Mark 2 - Ambrym North

Iyesu nge hobōn ma ktu helan ran tan ge fyan ge li ge eb rrumyune hakbean nyer.

¹ Ngate wobung worhu te vya, Iyesu te la mōl mōn bya Kabeneam, ngate rral nan te mku ge nge te me rru mōn besaō.

² Vanten te e lol, err me kru lon im ge te rru en, te im te kakae ten, ōrr te ho yerr te heyeye te rranga rru bon taō. Te Iyesu te rrō suuto Tili Rral Kon byane nyer.

³ Bone ge te mang rrō suuto nga bwe, vanten te e virr, tesu hamne vanten hu byanen ge yen te myarr ho.

⁴ Tebyan ge im te ho yerr ten, telōn e ngrengre ge en hamne vanten ge a byane Iyesu. Ngate, ete rrwene heyeye hu ran furrreō knon e ōrr ge Iyesu te rru en. Bone ge ete rrwene heyeye ge le te nong, err totoone vanten ge a ge te fu rru ran tōnyōn bya fyan.

⁵ Bone ge Iyesu te lhe mwenar rrinketean, nge te fe byane vanten ge yen te myarr ho a ge, “Ntung, nam rrumyune mwenam hakbean nyer.”

⁶ Vanten worhu ne wuhuran ne lingsenean, ge err taa ho le, err rrō rrinrrine ge,

⁷ “Tebyan ha nge vanten ge a rrō sur mwi yi le? Surteherrhean ge a! Yafukon, hobōn nga, mwe yekya eb rrumyune mwenangken hakbean nyer!”

⁸ Iyesu te yekya byaho ne nga ha ge te rru lon mwenar rrinrrinan. Ngate te fe byane nyer ge, “Tebyan ha nge mim rrō rrinrrin mwi yi le?

⁹ “Ge be nge mo loloō, ge na fe byanen vanten ge tōlō rrō yeyel a ge, ‘Mwenam hakbean nam rrumyune,’ o ge na fe, ‘Ō totor, ō ktu tōnyōm, te ō yeyel?’

¹⁰ “Na hubsine byane gimi ge be fetinan, ge ni, Terere Mleng Gentin Vanten, nam kutu helan ran tan ge fyan ge li ge na rrumyune hakbean nyer.” Ngate te fe byanen vanten ge telōn rrō yeyel a ge,

¹¹ “Nam rrō fe byane neng, ō totor, ō ktu tōnyōm, te ō vya bsaō!”

¹² Byaho nga, te totor, te ktu tōnyōn, ngate te yel lon metar bya vre. Err non metenen te err rrō hune sa Yafukon bya mre. Err rrō fe, “Myarr rrlō lhekya sese te hu bwi yi a bwe!”

Iyesu ma me rrbyan ge eb jeku ge nyer ge em ho lon rruan hakbe.

¹³ Ngate Iyesu te la mōl mōn bya fya Tee Kakre Kalili. Vanten te e lol ge te e lol err sau me, te nge te rrō whure nyer.

¹⁴ Bone ge te rrō whure nyer te te rrō yel roroō bya, te lhe Lifae, teere mwena Alfeas, ge te taa rru lon im ne takis. Ngate te fe byanen ge, “Ō rrutōng,” ngate te totor te te rrutōn.

¹⁵ Ngate Iyesu te a rrō yen lon im ma Lifae. Te vanten te e lol ge te e lol, worhu err ve vanten ne takis, te rrute err ve vanten ne rruan hakbe. Ge nyer a err rrō yen krine Iyesu te krinen mwenan vanten nyer te yen ge he err yiyi nga ho.

¹⁶ Lon liyal ge le vanten worhu ne wuhuran ne lingsenean, ge err ve Farrasi ho, ete lhe Iyesu te rrō yen krine vanten ne takis nyer, te ge nyer ge err ve vanten ne rruan hakbe nyer ho. Ngate ete whu vanten ne ōman mwena Iyesu nyer ge, “Tebyan ha nge, nge rrō yen krinen vanten ge em yi le?”

¹⁷ Iyesu te rongtane ha ge err rrō fe. Ngate te fe byane nyer ge, “Vanten ge em bu nga ho, err rrlō rrmelole vanten ne kone an, a ge nyer ge em rrō mse nga. Ni narr rrlō me tebyan ge ena je ge nyer ge ema knon lon mwenar myuran, a na me rrbyan ge ena jeku ge nyer ge em ho lon rruan hakbe.”

Iyesu tōlō me rrbyan ge eb rrutōn rruan mwena Farrasi nyer, ge err rrin byasele Tuuankon ge Yafukon te lngi myarin. Ma me rrbyan ge eb sene myuran vivi byanen vanten nyer.

¹⁸ Ngate bone ge le, vanten ge err rrō rrutō Jon Babtaes krinen Farrasi nyer, err rrō felfel tebyan tamtamyaōan. Ngate, vanten worhu err me ne Iyesu, te err fe byanen ge, “Tebyan ha nge vanten ge em rrō rrutō Jon Babtaes, te vanten ge em rrō rrutō Farrasi nyer, em rrō felfel tebyan tamtamyaōan, a mwenam vanten nyer, err rrlō rrō rrwene bwe ye nyer?”

¹⁹ Iyesu te surmōl te fe, “Bone ge vanten ne yean rrō rrwene yenyenan, tōlō knon e ge tahan vehen efe lōn yen. Bone ge tahan vehen em ho le, nyer efe yen, tebyan ge em rrō kwarr.

²⁰ “Bone ge rengete eb nga me ge efe gurrku yafu ne tarirr metene nyer, lo ge efe nga felfel sirr.

²¹ “Mi rrinsene ge a mōn, vanten te hu tōlō ngrengre eba ktu tamsi ul vivi te eb turketekte bya ran ul mtōmtō te hu, tebyan ge ul vivi ge le eba fngung te eba rrre ul mtōmtō te eb nga rrwene ge bulute eb nga lam saavi ge te rru.

²² “Mōl mōn te hu tōlō ngrengre eb liune wekonkon ge mwe nga ōmne an nga rru bya lon bwelaye mtōmtō te hu ge ema rrwene an rru ne lun nani. Bone ge vanten eba rrwene eb yi le, eba mlone wekonkon krinen bwelaye ge a. Sese ge eba rrwene an, vanten eb liune wekonkon vivi bya lon bwelaye vivi.”

Yafukon telōne lngi vanten ge efe roōne Wobungkon. Nge te lngi Wobungkon ge eb roōne vanten nyer.

²³ Ngate ran Wobungkon hu mōn, Iyesu krinen mwenan vanten nyer, err rrō yeyel lon ōrr ne wit. Ngate mwenan vanten nyer err kinti worhu te ete ngne.

²⁴ Te Farrasi nyer err fe byane Iyesu ge, “Ō lhe, rruan ge mwenam vanten nyer ema rrwene ma kbwiti mwenangken lingsenean ran Wobungkon. Tebyan ha nge mwenam vanten nyer ema rrwene mwi yi le?”

²⁵ Iyesu te surmōl byane nyer, te fe, “Beha mirr rrlō yekya Tuuankon ge mwe saarōne ha ge Tefit te rrwene bone ge nge te rrmelole he ne ngne sese te hu. Nge krinen mwenan vanten nyer myar te kte nyer.

²⁶ “Te rrwene err vya lon imkon ge rrlam ma Yafukon, te ete ngne betamyeekon. Rruan ge le te rrwe bone ge Abiata te e hae brris rru. Mi yekya ge mwenangken lingsenean me fe, betamyee ge le hae brris nyer nga ma knon e ge efe ngne, vanten myarr nyer tōlō knon e ge efe ngne.”

²⁷ Ngate Iyesu te fe mōn, “Yafukon telōne lngi vanten ge efe roōne Wobungkon. Nge te lngi Wobungkon ge eb roōne vanten nyer.

²⁸ “Te Terere Mleng Gentin Vanten, nam be Yafu ne Wobungkon. Ni nga nam yekya ena fe ha ge yi rrwene ran Wobungkon, te ni nga mōn ena fe ha ge yi rrlōne rrwene ran Wobungkon.”