Estèr 8 - Bibili 1927 (Omyene)

¹ Gô ntyugu mèyoṉo, ôga Asuerus aveṉi nagô y’Aman, ôlôvalôvi w’Iju, gôr’Estèr, y’ôg’ômwantô; n’awôm̃unyi Mardôke g’ôzô w’ôga, konde Estèr aliwô myezi ijaṉô s’avegagi yè na yè.

² N’arômb’ôga ôm̃ôrô wè, w’awongyô yè gôr’Aman, ava wô gôre Mardôke, n’alôṽy’Estèr Mardôke gô pangiṉe nagô y’Aman.

³ N’arô kambi Estèr g’ôzô w’ôga. N’avôswi yè gw’agôlô mè, aleṉa, agwenè inkolo gô tômbe ndaga mbe y’Aman, ya mw’Agag, y’agenjyô yè g’ômwanja w’Iju.

⁴ N’anyonyuṉ’ôga ôtôngô wi sika ya teṉateṉa gôr’Estèr, n’aṉongwi Estèr, agum̃aṉa gôre g’ôzô w’ôga.

⁵ Awulyi yè inè: J’ôga ajeṉa kwèkwè na ja my’are dènga p’imèpiṉô g’ôzô wè, na j’igamba ny’adwaṉa gôre gôr’ôga, na ja my’adwaṉ’ômbya gw’antyo m’ôga, ga rèndô ezangô zi fwiṉize yangô y’arèndyô ne Aman, y’ômwaṉa w’Amedata, ya mw’Agag, y’arèndyô yè gô jiliz’Iju wi re gô lele yôdu y’ôga.

⁶ Konde mi ko jolye sindiṉa sè gô jeṉe mbe yi be bya gôr’iṉongo nyam̃? ge mi ko jolye sindiṉa sè gô jeṉ’ijilizô si mbuṽe yam̃?

⁷ N’awuly’ôga Asuerus awuliny’Estèr y’ôg’ômwantô ni Mardôke ya mw’Iju inè: Vônaṉi, my’are pa pe nagô y’Aman gôr’Estèr, n’ayè are banyô pa gw’erere konde anyonyuṉ’ôgo wè gôr’Iju.

⁸ Sambô rèndaṉi g’ômwanja w’Iju ga nte be tonda ṉwè, gw’ina ny’ôga, ko dingilyaṉi zô n’ôm̃ôrô w’ôga; konde ezangô zi re tèndô pa gw’ina ny’ôga, alingilyô n’ôm̃ôrô w’ôga, z’ayolye kaluṉô n’ôma.

⁹ Gw’egômbe mèzoṉo aweyô irèndisi y’ôga, gô ntyugu y’agôm̃i ambaṉi ni ntyarô y’ôgwèli w’ararô, wô ne ôgwèli wi Sivan; n’arèndyô ga nt’avegag’isam̃u yôdu y’azômbyô ne Mardôke gôr’Iju, gôr’ikômisèri, na gôr’iguvèrnèr, na gôr’ivangiṉi yi nkam̃a yi lele n’agôm̃i mi lele ambaṉi ni lele ôrwageṉô yi re avila gw’Indya agènda gw’Etyop, na gw’elely’edu ga nt’are ntèndiṉi ya zô, na gôr’iṉongw’edu ga nt’are nèm̃è yaô, na gôr’Iju ga nt’are ntèndiṉi yaô, ni nt’are nkambiṉi yaô.

¹⁰ N’arèndi waô gw’ina ny’ôga Asuerus, alingilya zô n’ôm̃ôrô w’ôga. N’arwaṉizi waô yangô n’agende panda pa gw’ikavala na gw’imulèti s’ayanyô ne ikaval’inyantô.

¹¹ Gô yangô yiṉo, ôga aveṉ’Iju gô nkaly’edu y’avegôgô waô inyanga gô dataṉa ta, na gô tôlize m̃èṉo yaô, gô jiliza, gô jôṉa na gô maza vya, ni kèykèy yaô n’antô waô, waôdu avila gôr’iṉongw’edu, n’avila gw’elely’edu yi be bong’imyanga gô nw’igoṽi gô nwa na waô, na gô kwèr’igumbi nyaô,

¹² gô ntyugu mô, na gô lele yôdu y’ôga Asuerus, gô ntyugu y’igôm̃i ni ntyarô, y’ôgwèli w’igôm̃i ni mbaṉi, wô ne ôgwèli w’Adar.

¹³ Yangô yiṉo y’avegagi n’ezangô z’ivanga z’avegagi gô myezô gw’elely’edu, ko aṉongo môdu mya inè, Iju si be dwaṉa keka pa gô ntyugu mèyoṉo gô fwiz’ekôle gôr’ilôvalôvi yaô.

¹⁴ N’azunge kèndi agende, n’ôrara wôdu, panda pa gw’ikavala na gw’imulèti, ga nt’avegag’ôzômbyô w’ôga. N’amyezyô kè ivanga gô Suse, nkala y’ôga.

¹⁵ N’agogwi Mardôke avila gôr’ôga, ni ngoy y’ôga y’ôsolomèngèlè na ya pupu, ni kôrôṽa mpôlô yi sika ya teṉateṉa, n’ôrôgôsambala wi bisusi ni gelô. Nkala yi Suse y’awôgiṉi, ayeṉe mbya n’igeṽa.

¹⁶ Iju w’ayeṉi mbya n’igeṽa, ôlubô n’ivenda.

¹⁷ Gw’elely’edu na gô nkaly’edu, mbôry’edu y’aṽyeṉ’ôzômbyô w’ôga n’ivangi nyè, arweṉi mbya n’igeṽa gôr’Iju, n’igeṽe n’ifèti. N’awenge avila gôr’aṉongo mi ntye w’agalw’Iju, konde itya s’Iju s’aliwô akôti waô.