Estèr 2 - Bibili 1927 (Omyene)

¹ Isam̃u yiṉo vya, gw’ayèk’eguṉu z’ôga Asuerus, avikilyi yè Vasti, ga nt’are yè denda pa, ni nt’are teṉizô pa g’ômwanji wè.

² Vovo awulyi mongi w’ayanjiṉag’ôga inè: Ôga e ga wutiṉô ilèngwaṉi y’antô, azali mi re mi pa dèwa n’ôṉôm̃e ni mori n’eranga;

³ ôga e ga lôṽye gw’intye sôdu s’ipangiṉi sè ikômisèri ko sô datiz’ilèngwaṉi yôdu y’antô, azali mi re mi pa dèwa n’aṉôm̃e ni mori n’eranga, gô Suse, nkala y’ôga, gô nagô y’antô, wi penjavenjô ne Ege, y’ôvanguṉe w’ôga n’ôvenjavenji w’antô, ayè be pa waô yom̃a yi re n’isolo gô bor’ôkuṽa;

⁴ n’ôlèngwaṉi w’ômwantô wi be tondy’ôga e be dwaṉ’èg’ômwantô gô mbôra yi Vasti. N’igamba nyiṉo ny’arondy’ôga, n’alendi yè yeṉo.

⁵ Avegagi gô Suse, nkala y’ôga, mw’Iju, ini nyè ne Mardôke, y’ômwaṉa wi Yair, y’ômwaṉa wi Simèy, y’ômwaṉa wi Kis, ôma wi Benyamin,

⁶ aṽagyô avila gô Yerusalèm gôr’ikôte y’arwanyô ni Yekônya, y’ôga wi Yuda, ne Nebukadnezar, y’ôga wi Babèl.

⁷ Avômyi Adasa, ayè ne Estèr, y’ômwaṉ’ômwantô wi mbalu wè; konde e re pegege ni rerè ge ngwè. Ôlèngwaṉi w’ômwantô avegagi ni ntôra mbya ni mèpe jeṉô. Gw’ayuwi reri yè ni ngi yè, Mardôke awongi yè gô dwaṉ’ômwaṉi wèmè.

⁸ N’arweṉi gw’amyezô ôzômbyô w’ôga n’ivangi nyè, na gw’alatizyô ntangô mpôlô y’ilèngwaṉi y’antô gô Suse, yi nkala y’ôga, gô penjavenjô ne Egay, Estèr kè awongyô, agèndyô gô nagô y’ôga, penjavenjô pa ne Egay, y’ôvenjavenji w’antô.

⁹ N’ôlèngwaṉi w’ômwantô arondyi yè, alèng’imèpiṉô g’ôzô wè; n’azunge peṉi yè yom̃a y’avegagi n’isolo gô bor’ôkuṽi wè na gô nyezè, avenyè yè kè ilèngwaṉi y’antô ôrwageṉô y’avinjyô avila gô nagô y’ôga, n’alôṽyè yè n’ilèngwaṉi y’antô yiṉo gô mbôra mbyamè gô nagô y’antô.

¹⁰ Estèr e pa diwô atev’aṉagi wè ge ijaṉô sè, konde Mardôke aliwô adegi yè inè, arakilya isam̃u mèyoṉo.

¹¹ N’agombagi Mardôke ntyugw’edu gw’evungu zi nagô y’antô, gô mya nte kènde Estèr ni nte dendiṉô yè.

¹² Ôlèngwany’edu w’ômwantô agèndagi gw’egômbe zè gôr’ôga Asuerus, ayè dwaṉa pa igôm̃i ny’agwèli n’agwèli ambaṉi gô denda ga nt’avegagi sômbyô pa gôr’antô gô denda; gw’egômbe mèzoṉo w’aṽandam̃iṉagi g’ômwanja w’ijombunyô saô, agwèli ôrôṽa n’agali mi mira, n’agwèli ôrôṽa ni nardi ni ya yi nkangô y’alendôgô gôr’antô.

¹³ Yeṉo agèndag’ôlèngwany’edu w’ômwantô gôr’ôga; na gô pyagaṉè gô nagô y’antô agènda gô nagô y’ôga arigyô gô bong’ezom̃’edu z’aṽelyô yè.

¹⁴ Nkôlô agèndi yè, n’ôwenja kôze avyagaṉi yè gô nagô yi mbaṉi y’antô, y’avenjavenjôgô ne Saasgaz, ôvanguṉe w’ôga n’ôvenjavenji w’aronda. E pa tô fwinye nyèṉè gôr’ôga, kaô ôga atonda ko yè tet’ini nyè.

¹⁵ Ndô gw’agek’egômbe z’Estèr, y’ômwaṉ’ômwantô w’Abisail, yi mbalô yi Mardôke, awongi yè gô dwaṉ’ômwaṉi wèmè, gô jingiṉa gôr’ôga, e pa bamby’ezom̃’ezèṉè kaô nt’arum̃inyi Egay, y’ôvanguṉe w’ôga n’ôvenjavenji w’antô. N’alèng’Estèr imèpiṉô gw’antyo ma waôdu w’avônagi yè.

¹⁶ N’agèndyô Estèr gôr’Asuerus y’ôga, gô nagô yè y’ôga, g’ôgwèli w’igôm̃i, wô ne ôgwèli wi Tebèt, g’ômpum̃a w’ôrwageṉô w’ipangiṉi sè.

¹⁷ N’arond’ôga Estèr vyagaṉô n’antô am̃ori waôdu, n’alèngi yè imèpiṉô ni nkèngo g’ôzô wè vyagaṉô n’ilèngwaṉ’im̃ori yôdu y’antô. N’aweli yè kôrôṽa y’ôga gw’ewônjô zè, avangè ôg’ômwantô gw’inyanga nyi Vasti.

¹⁸ N’avang’ôga ôgeṽe ômpôlô gôr ivangiṉi yè yôdu n’inyôngô sè, ôgeṽe gô dub’Estèr; n’aveṉi yè ijowa gô lele yôdu ave mpagaga ga nt’ar’ôyôgô w’ôga.

¹⁹ Gw’alataṉ’ilèngwaṉi y’antô nyongo yi mbaṉi, Mardôke avegagi dwaṉa pa baru g’ômpômbala w’ôga.

²⁰ Estèr e pa diwô atev’ijaṉô sè ge aṉagi wè, konde Mardôke aliwô adegi yè, n’alendagi Estèr ôzômbyô wi Mardôke mbyambye pôlô egolaṉi g’egômbe z’avôm̃yè yè.

²¹ Gw’egômbe mèzoṉo, gw’avegagi Mardôke dwaṉa pa baru g’ômpômbala w’ôga, Bigtan ni Terès, ivanguṉe mbaṉi y’ôga, ivenjavenji y’ômpômbala, w’avendi, aṽela gô taly’ôgo gôr’ôga Asuerus.

²² N’amyeṉi Mardôke igamba amyeza nyô gôr’Estèr y’ôg’ômwantô, n’arakilyô nyô ne Estèr gôr’ôga gw’ina nyi Mardôke.

²³ N’awutyô igamba, n’alèngyô nyô inè, nyi re rèti; yeṉo aṽanyô ivanguṉe mbaṉi gw’erere. N’arèndyô igamba gw’ezangô zi Krôniki g’ôzô w’ôga.