Zozuwe 24 - WẼNNAAM SEBRE 2014

Israyɛll nebã maana kaool Sɩkɛm

¹ A Zozoe tigma Israyɛll nebã fãa Sɩkɛm, n bool Israyɛll kãsem-dãmbã, b nanambsã, b bʋ-kaoodbã ne b tãb-biis nanambsã, la b fãa yalsa Wẽnnaam taoore.

² A Zozoe yeela Israyɛll nebã fãa yaa: «Sẽn-Ka-Saab sẽn yaa Israyɛll Wẽnnaamã yeelame: Yãmb yaab-rãmbã: a Teera ne a kambã, a Abrahaam ne a Nahoor dag n bee Efrat kʋɩlgã rʋʋnd hal daar zãra, la b rag n waoogda wẽnnaam-dãmb a taaba.

³ La mam yãka yãmb yaab a Abrahaam Efrat kʋɩlgã rʋʋnde, n kɩt t'a saag Kana tẽngã fãa. Mam kɩtame t'a yagensã yɩ wʋsgo, n kõ yẽnda a Izake.

⁴ Mam kõ a Izak kamba: a Zakoob ne a Ezayu. Mam kõ a Ezayu Seyɩɩr soolmã sẽn be tãms sʋkã t'a sooge, la a Zakoob ne a kambã kẽnga Ezɩpte.

⁵ Mam tʋma a Moyiis ne a Aarõ, la mam maana bõn-bãn Ezɩpt tẽngã pʋgẽ n sɩbg-ba, la mam yiisa yãmb beenẽ.

⁶ Mam yiisa yãmb yaab-rãmbã Ezɩpte, n wa ta ko-kãsengã noore, tɩ Ezɩpt rãmbã yik ne b saar-dãmb la b wiid n pʋgl yãmb yaab-rãmbã n ta tãnwĩis ko-kãsengã noore.

⁷ La yãmb yaab-rãmbã kelmame n bool Sẽn-Ka-Saabo. Dẽ, Sẽn-Ka-Saab kɩtame tɩ lik zĩnd yãmb yaab-rãmbã ne Ezɩpt nebã sʋka. Bãmb kɩtame tɩ ko-kãsengã lebg n lim bãmba, n dɩ bãmba. Yãmb nin yãnda bũmb ning mam sẽn maan Ezɩpt nebã. Yãmb zĩnda weoogã pʋg n kaoos wʋsgo.

⁸ Mam talla yãmb n kẽng Amoor-dãmbã tẽng sẽn be Zʋrdẽ kʋɩlgã rʋʋndã, la b zaba ne yãmba. Mam kɩtame tɩ y tõog-ba, n deeg b tẽngã, la mam sãam-b-la yãmb nifẽ.

⁹ A Sipoor biig a Balak sẽn yaa Moaab rĩmã yikame n zab ne Israyɛlle. A Balak kɩtame tɩ b bool a Bewoor biig a Balaam t'a wa kãab yãmb wẽnga.

¹⁰ La mam ka kelg a Balaam ye. La yɩɩ kãab-nood bal la a rag n kãabd yãmba, la mam fãaga yãmb a Balak nugẽ.

¹¹ Yãmb pɩʋʋga Zʋrdẽ kʋɩlgã n ta Zeeriko. Zeeriko rãmbã yikame n zab ne yãmba, n paas ne Amoor-dãmbã, Perɛɛz-rãmbã, Kana-rãmbã, Hɛt-rãmbã, Garazim-rãmbã, Hevi-rãmbã ne Zebuus-rãmbã. La mam kɩtame tɩ yãmb tõog-ba.

¹² Mam tʋma kãnenkãas tɩ b reng yãmb taoor n dig Amoor-dãmbã nanambs a yiibã tɩ b zoe n bas yãmba. La ka yɩ ne yãmb zabr sʋʋgã, wall y tãbdã pãng ye.

¹³ Mam kõo yãmb tẽms yãmb sẽn ka nams n paam ye, la m kõ-y tẽms yãmb sẽn ka tilg n kẽ, la m kõ-y reezẽ tɩɩs pʋto, ne oliiv tɩɩs yãmb sẽn ka sele, tɩ yãmb yaool n dɩt-ba.»

¹⁴ A Zozoe paasame n yeel yaa: «Moasã, bɩ y zoe Sẽn-Ka-Saab la y sak bãmb ne burkĩnd la ne pʋ-peelem. Zãag-y y mens ne wẽnnaam-dãmb nins yãmb yaab-rãmbã sẽn dag n pʋʋsd Efrat kʋɩlgã rʋʋndã la Ezɩpt pʋgẽ wã, la y tũ Sẽn-Ka-Saabo.

¹⁵ Yãmb sã n ka rat n tũ Sẽn-Ka-Saabo, bɩ y bao y sẽn na n tũ a soab rũndã: Sã n yaa wẽnnaam-dãmb nins yãmb yaab-rãmbã sẽn dag n tũud Efrat kʋɩlgã rʋʋndã la y rat n tũ, bɩ y tũ. Sã n leb n yaa Amoor-dãmbã sẽn be yãmb sʋkã wẽnnaam-dãmb la y rat n tũ, bɩ y tũ. La maam ne m zakã rãmb yẽ, tõnd na n tũu Sẽn-Ka-Saabo.»

¹⁶ Nebã leokame n yeel yaa: «Tõnd sã n bas Sẽn-Ka-Saab n tũ wẽnnaam-dãmb a taaba, yaa yel-beedo.

¹⁷ Bala, Sẽn-Ka-Saab n yaa tõnd Wẽnnaam. Yaa bãmb n yiis tõnd ne d yaab-rãmbã Ezɩpt tẽng yembdã pʋga. Yaa bãmb n maan bõn-bãn-kãsemsã tõnd nifẽ, la yaa bãmb n gũ tõnd sorã zug d kẽndã wakate, la b gũ tõnd tɩ d pɩʋʋg buud a taabã fãa tẽms n looge.

¹⁸ Bãmb n dig buud a taabã fãa tɩ b zoe tõnd taoore, ne Amoor-dãmbã sẽn dag n be tẽn-kãngã pʋgã me. Dẽ wã, tõnd me na n saka Sẽn-Ka-Saabo, bala, bãmb yaa tõnd Wẽnnaam.»

¹⁹ A Zozoe yeela nebã yaa: «Yãmb ka na n tõog n sak Sẽn-Ka-Saab ye. Bala, b yaa Wẽnnaam sẽn yaa pʋ-peelem soaba, la b yaa Wẽnnaam sẽn ka sakd tɩ b bas bãmb n waoog wẽnnaam-dãmb a taab ye. Bãmb ka na n bas yãmb beegrã ne y yel-wẽnã taal ye.

²⁰ Yãmb sã n bas Sẽn-Ka-Saab n sak wẽn-sãamse, bãmb na n wẽnemd n bas-y lame, n sɩbg-yã, la b na n menes-y lame, baa ne b sẽn dag n maan yãmb neerã.»

²¹ Nebã yeela a Zozoe yaa: «Ayo! Tõnd ka na n tũ wẽnnaam-dãmb a taab ye. Tõnd na n tũu Sẽn-Ka-Saabo.»

²² A Zozoe yeela nebã yaa: «Yãmb yaa y mens kaset dãmba, tɩ yaa yãmb n yãk yam tɩ y na n saka Sẽn-Ka-Saabo.» Nebã leokame n yeele: «N-yẽe! Tõnd yaa d mens kaset dãmba.

²³ Sã n yaa a woto, bɩ y yiis bu-zẽmsã wẽn-sãamsã sẽn be yãmb sʋkã, la y wẽnemd n sak Sẽn-Ka-Saab sẽn yaa Israyɛll Wẽnnaamã ne y sũyã fãa.»

²⁴ Nebã leb n yeela a Zozoe yaa: «Tõnd na n tũu Sẽn-Ka-Saab sẽn yaa tõnd Wẽnnaamã la d sak bãmb sẽn yeelã.»

²⁵ Badaare, Sɩkɛm tẽngã pʋga, a Zozoe maana kaool ne Israyɛll nebã, n kõ-b tõod la noyã.

²⁶ A Zozoe gʋlsa bõn-kãensã fãa Wẽnnaam tõodã sebr pʋga. Yẽnda rɩka kug-bedr n vigl terebẽnt tɩɩg ning sẽn dag n be Sẽn-Ka-Saab zĩ-sõngã zĩig tẽngrã.

²⁷ Dẽ, a Zozoe yeela nebã yaa: «Ade, kug-kãngã na n yɩɩ kaset tõnd yĩnga, bala, kugrã wʋma goam nins fãa Sẽn-Ka-Saab sẽn gom ne tõndã. Dẽ wã, a na n yɩɩ kaset tõnd yĩnga, tɩ yãmb da wa kɩɩs y Wẽnnaamã ye.»

²⁸ Dẽ poore, a Zozoe kɩtame tɩ nebã ned kam fãa kuil a yiri.

A Zozoe ne a Eleyazaar kũum

²⁹ Bõn-kãens fãa loogr zugẽ, a Nun biig a Zozoe sẽn yaa Sẽn-Ka-Saab tʋmtʋmdã kiime. La wakat-kãng t'a tara yʋʋm koabg la piiga.

³⁰ B tɩ mum-a-la a meng soolmã pʋg Timnat-Seera sẽn be Efrayiim soolem ning sẽn be tãms sʋkã pʋga, Gaas tãngã nug-rɩtgo.

³¹ Israyɛll nebã saka Sẽn-Ka-Saabo, a Zozoe vɩɩmã wakate, la nin-kẽemb nins sẽn dag n be ne a Zozoe wã vɩɩm wakate, la b sẽn da ket n tẽr Sẽn-Ka-Saab sẽn maan bũmb nins fãa n kõ Israyɛll nebã wakate.

³² Israyɛll nebã muma a Zozɛf koabã bãmb sẽn dag n tall n yi Ezɩpt n wa wã Sɩkɛmã, zĩig ning a Zakoob sẽn dag n deeg a Sɩkɛm ba a Hamoor kom-dibli wã nengẽ n da wanzuri koabgã. Rẽnda fãa yɩɩ a Zozɛf kambã soolem.

³³ A Aarõ biig a Eleyazaar kiime tɩ b mum-a a biig a Fineyaas soolem tãngã zugu. B rag n dɩka tãn-kãng sẽn be Efrayiim soolem ning sẽn be tãms sʋkã n kõ a Fineyaase.