Smasmalkra INTRO1 - DAWAN BÎLA AISKATÂ BÎLA NANI Naha wauhkataya nina pali ba lika Hibru ra Qohélet, tânka ba asla takanka tâ bri ba, apia kaka, “witin mawanra aisi ba”. Grik ra asla takanka ba Eklesiastes mâkisa, baha wina sika yawan naiwa iglesia (prias watla) mâki ba, baha wina sika kristian lukanka bri nani bui eklesiastes ba baku lakan “smasmalkra”. Sakuna upla aisasara kum dukiara aisisa, kamparins dadaukra, apia kaka dahra aisasara mamunra. Baku sin sip sa wiaia upla rayaka tânka plaplikra kum kan makabi walisa: ¿Ani ba kau tara sa? ¿Dîa dukia ba wan rayaka ra kau tara sa? ¿Witin mihta ra mangkaia dukiara, upla ba ai brinka dukiara ai karnika aiska pât takisa? Âiulbra ba pain laki kaikisa, kasak kaia ba kulkanka lâka bara param aisi ba, yuyaka bara lilia iwi kaia lâka ba, wark pali ba sin bara sins lâka nani sut ba pain sa sapa upla nani rayaka ra. Prakanka ba, yamni apia sa: klauna ai aslika tânka ra baman luki baku, aitani apia sa. Aisanka kum wina asla dihwi aisanka tara tawisa, wauhkataya na, pana pana aisi kaikanka kum talia sa, âiulbra klauna ai tânka dukiara, piua nani kum kum ra diara kum âu taki bara ningkara apia wisa; sim ai lukanka ra blahwi baku, ban bliki taukisa dîa ba wan rayaka tnata ra, wan kupia lâka kat kaia ba. Baku bamna, wauhkataya na ai tânka tihu ra kaikbia sa kaka, tânka manis ba, apia lâka ra wan marikisa bara sin spiritka daskisa. Âiulbra ba tihu ra laki kaikisa, nahki kunhku sa bara sin tânka briaia karna sa, upla rayaka ba; bara diara yukuwan ra ba upla ra lâ apia kau muni ba bara sari lâka bal taki ba, witin ra karna pali plapi lap tiwisa, bara sip tânka briras. Ahkia piua ra, naha na Gâd wina sa wiaia, naha lika ban tiwaia lâka ra auya sa, bara asla praki bri kau yamni ra lakras saura ra baman tiwaia wabia; kan witin nani kaikisa dîa ai nakra ra bal taki ba baha ba kasak aihwa sa. Tâ krikbia naha kaikanka kasak ba wina; laki kaikanka kum kasak karna pali daukbia kaka, upla aiska kaikanka ba tara kulkisa, bara dîa briaia luki ba tnata kat waia, bara ningkara apia wisa, baha ba sip sa tara pain kulkan kaia. Sakuna prakaia ra param wan marikisa, upla tara kulkanka ba, baha nani paskan Gâd ra kulkanka yabaia bara sin bîla walaia; wihta kulkanka tara diara sut tânka bri ba. Diara sut wan rayaka ra, Gâd prisantka lilia saki ba, wark bara sins lâka pali ba baku, diara kumi baman want sa, kupia karna kaia, bara tânka briaia, baha kulkanka tara bri ba wal asla kabia ba ra. |
© 2010 Bible Society in Nicaragua
Bible Society in Nicaragua