Estèr 4 - Bibili 1927 (Omyene)

¹ Gw’ayogyô Mardôke isam̃u yôdu y’arweṉi, ayôkuṉi yè ingoy sè, aṉwaṉe pinde n’ômbu. N’agèndi yè gô garegare yi nkala ntôngaga n’ibuku ivôlô.

² N’aṽyeṉi yè kwanga g’ômpômbala w’ôga, w’alegyô gô jingiṉô n’ôm’edu avegagi bora pe pinde.

³ Gw’elely’edu, gô mbôry’edu y’aṽyeṉ’igamba ny’ôga n’ivangi nyè, arweṉ’iwog’ivôlô gôr’Iju; avengi waô esônge ntôngaga ni ndeṉaga, n’alèwi awenge gô pinde na g’ômbu.

⁴ N’aṽyeṉ’inyôngw’inyantô s’Estèr n’ivanguṉe yè gô bulinyè igamba, n’ayeṉ’ôg’ômwantô ekèṽ’evôlô. N’arwaṉizi yè ingoy gôre Mardôke gô borizè na gô pangè gô tômbe pinde yè, ndô e pa bonga sô.

⁵ Vovo awey’Estèr Atak, ôm̃ori gôr’ivanguṉe w’alôṽyô ne ôga gô kum̃aṉa g’ôzô w’Estèr, n’azômbyè yè gô kènda gô bambye Mardôke gô mya nt’avegagi yô ni nkôṽa y’avili yô.

⁶ N’aṽyeṉ’Atak gôre Mardôke gw’igala nyi nkala, swaswo n’ômpômbala w’ôga.

⁷ N’arakilyô yè ne Mardôke isam̃u yôdu y’arweṉi gôre yè, n’arevyè yè ntangô yi sika y’aliwô panganyô ne Aman gô pa gw’igumba ny’ôga g’ômwanja wi jôṉ’Iju.

⁸ N’avenyè yè kè ezangô z’ivanga myezô pa gô Suse g’ômwanja w’ijilizô saô, inè, e ga rum̃inye zô gôr’Estèr amyezè isam̃u yôdu, n’azômbyè yè inè, Estèr e ga gènde gôr’ôga gô bambyè imèpiṉô na gô kwenè inkolo g’ômwanja w’aṉagi wè.

⁹ N’aṽyeṉ’Atak arakily’Estèr agamba mi Mardôke.

¹⁰ N’azômby’Estèr Atak gô kènda gô bulinye Mardôke inè:

¹¹ Inyôngô sôdu s’ôga n’aṉaga wi lele y’ôga w’avôrô inè, ar’ivanga nyi sômby’ijôṉa gôr’ôm’edu, ôṉôm̃e ge ômwantô, e be jingiṉa gôr’ôga, are e pa fweyô, gw’evungu za gare; kaô ôma wi be nyonyuṉô ne ôga nkogu yè yi sika ya teṉateṉa, ayè be tôla. Ndô myè, mi pa fweyô gô jingiṉa gôr’ôga agôm̃i m’intyugu miṉo ararô.

¹² Gw’arakilyô agamba m’Estèr gôre Mardôke,

¹³ Mardôke azômbyi waô gô fwinya awulinye Estèr inè: W’avikilya inè, awè dadyè ô be tôla avila gôr’Iju sôdu konde nè ô re gô nagô y’ôga;

¹⁴ konde j’aw’adwaṉa do gw’egômbe ziṉo, gambèṉè iṉunguṉô n’itôlizô si be nongwa gôr’Iju avila gô mbôra nyèṉè, gambèṉè awè ni nagô ya reri yo aṉwè be jilizô. Mande re ko mya twa pa ô re bya pa gw’ipangiṉa gô ntiṉa mèyoṉo?

¹⁵ N’arôm̃’Estèr gô bulinye Mardôke inè:

¹⁶ Gènda, ko datiz’Iju sôdu si re gô Suse; ko pengiṉaṉi myè esônge ntyugu ntyarô; anyaṉi ge jonga, ôgwèra ge ôm̃anda. Myè kè n’inyôngô sam̃ inyantô azwè be peng’esônge egolaṉi mèmô, avila vovo mi tô jingiṉa gôr’ôga, vangaṉe yi zele swaswo n’ivanga, na ja myè ko pera, mi ga vere.

¹⁷ N’agèndi Mardôke, alend’isam̃u yôdu y’azômbyô yè ne Estèr.