Estèr 7 - Bibili 1927 (Omyene)

¹ Yeṉo agènd’ôga n’Aman g’ôgeṽe gôr’Estèr y’ôg’ômwantô.

² N’arô buliny’ôga Estèr, gô ntyugu yiṉo yi mbaṉi, gw’ayongagi waô ivè inè: Ô bamby’ande, Estèr, y’ôg’ômwantô? Si be pô wè. Ô bel’ande? Vangaṉe y’adwaṉe mbèy y’ipangiṉi sam̃, yi be pô wè.

³ Awiṉiz’Estèr, y’ôg’ômwantô, inè: Ja my’are dènga p’imèpiṉô gw’antyo mo, ôga, na j’ôg’ajeṉa kwèkwè, gambèṉè siṉo ne ibambyi sam̃ inè, em̃èṉo zam̃ zi ga vô myè, na siṉo ne ibeli sam̃ inè, iṉongo nyam̃ nyi ga zungiṉô!

⁴ Konde azw’akôlyô, myè n’iṉongo nyam̃, gô jilizô, gô jôṉô, na gô mazô vya. Ndô arwe nè azw’agôlyô gô dwaṉ’asak’aṉôm̃e n’asak’antô, gavoṉo my’arô dwaṉi do, ndô ôlôvalôvi ayolye fwiṉiz’iperô s’ôga.

⁵ N’awuly’ôga Asuerus awulinye Estèr y’ôg’ômwantô inè: Ayè mande, are na gweṉi e kenja gô denda yeṉo?

⁶ N’awiṉiz’Estèr inè: Ôṽikisi n’ôlôvalôvi ne Aman, ôm’ombe wiṉo! N’ayègèryi Aman g’ôzô w’ôga na w’ôg’ômwantô.

⁷ N’agum̃aṉ’ôga, gw’eguṉu zè, avila g’ôgeṽe, agènda gô ntyaga yi nagô y’ôga. N’arigaṉ’Aman gô bambya g’ômwanja w’em̃èṉo zè gôr’Estèr y’ôg’ômwantô, konde ayeṉi nè, ôga aliwô kenji mbe g’ômwanji wè.

⁸ Gw’awiny’ôga avila gô ntyaga yi nagô y’ôga agènda gô ñanja y’ôgeṽe, ayeṉi yè Aman pôswa pa g’ôdô w’avegag’Estèr, n’awulyi yè inè: E be tô bangaty’ôg’ômwantô g’ôzô wam̃, gô nagô y’ôga? Gw’agogw’igamba nyiṉo avila g’ôgwaṉa w’ôga, w’avug ôzô w’Aman.

⁹ N’Arbôna, ôm̃ori gôr’ivanguṉe, awulyi g’ôzô w’ôga inè: Vôna, erere z’agekizyô ne Aman gôre Mardôke, agambi gô mbya y’ôga, zi re dôṽyô pa gô nagô y’Aman, elôndwinyi zi r’agôm̃i m’ikude ataṉè. N’awuly’ôga inè: Aman e ga ṽanyô gô zô!

¹⁰ Yeṉo aṽanyi waô Aman gw’erere z’agekizyô yè gôre Mardôke. N’avoṉ’eguṉu z’ôga.