w’Iju. Ndô wi re kwèr’im̃aṉô.

¹¹ Gô ntyugu mèyoṉo, ntangô ya mongi w’ayônyô gô Suse, nkala y’ôga, w’aṽagô gôr’ôga.

¹² N’awuliny’ôga Estèr, y’ôg’ômwantô, inè: Iju w’ayôṉi, ayiliza gô Suse, nkala y’ôga, inkam̃a, s’aṉôm̃e ôtaṉè, n’igôm̃i ny’awaṉa w’Aman; sambô w’alendi ande gô lele mori y’ôga? ... Ô bamby’ande? Zi be pô wè. Ô pe bel’ande? Ô be bonga zô.

¹³ N’awiṉiz’Estèr inè: J’ôg’ajeṉa kwèkwè, Iju si re gô Suse si ga rigô gô tô dende mèṉè ga nt’ar’ôzômbyô wa ṉèṉo wiṉo, ko igôm̃i ny’awaṉa w’Aman banyô gw’erere.

¹⁴ N’azômby’ôga gô dendô yeṉo. N’ivanga ny’arakilyô gô Suse. N’aṽanyi waô igôm̃i ny’awaṉa w’Aman gw’erere;

¹⁵ n’arô dataṉ’Iju s’avegagi gô Suse gô ntyugu y’igôm̃i ni nay y’ôgwèli w’Adar, n’ayôṉi waô nkam̃a s’aṉôm̃e ntyarô gô Suse. Ndô wi pa kwèr’im̃aṉô.

¹⁶ N’Iju im̃ori s’avegagi gô lele y’ôga s’alataṉi, arôlize m̃èṉo yaô; ayowi waô avila gôr’ilôvalôvi yaô, n’ayôṉi waô agôm̃i m’intozèny ôrwageṉô ni ntozèny ôtaṉè sa mongi wi numba waô. Ndô wi pa kwèr’im̃aṉô.

¹⁷ Isam̃u yiṉo y’arweṉi gô ntyugu y’igôm̃i ni ntyarô y’ôgwèli w’Adar. Na gô ntyugu y’igôm̃i ni nay y’ôgwèli mèmô ayow’Iju, avangi waô yô ntyugu y’ôgeṽe n’igeṽa.

¹⁸ Ndô Iju s’avegagi gô Suse, s’alataṉi gô ntyugu y’igôm̃i ni ntyarô na y’igôm̃i ni nay, ayowi waô gô ntyugu y’igôm̃i n’ôtaṉè y’ôgwèli mèmô, avanga yô ntyugu y’ôgeṽe n’igeṽa.

¹⁹ Yeṉo Iju s’impindi, s’alwaṉag’inkala si r’ikômba fo, s’avangi ntyugu y’igôm̃i ni nay y’ôgwèli w’Adar, ntyugu y’igeṽa, na y’ôgeṽe, na yi fèti, n’arwazaṉagi waô yom̃a waô na waô.

²⁰ N’arèndi Mardôke isam̃u yiṉo, n’arwaṉizi yè yangô gôr’Iju sôdu s’avegagi gô lele yôdu y’ôga Asuerus, ya pyèrè na ya bô.

²¹ N’azômbyi yè waô gô penjavenj’ômpum̃y’edu ntyugu y’igôm̃i ni nay, ni ntyugu y’igôm̃i n’ôtaṉè y’ôgwèli w’Adar

²² ga intyugu s’ayowi n’Iju avila gôr’ilôvalôvi yaô, na gô penjavenj’ôgwèli wi r’ekèṽi zaô z’agalw’igeṽa, n’iwogi nyaô ny’agalwi ntyugu yi fèti na y’igeṽa yi twaṉizô yom̃a gôre waô na waô, ni mpagaga gôr’ikuge.

²³ N’avangaṉ’Iju gô denda ga nt’avakilyi waô ni nt’arèndiṉô waô ne Mardôke.

²⁴ Konde Aman, y’ômwaṉa w’Amedata, ya mw’Agag, ôlôvalôvi w’Iju sôdu, aliwô bôndi môndo gô jiliz’Iju, avunge pur, yô n’ezôga, gô jôṉa waô na gô jiliza waô;

²⁵ ndô gw’aṽyeṉ’Estèr g’ôzô w’ôga, ôga azômbyi ni yangô inè, môndo mbe y’Aman y’awôndyô yè gôr’Iju yi ga winye gw’ewônjô zè, ko yè banyô gw’erere, ayè n’awaṉi wè.

²⁶ Yeṉo aweyi waô intyugu siṉo inè, Purim, avila gw’ina nyi pur. Yeṉo g’ômwanja w’agamba môdu m’ezangô ziṉo, ni nt’ayeṉi waômè g’ômwanja wi ndaga yiṉo ni nt’arweṉi gôre waô,

²⁷ Iju w’awongi gôre waômè, na gôr’awaṉi waô, na gôre waôdu wi be diṽa gôre waô, ijivira n’ômpangaṉô gô pang’intyugu siṉo mbaṉi ômpum̃y’edu, ga nt’are sômbyô pa, ni ga nt’ar’egômbe tevô pa.

²⁸ Intyugu siṉo si re ko jônginyô alendôgô gw’ampôm̃a n’ampôm̃a, na gô nagw’edu yi mbuṽe, na gw’elely’edu, na gô nkaly’edu; ko intyugu siṉo si Purim s’aleṽaṉô du gôr’Iju, ge ijônginya sa sô pera gôr’awaṉi waô.

²⁹ Estèr, y’ôg’ômwantô, y’ômwaṉ’ômwantô w’Abikayil, ni Mardôke, ya mw’Iju, w’arèndi ni ngulu yaô yôdu nyongo yi mbaṉi gô joliz’ezangô g’ômwanja wi Purim.

³⁰ Arwazi waô yangô gôr’Iju waôdu, gô nkam̃a yi lele n’agôm̃i mi lele ambaṉi ni lele ôrwageṉô y’ôga Asuerus. Yangô y’avegagi n’agamba m’am̃ènjè na m’ôrèti,

³¹ gô dwaṉiz’intyugu siṉo si Purim gw’egômbe z’arevyô, ga nt’are Mardôke, ya mw’Iju, ni Estèr, y’ôg’ômwantô, dwaṉiza pa sô gôre waô, ni nt’are waô dwaṉiza pa sô gôre waômè na gôr’awaṉi waô, g’ômwanja wi peng’esônge zaô n’edingô zaô.

³² Yeṉo ôzômbyô w’Estèr w’ayolizi ntyale yi Purim; yeṉo arèndyô yô gw’ezangô.