Estèr 3 - Bibili 1927 (Omyene)

¹ Isam̃u yiṉo vya, ôga Asuerus avendi Aman, y’ômwaṉa w’Amedata, ya mw’Agag; avendizi yè alôṽy’ilwaṉô nyè gw’igôṉô ny’ivangiṉi yôdu y’avegagi na yè.

² Inyôngô sôdu s’ôga, s’avegagi g’ômpômbala w’ôga, s’alôṽ’akotolo azaviṉe Aman, konde yeṉo avegag’ôzômbyô w’ôga g’ômwanji wè. Ndô Mardôke e pa dôṽ’akotolo ge saviṉè.

³ N’inyôngô s’ôga, s’avegagi g’ômpômbala w’ôga, s’awulinyi Mardôke inè: Ntiṉa nde yi pavo ôzômbyô w’ôga?

⁴ N’arweṉi gw’agambagi waô na yè ntyugw’edu ko yè avôganyô waô, awulinyi waô Aman igamba, gô jeṉa vendetwa ndaga yi Mardôke yi be dwaṉa; konde aliwô abulinyi waô inè, ayè mw’Iju.

⁵ N’ayeṉ’Aman inè, Mardôke e pa dôṽiṉè akotolo ge saviṉè. N’ayônyi Aman n’eguṉu ralye;

⁶ ndô aṽiki gô taly’ago gôre Mardôke, konde w’aliwô bulinyi yè ôṉongo w’aṉaga w’avegag’aṉaga wi Mardôke, n’awut’Aman gô jiliz’iṉongo nyi Mardôke, Iju sôdu s’avegagi gw’ipangiṉa sôdu s’Asuerus.

⁷ G’ôgwèli ôlônga, wô ne ôgwèli wi Nisan, g’ômpum̃a w’igôm̃i ni mbaṉi w’ôga Asuerus, avungi waô pur, yô ne ezôga, g’ôzô w’Aman, ntyugw’edu n’ôgwèly’edu, kwanga g’ôgwèli w’igôm̃i n’ambaṉi, wô ne ôgwèli w’Adar.

⁸ N’awuliny’Aman ôga Asuerus inè: Ar’iṉongo, gw’intye sôdu si pangiṉô wè, nyi re pazangaṉa pa ni ntyambe gôr’aṉongw’am̃ori, nyi re n’ampanga mi bangwaṉa avila gôr’aṉongw’am̃ori môdu, na nyi pa penjavenj’ampanga m’ôga. E zele kwèkwè gôr’ôga gô tig’iṉongo mènyoṉo kendekende.

⁹ J’ôga atonda, gambèṉè ga rèndô inè, aṉaga mè wi ga yilizô; ko mi pisa igôm̃i ny’intozèny s’italènti si sika ya pupu gw’ago ma mongi wi re gô wônjô yi ṽilô, gô baga yô gw’igumba ny’ôga.

¹⁰ N’azoduṉ’ôga ôm̃ôrô wè avila g’ôgo wè, ava wô gôr’Aman, y’ômwaṉa w’Amedata, ya mw’Agag, ôlôvalôvi w’Iju.

¹¹ N’awuliny’ôga Aman inè: Sika y’apenyô wè, n’aṉaga mèwoṉo kè, lenda na waô nte be tondo.

¹² N’aweyô irèndisi y’ôga gô ntyugu y’igôm̃i ni ntyarô y’ôgwèli ôlônga, n’arèndyô nt’avegag’isam̃u yôdu y’azômbyô ne Aman, gôr’ivangiṉi y’ôga, na gôr’iguvèrnèr si lely’edu, na gôr’ivangiṉi y’iṉongw’edu, na gw’elely’edu ga nt’are ntèndiṉi ya zô, na gw’iṉongw’edu ga nt’are nkambiṉi ya nyô. Y’arèndyô gw’ina ny’ôga Asuerus, alingilyô n’ôm̃ôrô w’ôga.

¹³ Yangô y’arôm̃yô n’agende gô lele yôdu y’ôga, gô jiliza, na gô jôṉa, na gô sulize Yuda waôdu, awanjo n’aṉèro, kèykèy n’antô, gô ntyugu mô, gô ntyugu y’igôm̃i ni ntyarô y’ôgwèli w’igôm̃i ni mbaṉi, wô ne ôgwèli w’Adar, ko igumbi nyaô kwèrô im̃aṉô.

¹⁴ Yangô mèyoṉo y’avegagi n’ezangô z’ivanga z’avegagi gô myezô gw’elely’edu inè, aṉaga waôdu wi ga lwaṉe keka pa gô ntyugu mèyoṉo.

¹⁵ N’agènd’agende ni mangô, ga nt’avegag’ôzômbyô w’ôga. Ivanga ny’amyezô kè gô Suse, nkala y’ôga; ndô gw’avegag’ôga n’Aman baru gô jonga, nkala yi Suse y’agôtyô itya sipôlô.