Sofoniyas 2 - Ɗû na sɗik na wiini Alaw

Yiki burini hi-miy

¹ Tipi siki amai, hiini, tiki pinzibaɗi ɗai na siyer arki kai

² Wuzani hlai na seŋ n'a muɗa aga a va, na mefeŋ zi hiy a vuga maini bra nɵa, wuzani gizini hiy n'abai na wiini EPIƊ-ƊAI wuzani gizini hiy na wiini EPIƊ-ƊAI,

³ Piyi EPIƊ-ƊAI tiki paŋ na hangalai na midiɗi yai, na ki zi pin gadai na jre na wiini, piyi jre-ɗikat, piyi hûsini-si, ablaŋtaŋkai aga ki kûrɗi ɗi, war mefeŋ zi hiy na wiini EPIƊ-ƊAI.

Seŋ n'a na biyiɗi ɗai na piɗi futi koskoi

⁴ Gaza aga te hina edi, Askalon aga te ɓulka edi, Asdod aga e birgiti edi girvudi n'arba, Ekron aga te hurɗa amai.

⁵ Haw gara buriɗi ɗai n'agoɗom min yem-ra n'abai, buriɗi Kretekai, seŋ na wiini EPIƊ-ƊAI a muɗa na muduku, Kanaan, afti na wiiɗi Filistrekai, aga mu tuuruku edi, ɗif ktai ma aga a hina warku kai.

⁶ Hlai n'agoɗom min yem aga a bunda aŋ hlai na farai a suma warni, aŋ vowai zi kuzum wiiɗi ɗai zi gɗam, gaini ɵaɓ na wiini farai,

⁷ nagai n'aga e kûrɗi war pinzibani Yuda aga e simni war hlai hanɗa, aga e giɗimi faraiɗi woni, e zizini hlaiɗi zi feŋ na koskoi amlai war dalamni Askalon, buri EPIƊ-ƊAI Alaw na wiiɗi aga a zina piɗi, simniɗi aga a bunda.

Seŋ siɗi ɗai na piɗi futi na dawai par

⁸ Mu ɵina tirki na wiiɗi Mowab gaini Ammon, gaini miisi na miisiɗi ɗaiŋa gaini ya, e fiki amai siɗi ɗaiŋa aŋ mili aftiɗi.

⁹ Buri nɵa mu na kara: a muɗaŋ a EPIƊ-ƊAI zi spak paŋ, Alaw na wiiɗi Izrayel Mowab aga te bunda maiɗi Sodoma nɵa alini Ammon maiɗi Gumura nɵa lai. A hlai n'a va gaini evek na meefeŋ, a waŋ na wiini manta, a hlai n'a tuura edi haa kureɗ. Piɗi ɗaiŋa n'e hini aga e virmiɗi, piɗi n'a hina aga e simni war balamɗi ɗa.

¹⁰ Hanɗa a wala n'aga e niviŋ burini kûlûni-si na wiiɗi buri e tirkiɗi ɗai na wiini EPIƊ-ƊAI zi spak paŋ, e fiki amai siɗi ɗaiŋa aŋ mili aftiɗi lai.

¹¹ EPIƊ-ƊAI aga a faka amai siɗi gaini hiy n'abai, alawai na war duniya paŋ aga a hûsiɗi azumai, pinzibaɗi ɗai paŋ koo na gaigai ɗi aga e hûrgû azumai wuzani, ɗif paŋ a za hanɗa ɗa ahani dam dam.

Seŋ siɗi ɗai n'amai gaiɗi n'azumai

¹² Tiki ɗai na war Nubiya kaw, kaɵkarŋa aga a fiɗiki edi.

¹³ Aga a wa tini midini gal n'azumai sek, aga a viditi Asiriya edi. Ninive aga a tûûriti edi, aga te bunda maini basga na kaɗataŋ nɵa.

¹⁴ Farani farai aga a fana ɗa aha warɗi, gaini pinzibani wazagai n'ezini puɗu puɗu na kiini kiini na maini nɵa: Tukturuk gaini akusokusai aga e fini arbani gaarakai na warni fuŋ ɗa. wule aga a wasi arni fenetre ɗaw, war mini hlai par tar a tûrû n'edi, luwuŋ Sedre aga e virmiŋ.

¹⁵ Fuŋ n'abai na gaini firiyi, na sumna war ɵeɗ, n'a na ka a muɗa: Sai mu ta, zamai asiya ɗa? A bunda aŋ afti na gaini tûûri kaca kaca, hlai zi feŋ na wiini wazagai na basga. Nagai paŋ n'e vigi ɵimaɗi ɗaw aga e yibi hûwit, aga e yimi tiɗi pise pise.