Sɩngrẽ 35 - WẼNNAAM SEBRE 2014

A Zakoob yii Sɩkɛm n kẽng Betɛlle

¹ Wẽnnaam yeela a Zakoob yaa: «Yik n kẽng Betɛll n tɩ zĩnd be. Fo sã n ta beenẽ, bɩ f lugl tẽn-kugr n pʋʋs Wẽnnaam ning sẽn dag n vẽneg b meng ne foom wakat ning fo sẽn wa n zoet n na n põs f kẽem a Ezayu wã.»

² A Zakoob yeela a zaka rãmb ne neb nins fãa sẽn dag n be yẽnda zakẽ wã yaa: «Yiis-y wẽn-naandsã sẽn be yãmb nengẽ wã, la y yɩlg y mense, la y tek futu.

³ Tõnd na n yikame n kẽng Betɛlle. D sã n ta be, mam na n lugla tẽn-kugr n pʋʋs Wẽnnaam ning sẽn leok maam m sũ-sãangã wakatã, la b yãag maam m so-toakã pʋgẽ wã.»

⁴ Bãmb wʋka b wẽn-naandsã b sẽn dag n tarã, ne b tʋblondã n kɩs a Zakoobe. La a Zakoob rɩk-b lame n bus terebẽnt tɩɩsã sẽn pẽ ne Sɩkɛmã tẽngre.

⁵ Rẽ poore, bãmb loogame. La Wẽnnaam kɩtame tɩ rabeem yõk tẽms nins sẽn pẽ bãmbã nebã, la b ka babs a Zakoob kambã ye.

⁶ La a Zakoob ne neb nins sẽn be ne yẽnda wã taa Luuz sẽn yaa Betɛllã, beenẽ yaa Kana soolem.

⁷ La a Zakoob mee tẽn-kugr beenẽ, n pʋd zĩ-kãng yʋʋr tɩ Ɛll-Betɛlle, sẽn dat n togs tɩ ‹Betɛll Wẽnnaam.› Bala, yaa zĩ-kãng la Wẽnnaam vẽneg b meng ne yẽnda wakat ning yẽnda sẽn wa n zoet n na n põs a kẽem a Ezayu wã.

⁸ A Rebeka bi-yaool a Deboora kiime, la bãmb mum-a-la Betɛll longẽ wã, sɛn tɩ-kẽeng tẽngre, la b pʋd zĩigã yʋʋr tɩ yãbr tɩɩga.

⁹ A Zakoob sẽn yi Padan-Aram n wa wã, Wẽnnaam leb n vẽnega b meng ne yẽnda, la b ning-a-la barka.

¹⁰ Wẽnnaam yeela a Zakoob yaa: «Fo yʋʋr la a Zakoobe. La b ka na n leb n bool foom t'a Zakoob ye, fo yʋʋr na n lebga a Israyɛlle.» Dẽ, Wẽnnaam pʋda a Zakoob t'a Israyɛlle.

¹¹ Wẽnnaam yeela a Zakoob yaa: «Mam yaa Pãng-Soab a Wẽnnaam. Bɩ f paam dogem n fɩɩg n lebg wʋsgo, fo na n yɩɩ bu-kãsenga, la buud wʋsg na n yii fo pʋgẽ. La rĩm-dãmb na n yii fo pʋgẽ.

¹² Mam na n kõo foom tẽng ninga, mam sẽn dag n kõ a Abrahaam ne a Izakã. La fo loogr zugẽ, mam na n kõo fo yagensã tẽn-kãngã.»

¹³ La Wẽnnaam zẽkame n loog n bas yẽnda zĩig ninga bãmb sẽn dag n gom ne yẽnda wã.

¹⁴ A Zakoob baoo kugr n lugl tẽn-kugr zĩig ning Wẽnnaam sẽn gom ne yẽnda wã, la a maana maoong kug-kãng zugu, la a walg kaam a zugu.

¹⁵ A Zakoob pʋda zĩig ning Wẽnnaam sẽn dag n gom ne yẽnda wã yʋʋr tɩ Betɛlle.

A Benzame rogem, la a Rasɛll kũum

¹⁶ Bãmb yii Betɛll n na n looge, la bãmb sẽn kolg Efrate, a Rasɛll rogame. A Rasɛll rogmã yɩɩ toog wʋsg ne-a.

¹⁷ La a Rasɛll sẽn wa n kʋmd rogmã wakate, pʋg-roagsã yeel-a lame yaa: «Da zoe rabeem ye, fo leb n paama bi-ribla!»

¹⁸ La wakat ning a Rasɛll sẽn namsd n dat n ki wã, a pʋda biigã yʋʋr t'a Bɛn-Oni, sẽn dat n togs tɩ ‹mam toog bi-ribla›, la a ba a Zakoob pʋda a yʋʋr t'a Benzame, sẽn dat n togs tɩ ‹mam nug-rɩtg bi-ribla.›

¹⁹ A Rasɛll kiime, la b mum-a-la Efrat tẽngã sorẽ. B boonda zĩ-kãng rũndã-rũndã tɩ Betlehɛm.

²⁰ A Zakoob baoo kugr n lugl a Rasɛll yaoogã zugu. La a Rasɛll yaoogã kugr keta beenẽ hal tɩ ta rũndã.

²¹ A Israyɛll yikame n kẽng n tɩ tilg a yirã Migdall-Edɛɛr taoore.

A Zakoob kamba

²² A Israyɛll sẽn wa n ket n be tẽn-kãngã, a Rubɛn kẽngame n tɩ gãand a ba wã pʋg-rɩkdg a Bila. La a Israyɛll wʋma yellã. A Zakoob kambã sõor yaa bãmb piig la a yiibu:

²³ Ad a Leya kamba: Yaa Rubɛn sẽn yaa a Zakoob pipi biigã, a Sɩmyõ, a Leevi, a Zʋʋda, a Isakaar ne a Zabulõ.

²⁴ Ad a Rasɛll kamba: Yaa a Zozɛf ne a Benzame.

²⁵ Ad a Rasɛll yem-poak a Bila kamba: Yaa a Dan ne a Neftali.

²⁶ Ad a Leya yem-poak a Zilpa kamba: Yaa a Gaad ne a Asɛɛre. Bãmb yaa a Zakoob kom-dibli nins a sẽn dog Padan-Aram soolmẽ wã.

A Zakoob ba a Izak kũum

²⁷ A Zakoob waa mamre, a ba a Izak nengẽ, Kiryat-Arba sẽn be Ebrõ soolmẽ wã, zĩig ning a Abrahaam ne a Izak sẽn dag n be sãand weoogã.

²⁸ A Izak vɩɩmd n kaoosa yʋʋm koabg la pis-nii n yaool n maan kaalem.

²⁹ A Izak kiime tɩ b mum-a n naag a saam-dãmba. La rẽ t'a Izak kʋʋlame n lebg nin-kẽem-kʋdre. Yaa a Izak kambã, a Ezayu ne a Zakoob n mum-a.