Mukaanda kuri bari Filipo INTRO1 - Musamu Wamubwete 2013Nkotulu Pawulo watinini mukaanda wumawu kuri bari ku Filipo, mu ntaangu yi kaba mu boroko. Filipo yaba nkuumbu mbyaasi bari Loma (Filipo dyamoolo dya ku Makedonya, taayi dya Alekandere Mukuutu), ngo balukiri bvula. Ha kayensi ku budyeengi bwa nyikusulu Musamu Wamubwete, mu luyende lwadzoolo, Pawulo kabariri dibuundu mu bvula didyo (Kutala mu Biy 16.12-40). Ba mu dibuundu dya Filipo baba bvulu-bvulu, baatu bafumuna mu bungooyi. Bari ku filipo baba na kintwaari kyakibwe na Pawulo. Baba muhekaana lubakusu lwa mboongo mu mantaangu makaka. Bo baheekiri Epaforodito mu kweemumono na kumunatikina lubakusu. Ngo kasi keendaana kukwo bwiiri kubeele; hasiiri ha ntele nkani wafwiiri. Ngo Nzaambi wamubakisa na wamutsinikisa. Bu katsiinika, Pawulo wamubvutula ku Filipo. Nde watina mukaanda mu kuyaabisa mampolo maandi, mu kubvutula matoondo kuri bari Filipo, na mu kubasyaamisa. Mu mbandukulu (1.1-11), Pawulo wuri mu kumono kiminu, na wuri mu kubvutula matoondo kuri bari Filipo. Ha mambisa haho, nde wuri mu kudzoonsolo mu misamu mitariri kisalu kya nde-meene, na mu mitariri kintwaari kya mu Yesu Kiristo (1.12-26). Wuri mu kusyaamisa se bari Filipo mu kuba bakwiikama mu kanyi, mu kuba na nyukusunu bo na bo, kunsa nkulukulu na ntumumunu bifumunaa kuri Yesu Kiristo (1.27-2.18). Nde wubayaabisa kuri ti, sa kaheeke Timoteho mu kubasyaamisa, na nde-meene Pawulo se sa keende mu kubamono (2.19-30). Pawulo wuri mu kubalubula ti, basa madyeele mu bisari byabibi. Wubaloombo mu kunama kifwaani kya nde, wuri nde se wukwenama kifwaani kya Kiristo (kik. 3). Ku manunu mukaanda, Pawulo wuri mu kuha mandoongi ma bitsuumbu-bitsuumbu, wubvutula matoondo, na wuha mamboto (kik. 4). |
Nouveau Testament Beembe © Bible Society of the Republic of Congo, 2013.
Bible Society of Congo (Republic)