फिलिप्पी 2 - मध्य पुरविया थारूखिरिस्टके नमरता 1 यदि खिरिस्टमे रहलाके कारन तुसब कुछ उत्साह पाबनेचिही, या ओकर परेमसे तुसब कुछ सानत्वना पाबनेचिही, या पबितर आत्माके संगती पाबनेचिही, या एक दोसरसङे परेम आ दया करैचिही त, 2 तुसब एकेमन भ्याके, एके परेममे रैहके आ एक चित भ्याके हमर आनन्द पुरा कर। 3 आपन मातरे भलाइ नै खोज आ अहङकारमे कुछ नै कर, महज नमर्तामे एक दोसरके आपनसे बरका ठान। 4 तुसब आपने भलाइ नै खोज, महज दोसरके भलाइके सेहो देख। 5 तोरासबमे एहेन मन हेबे, जे खिरिस्ट येसुमे छेलै। 6 उ बास्तममे परमेस्वर छेलै, महज परमेस्वरके बाराबरी हैबला बातके बिचार नै करल्कै। 7 महज आपने इक्छासे यि सब छोरल्कै, कमाराके रुप धारन कैरके, मानबके रुपमे जलम लेल्कै। 8 उ मानबके रुप धारन कैरके आपनके नम्र बनाइल्कै आ मिरतु तक मातरे नै, कुरूसके मिरतु तक आग्याकारी भ्याके रहलै। 9 ओहैसे परमेस्वर ओकरा सबसे उच बनाइल्कै आ ओकरा उ नाम देल्कै, जे सबनामसे उच छै। 10 चाहे स्वरगमे, पिरथिबी उपर आ पिरथिबीके निचा हेबे, सबकोइ येसुके नाउमे ठेङहुनिया दैलेपरतै। 11 सबकोइ परमेस्वर पिताके महिमाके लेल येसु खिरिस्टके परभु कैहके सुइकार करेपरतै। सन्सारमे चम्कैबला इजोत 12 अहैलेल हमर पिरिय भाइ-भैयासब, जनङ तोरासब सबदिन आग्यापालन करैत एलचिही, हमर उपस्थितीमे मातरे करल जखा नै, महज आब औरो बेसिसे हमर अनुपस्थितीमे आदर आ डर मानैत तुसब आपन मुक्तीके काम पुरा करैके लेल एकदमसे मेहनत कर। 13 कथिलेकी परमेस्वर तोरासबमे सबदिन काम कैरते आबैछौ। उ तोरासबके ओकर असल उदेसके काम पुरा करैके मन आ सक्ती दुनु देतौ। 14 गनगन आ बाद-बिबाद नै कैरके सबकाम कैरते जो। 15 अहिनङ तुसब पापी आ दुस्ट पुस्ताके बिचमे दाग नै भेल परमेस्वरके बेटा-बेटी जखा निरदोस आ सुध हेब्ही। जनङ तरासब अकासमे चमचम चम्कैछै, तहिनङे तुहुसब यि सन्सारमे ओइसबके बिचमे चम्कैले परतौ। 16 जिबन दैबला बचनके पकैरके राख। ओनङ करबिही त हमर करल मेहनत आ परिसरम बेरथ नै भेलै कैहके खिरिस्टके दिनमे हमरा गर्भ करैके मौका भेटतै। 17 यदि तोरासबके बिस्बाससाथ करल सेबाके कामके खातिर हमरा लहु बहाबैले परतै तैयो हम खुसिसे बहेबौ आ तोरेसबसङे आनन्द मनाइबौ। 18 तहिनङे तुहुसब खुसी हो आ हमरसङे आनन्द मना। तिमोथी आ इपाफोरोडिटस 19 परभु येसुके इक्छा हेतै त हम जल्दिए तिमोथीके तोरासबलग पठाबैके आसा करैची, ताकी तोरासबके हाल-समाचार सुइनके हम्हु खुसी हैले सकी। 20 तिमोथी जखा तोरासबके सुध मनसे वास्ता करैबला असल लोक त हमरसङे औरो कोइ नै छै। 21 औरो लोकसब त आपने धुनमे लागलछै, येसु खिरिस्टके बारेमे वास्ता करैबला कोनो लोक नै छै। 22 तोरासबके थाहे छौ, कि तिमोथीके बेबहार असल छै। जनङ बेटा आपन बाबुके साथ दैछै तहिनङे उ हमरसङे सुसमाचार परचारके काममे हमरा साथ देल्कै। 23 ओहैसे हम आसा करैचियै, कि हमरा कि-कि हेतै से थाह पाबते मातर हम तिमोथीके तोरासबलग पठेबौ। 24 हमरा परभुमे पुरा भरोसा छै कि हम तोरासबलग जल्दिए आबैले सक्बै। 25 आपनसबके भाइ, इपाफोरोडिटसके हम तोरासबलग पठाबैके आबसेक देखलियै। हमसब दुनु सङे-सङे काम करलियै आ सुसमाचार सुनाइबला काममे दुख भोगलियै। उ तोरेसबके दुत चियौ, जकरा हमर सहायताके लेल तुसब पठाइने छेल्ही। 26 तोरासबके भेटैके ओकर एकदम इक्छाछै। उ बिमार परल बात तुसब सुनलासे उ एकदम चिन्ता कैररहलछै। 27 साँचोके उ बिमार पैरके मरैले लागल छेलै, महज परमेस्वर ओकर उपर दया करल्कै। ओकरा मातरे नै महज हमरा दुख उपर दुख नै हेबे कैहके हमरो दया करल्कै। 28 ओहैलेल हम ओकरा पठाबैके लेल औरो बेसी इक्छा करनेचियै ताकी ओकरा फेनसे देखके तुसब खुस हेब्ही आ हमरो चिन्ता कम हेतै। 29 परभुमे ओकरा भाइ समैझके खुसिसाथ स्वागत कर आ एहेन लोकसबके आदर करैले परैछै। 30 कथिलेकी उ खिरिस्टके काम करैके लेल मिरतुके मुहमे परल छेलै। तुसब हमर लेल पुरा करैले नै सकल सेबा उ पुरा करल्कै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.