Sinulo 1 - MUKANDA WANZAMBI

Cha Yesu Kristu chasonekeliyi Yowanu

¹ Chimwekeshu chaYesu Kristu chamumwekesheluwu kudi Nzambi, kulonda aleji ambuŋindi yuma yikukeŋa kumwekana mumafuku akadi kuvula. Watemesheli kaŋelu kindi nakuyishimuna kudi kambuŋindi Yowanu.

² Yowu washimwini wunsahu wamazu aNzambi nimwashimwiniyi Yesu Kristu, yoyuma yamweniyi yejima.

³ Yowu wukutaŋila akwawu nako-oleki, ninawa akutiya mazu awuprofwetu iwu anakooleki, akuhemba yuma yanasonekuwu mwenimu; muloŋa mpinji keŋa yishiki.

⁴ Ami Yowanu nasonekeli yipompelu yekala muAsiya yitanu nayiyedi. Luwi lwikali nanenu nikuwunda kwakufuma kudi owu wekala kwoku, wadiŋi kwoku, wamba kenza; kwakufuma nikudi aspiritu ekala kumesu etanda dindi dawanta atanu nayedi;

⁵ kwakufuma nikudi Yesu Kristu, yowu chinsahu washinshika, yowu wedi wamudi afu, yowu nyuli yawanyanta aheseki. Yena watukeŋa watuwelesheli nyiloŋa yetu namashi indi.

⁶ Watwilishili twi kali wanta, atupristu twaNzambi yindi, yowu Tata. Kulema niwanta wikali windi haya nyaka nanyaka. Amena.

⁷ Talenu, hakwinza namavu, antu ejima akamumona namesu, niwena amupwikili; ninyuza yejima yaheseki yakamudila makumbu. Mwamweni. Amena.

⁸ Yehova Nzambi wekala kwoku, wadiŋi kwoku, wamba kenza, Watwesha yejima nindi, Ami yami Alefwa, yami Omega.

⁹ Ami mana kwenu Yowanu, mukwakumwena hamu nenu ihuŋu niwanta nikutatakena kwamudi Yesu, nadiŋi hachitutu, ijina dachu Patamosa, kukoola mazu aNzambi, nikushimuna nsaŋu yaYesu.

¹⁰ Nadiŋi mudi Spiritu hefuku daMwanta; hinukutiya kunyima izu davuma neyi mpùŋa,

¹¹ nindi, Ami yami Alefwa, yami Omega, yami Tachi, yami Nkumininaku. Yiwukumona yisoneki mumukanda, wutemeshi kuyipompelu yitanu nayiyedi yekala kuEfwesesa, nikuSimirina, nikuPeriŋamu, nikuTiyatira, nikuSaradisa, nikuFwiladelifwiya, nikuLayodikeya.

¹² Hinukubalumuka nami nitali izu dinahoshi nanami. Chinabalumuki nimona nimanoŋu awuru atanu nayedi.

¹³ Mukachi kamanoŋu mudi wudi neyi Mwana kamuntu, navwali ihina dakuluka nikunyendu, kwibwambu kudi mukwatu wawuru.

¹⁴ Mutu windi ninsuki jindi jitooka to-o neyi wanda wutooka, chikwanvula yamalola; nimesu indi adi neyi muzuzu wakesi;

¹⁵ ninyendu yindi yidi neyi wuneŋu wakekema, wakoseka dehi muluteŋu; niizu dindi didi neyi kuvuma kwameji amavulu.

¹⁶ Muchikasa chindi chachidiilu mudi tutumbwa tutanu natuyedi; mukanwa kindi mwedika mpoku yakabali yatwa, yikweti wumwemu kuyedi; kumesu indi kudi neyi chatoŋekaŋa itaŋwa naŋovu.

¹⁷ Chinamumweni hinukudimbukila kunyendu yindi neyi nimufu hohu. Hakunnaŋika chikasa chindi chachidiilu nindi, Bayi wutiya womaku, yami Tachi, yami Nkumininaku,

¹⁸ yami Mumi; kufwa nafwili, hakwinzichi nahanda haya nyaka nanyaka. Nsapi jakufwa nŋakaluŋa jidi nanami.

¹⁹ Dichi sonekaku yuma yiwunamoni, niniyi yiduku, niyuma yamba kenza kukukuminina.

²⁰ Nsaŋu yakujinda yatutumbwa tutanu natuyedi tuwunamoni muchikasa chami chachidiilu, niamanoŋu awuru atanu nayedi; tutumbwa tutanu natuyedi hiyaŋelu ayipompelu yitanu nayiyedi; nimanoŋu, atanu nayedi hiyipompelu yitanu nayiyedi.