Mark 3 - Migaama

Gimu ka pitti maatenta

¹ Gaa Iisa kaatiɗe ga deeɗe un̰n̰a payya girco Yawudigeyyo ka giraaniti. Gaa lekkiɗo iŋaa gimu maa ga pitti maatenta.

² Guu giimi elelɗiya samaane Iisa, baŋ ga rayyaddaa aɗɗe gimu kaaka ma meene ta nambiti, guu gassiyyee botol ka luumiyti unco taattuweeco Yawudigeyyo.

³ Gaa Iisa beneyyiyyee oko gimu ka pitti maatenta kaaka gaa: «Wacu! Asu warra iŋee ɗaɗɗakkico giimo.»

⁴ Gaa inniɗiy giimi kotti ma aaye iŋaa gaa: «Hukumnigeetine oyowwine ma meene ta nambiti ke lewɗo samaane e, e ke lewɗo miɗɗa? Ke najjiyicca hayaatanti gimi e, e baŋ ke duwiyyee ga maatiɗo?» Guu giimi pa ƴapawɗe ka.

⁵ Gaa Iisa elliɗiy paracco ma boŋso o ga zorontoyye asan gu galbigeeco talta. Gaa beneyyiyyee oko gimu gata gaa: «Taariya piccum.» Gaa maa ga taariyya pitti ga rayyidiɗe.

⁶ Guu Pariziyennigee oomiɗe koɗok min ger ka giraaniti kaaka, gu deeɗe timma ma giimi ma gayaa lubbi sultan Erod Antipas ku maa gu boodiɗo ma ka diyawti Iisa.

Giimi maani jobokkaa Iisa

⁷ Gaa Iisa tirriyɗe payya ma jobookeetee biití baharre ta yaata tee ta Galilee. Guu giimi maani jobbiyya. Giimi kotti pa asaa min kiɗa ta Galilee o ta Yudee,

⁸ o min geegar ka Zerizalem o min kiɗa ta Idumee, o min kiɗa ma aaye ta tappití ƴiiro ta Yurden ma sorotta diiman, o ma aaye katta geegar ka Tir o ka Sidon. Giimi ku maani kotti pa asee asan gu giyyiko garrarritee maa ga leelo.

⁹ Gaa Iisa beneyyiyyoo oko jobookeetee gaa gu ellee markaba ku maa gu giimi ku maani kotti alɗiya siiƴa ɗa.

¹⁰ Mileŋ ga rayyide giimi maani ma parayya, ay ɗakko appe gu giimi ma lekka paraayi baadalɗe gu aŋkiɗo eesiti.

¹¹ Maa gu giimi maa gu awaaradgee deegeyye pa elliyya, guu darsiɗe unti, guu ayyaɗɗo goo: «Kii ay Runti Mellayi!»

¹² Gaa Iisa pa uwwiyyoo atarre ma makko gaa: «Aɗoŋ beneyya ɗa oko giimo baŋ na ay we.»

Iisa aparra orro o seera n̰amaakee

¹³ Gaa Iisa deeɗe kalpa jappiti, gaa kolliɗiy miɗi maa ga aŋka, gu asiyyee.

¹⁴ Gata pa apire orro o seera miɗi, gaa oyyiyyoo seme gaa ‘n̰amaakee’. Gata pa apiriy ku maa gu deeɗo tan̰awwo ma gata o ga akkiy n̰amakko gu deeɗica tasawwo kabarre ta daana oko giimo,

¹⁵ o ga biryoo gudirane maa gu deeɗiy petekko awaaradgee ma bamakkiy giimi.

¹⁶ Kooko pa ay n̰amaakee ku orro o seera guta: Simo, maa ga Iisa oyyiyee seme daare gaa Piyer,

¹⁷ o Zak ma sinti kee Yaaya ma ay rontee Zebedee, gaa Iisa pa oyyiyo seme gaa Buwanerzee ma goo ‘Ronti Galgilti’,

¹⁸ o Andire, o Pilip, o Bartelemi, o Matiye, o Toma, o Zak ma ay runti Alpee, o Tadee, o Simo ma deyekka gu guta ma ay Yawudigee hikimiyicca kiɗaaco,

¹⁹ o Yudas Iskariyot ma akkiya bira Iisa picco giimo.

Iisa o Belzebul

²⁰ Gaa Iisa yookiɗe giiri. Guu giimi maani asiɗe timma payya namma ga Iisa ma jobookeetee alɗo gasakka ɗa wikinne ka tiyaawi.

²¹ Maa gu gimtee ku katta giyyikiti kabarre taata, guu asiɗe asan gu aŋka gu asikkiki kaata ma guu o gu beneyya aacco goo gi kayaati Iisa aaye ɗa payya.

²² Aalimnigee ku Kitamniti Muusa pa asee pe min Zerizalem. Guu beneyɗo goo: «Gata ga Belzebul ma ay tattuwco awaaradgeyyo, kalappiya! Ay ma gudirane maa ga berewwiyee ga peteɗɗiy awaaradgee!»

²³ Gaa Iisa kolliɗiy gaa beneyyiyyoo ma masal gaa: «Seetanne petekkaa pe gaa me Seetanne?

²⁴ Guu melleeti mulunniti nekerkití mulunnico beenannico, gi mulunnico taata galaa.

²⁵ A guu giimi ku giiri bokaa ka aatti girco, ga girco kaaka ɗemekka.

²⁶ A Seetanne appe pa kulla, gaa nekerra ma ziiti ka, gii mulunniti ɗeddiɗe gi gudiranti daa ɗa payya, batakka.

²⁷ Lekka ɗa gimu ma gederra ga un̰n̰iɗo girti oko gimu ka amma ga deeɗiy sokka lawtee, illa gaa gederre ga onniyya ƴa omma, hatta gaa deeɗiy sokka ka pe.

²⁸ Na beneyyatoŋca seene, Mella saamayyayoogu zunubgeeco giimi paracco o n̰ilawco parattí maa gu n̰eleɗɗiya.

²⁹ Gaa gimu soopa n̰ilca Ruuhanti Mellayi, ga Mella saamayyeegu ɗa ta kaw zunubgeetee, asan gu zunubgeetee kotti maa ga leelo masalla ɗa ta kaw.»

³⁰ Iisa pa beneyyiyoo goŋŋa asan gu beneyye goo ga aarinne kalappiya.

Yaati Iisa o seneetee

³¹ Gii yaati Iisa o seneetee asiɗe warra renta min giiri, guu n̰aamiɗe gimu ga deeɗiya kolla.

³² Giimi maani pa nowotte gu kadarɗiya Iisa. Gaa gimu kaaka deeɗiyee beneyya gaa: «Giyyu! Yaacum o seneecam waraɗɗiyam renta, gu aŋkiɗum.»

³³ Gaa Iisa tiiliyyee gaa: «Yaatu ay we, o seneetaw ay ini we?»

³⁴ Gaa Iisa elliɗiy giimi ma nowotte gu kadarɗiya kotti, gaa beneyyiɗe gaa: «Kooko appe ay yaatu o gu ay seneetaw,

³⁵ asan ga kulla gimu aɗe ma leeway gaari maa ga Mella aŋka ay sintu, o gi suttu, o gi yaatu.»