John 2 - Muklom

Cana samhaq na patja jaksom

¹ Usal saltom tho, Galilee Cana samhaq na rungsat angta, etho Jesu nu Mary tho eshina angta.

² Jesu nia ujiphantey tang tho eshi rungsat shináng halta.

³ Eshina sutichi tha ahung sey ang atho, Jesu ma unu aa batta, “Ning ching na sutichi ahung sey.”

⁴ Jesu aa thawel batta, “Nga chamlang somlot ching shi nang aa ngama nak bat phu. Thanga náng thula ngama rangham thuwey pha moq.”

⁵ Unu aa sanga tang thima batta, “Piq aa nim ma chamlang ta batphin, eshi somlo inn.”

⁶ Eshina Jehudi tang aa tasang qhol rangma tharok long chik shingta, eshina rokashat nia sharo litres wangta.

⁷ Jesu aa sanga tang ma batta, “Chik tang o jung tashey inn.” Ning aa chik tang tho jung tashey qhanta.

⁸ Piq aa ning ma batta, “Thanga chik wang kho eq rungsat siin tangteywa relnáng som kat inn.” Ning aa piq relnáng som katta.

⁹ Rungsat siin tangteywa aa bari wang sutichi thuta pha tha sammoq angta; etharin jung thajoq ta tha sanga tang they usam eq ta. Ethi jung tha sutichi ma kalikta tha thaktal atho, rungsat siin tangteywa they thariktey wa tha halta,

¹⁰ etho piq ma batta, “Miq thaji eq jakho jaqhal sutichi kot aa, etho miq eq ling jio, abang sutichi sha kot aa; etharin nang aa jaqhal sutichi thanga náng thula dak shing u.”

¹¹ Jesu aa Galilee Cana samhaq na phang patja takhi eq uphun amun sha takhita etho ujiphantey tang aa piq tha hanta.

¹² Ethi jio Jesu etho unu nia uno tang etho ujiphantey tang Capernaum náng kata etho eshina saal shey ni tong ta.

Jesu aa rangnuk him wang sangtey tang tha latchak aa

¹³ Jehudi tang Ulit kut aa kan arelna sey angta, etho Jesu Jerusalem náng kata.

¹⁴ Piq aa rangnuk him na maan, kelwut, etho wotopin sangtey etho lik angin kaletey tang tong atha khita.

¹⁵ Piq aa ru tha wat eq kantha o khak eq piq aa thaji kelwut etho su aa maan tang tha rangnuk him wang latchak ta, etho ngin kaley tey tang ngin tang tha won chak ta etho karatheng tha dang chak ta.

¹⁶ Etho piq aa wotopin sangtey tang thima batta, “Iri tang ri som chuwan inn. Iwa him ri sangtang him ma nak hun inn.”

¹⁷ Etho irimal thawit ta tha ujiphantey tang aa tasik ta, “Ba him ma i tinmat sha itinmong na wal mal júng aa.”

¹⁸ Jehudi tang aa piq ma batta, “Nang ma iri tang raa somma authority atha ta takhi ma nang aa chamlang patja somlo nu?”

¹⁹ Jesu aa ning ma thawel batta, “Iri rangnuk him ri thak chak inn, etho nga ira saltom o wey thalang hun náng.”

²⁰ Jehudi tang aa batta, “Iri rangnuk him raa hun ma pang rokbali pang tharok ràa ta, etho nang aa saltom dang o wey jin thalang hun eq nu i?”

²¹ Etharin piq aa rangnuk him tung aa raaq batta tha uhanngam ma batta.

²² Piq utik wang wey jey jio piq aa chamlang ta batta tha ujiphantey tang aa tasik ta; etho ning aa Asang likwit etho Jesu raaq tha hanta.

Jesu aa miqna tin usam eq aa

²³ Piq Jerusalem na Ulit kut aa kan rangham na angta tho, piq aa patja jaksom takhita tha siin eq daqhan miqtang aa piq miing sho hanta.

²⁴ Etharin Jesu aa piq ni piq tha ning jaknáng kot moq angta, chammatakoi piq aa thaji tha usam eq ta.

²⁵ Miqtang miikkhi piq ma ràa moq angta, chammatakoi piq aa miqtang tinmong na chamlang atha usam eq aa.